စာချုပ်သက်တမ်းကုန်ဆုံးမယ့် နွေရာသီတွင် ယူနိုက်တက်မှ ထွက်ခွာလာတော့မယ့် ကက်စ်မီရို
====================
ကက်စ်မီရိုဟာ ရာသီအကုန် စာချုပ်သက်တမ်းကုန်ဆုံးချိန်တွင် ယူနိုက်တက်မှ ထွက်ခွာလာတော့မှာ ဖြစ်ပါတယ်။
ယူနိုက်တက်ဟာ ဘရာဇီးကွင်းလယ်ကစားသမားရဲ့ စာချုပ်အတွင်းတွင် တစ်နှစ်သက်တမ်းတိုးနိုင်မယ့်အချက်ကို ထည့်သွင်းထားပေမယ့်လည်း သက်တမ်းတိုးချုပ်ဆိုလာတော့မှာ မဟုတ်ပါဘူး။
အသက် ၃၃ နှစ်ရှိ ကက်စ်မီရိုဟာ ၂၀၂၂ ခုနှစ်တွင် ရီးရဲလ်မက်ဒရစ်မှ ပေါင်သန်း ၇၀ ဖြင့် ပြောင်းလာပြီးနောက် ယူနိုက်တက်အတွက် ၁၄၆ ပွဲကစားထားပါတယ်။
သူဟာ ပထမဆုံးရာသီတွင် နယူးကာဆယ်နှင့် ခါရာဘောင်ဖလားဗိုလ်လုပွဲနိုင်ပွဲတွင် အဖွင့်ဂိုးသွင်းခဲ့သလို ပရီးမီးယားလိဂ်တွင် အဆင့် ၃ နေရာမှာ ရပ်တည်နိုင်အောင် ကူညီခဲ့ပါတယ်။
ဒါပေမယ့် သူဟာ ပြီးခဲ့တဲ့နှစ် ဘီဘီစီနှင့် အင်တာဗျူးတွင် ပူးတွဲပိုင်ရှင်ဆာဂျမ်ရက်ကလစ်ဖ်ရဲ့ လုပ်ခများစွာယူပြီး လုံလောက်တဲ့ ခြေစွမ်းမကောင်းမွန်သူအဖြစ် ပြောဆိုခြင်းခံခဲ့ရပါတယ်။
ကက်စ်မီရိုက "မန်ချက်စတာယူနိုက်တက်ကို ကျွန်တော့်တစ်ဘဝလုံး သယ်ဆောင်သွားပါမယ်။ နှုတ်ဆက်ရမယ့်အချိန်မဟုတ်သေးပါဘူး။ နောက် လေးလအတွင်း အမှတ်တရတွေ အများကြီး ဖန်တီးလာဦးမယ်။ အတူတကွ လက်တွဲပြီး တိုက်ခိုက်စရာတွေ အများကြီးရှိပါသေးတယ်။ အာရုံစူးစိုက်မှုအပြည့်နဲ့ အသင်းအောင်မြင်ရေး အစွမ်းကုန်ကြိုးစားပေးသွားပါမယ်"လို့ ပြောကြားသွားပါတယ်။
ကက်စ်မီရိုဟာ လုပ်ခ ပေါင် ၃၅၀၀၀၀ ဖြင့် ယူနိုက်တက်တွင် လုပ်ခအများဆုံး ရရှိတဲ့ ကစားသမားအဖြစ် ရပ်တည်နေသူ ဖြစ်ပါတယ်။
ဒါပေမယ့် ယူနိုက်တက်ဟာ ပူးတွဲပိုင်ရှင်ဆာဂျမ်ရက်ကလစ်ဖ် လက်အောက်တွင် အသုံးစရိတ်နှင့် လုပ်ခအသုံးစရိတ်တို့အား လျှော့ချနေမှုနှင့်အတူ ကက်စ်မီရိုနှင့် လမ်းခွဲရန် ဆုံးဖြတ်လာတာလည်း ဖြစ်ပါတယ်။
တဖက်တွင် ယူနိုက်တက်ဟာ ကက်စ်မီရိုနနေရာတွင် အစားထိုးရေး ကွင်းလယ်ကစားသမားရှာဖွေမှု စတင်ပြုလုပ်နေပြီ ဖြစ်ပြီး လျာထားစာရင်းတွင် အင်္ဂလန်ကွင်းလယ်ကစားသမားများဖြစ်ကြတဲ့ အီးလီးယော့အင်ဒါဆင်၊ အဲလက်စ်စကော့၊ အဒမ်ဝါတွန်နှင့် ကင်မရွန်းကွင်းလယ်ကစားသမားကားလို့စ်ဘာလီဘာတို့ ပါဝင်နေပါတယ်။
