၁၆ သင်းရှုံးထွက်အဆင့်သို့ တက်ရောက်ပြီးနောက် ယူရိုပါလိဂ်ဖလားဆွတ်ခူးရေး အမ်မရီ အိပ်မက်နေပြီ
=====================
ယူရိုပါလိဂ် ၁၆ သင်း ရှုံးထွက်အဆင့်သို့ တိုက်ရိုက်တက်ရောက်နိုင်ခဲ့ပြီးနောက် အက်စတွန်ဗီလာနည်းပြအူနိုင်းအမ်မရီက ယူရိုပါလိဂ်ဖလား ဆွတ်ခူးရေး အိပ်မက်မက်နေပြီ ဖြစ်ကြောင်း ပြောကြားလာပါတယ်။
အက်စတွန်ဗီလာဟာ ဂျာဒွန်ဆန်ချိုရဲ့ တစ်လုံးတည်းသော အနိုင်ဂိုးဖြင့် တူရကီတွင် ဖီနာဘာချီအား ၁-၀ ဂိုးဖြင့် အနိုင်ရရှိကာ ယူရိုပါလိဂ် ထိပ်ဆုံး ၈ သင်းစာရင်းဝင်ရန် သေချာသွားခဲ့ပြီဖြစ်ပါတယ်။
တနင်္ဂနွေနေ့တုန်းက အိမ်ကွင်းတွင် အဲဗာတန်ကို ၁-၀ ဂိုးဖြင့် ရှုံးနိမ့်ပြီးနောက် အူနိုင်းအမ်မရီက ဗီလာမှာ ထိပ်ဆုံး ၅ သင်းစာရင်းပင် ဝင်နိုင်တဲအသင်းမဟုတ်ကြောင်း ပြောဆိုခဲ့ဖူးပါတယ်။
ဗီလာဟာ ပရီးမီးယားလိဂ်ထိပ်ဆုံး ၅ သင်းဝင်ခြင်း (သို့မဟုတ်) ယူရိုပါလိဂ်ချန်ပီယံဖြစ်ခြင်းတို့ဖြင့် လာမယ့်ရာသီ ချန်ပီယံလိဂ်ဝင်ခွင့်ရနိုင်တဲ့ အခွင့်အရေး ရှိနေပါတယ်။
ဆီဗီလာ၊ အာဆင်နယ်နှင့် ပီအက်စ်ဂျီနည်းပြဟောင်းဟာ ယူရိုပါလိဂ်ဖလားအား ၄ ကြိမ် ဆွတ်ခူးထားတဲ့ ပထမဆုံးနည်းပြအဖြစ် မှတ်တမ်းရေးထိုးထားသူ ဖြစ်ပါတယ်။
ဖီနာဘာချီနှင့်ပွဲတွင် ယူရိုပါလိဂ်ပွဲရာပြည့်ကိုင်တွယ်ခဲ့တဲ့ အမ်မရီက "ချန်ပီယံလိဂ်ကစားခွင့်ရဖို့ ဒီဖလားရဖို့ လိုတယ်။ လိဂ်(ပရီးမီးယားလိဂ်)ကနေ ဝင်ခွင့်ရဖို့ ခက်တယ်။ ဆုဖလားတွေ ရဖို့ အိပ်မက်မက်တယ်။ ယူရိုပါလိဂ်က ကျွန်တော်တို့ရဲ့ ဒီနှစ် ရည်မှန်းချက်တွေထဲက တစ်ခုပါ"လို ပြောကြားသွားပါတယ်။
ဗီလာဟာ အင်္ဂလိပ်ဘောလုံးလောကတွင် သတ္တမအအောင်မြင်ဆုံးကလပ်အဖြစ် ရပ်တည်နေပေမယ့်လည်း နောက်ဆုံးအကြိမ် ဆုဖလားဆွတ်ခူးနိုင်ခဲ့တာ ၁၉၉၆ ခုနှစ်တုန်းက လိဂ်ဖလား ရရှိခဲ့တာပါ။
ဗီလာဟာ နောက်ဆုံးကစားတဲ့ ၂၅ ပွဲတွင် ပွဲ ၂၀ အနိုင်ရထားပြီး ဥရောပထိပ်သီးလိဂ်ကြီးငါးခုတွင် ယင်းကာလအတွင်းတွင် အာဆင်နယ် (၂၁)ပြီးလျှင် နိုင်ပွဲအများဆုံး ရရှိထားတဲ့အသင်းအဖြစ်ရပ်တည်နေပါတယ်။
ဗီလာဟာ ဖီနာဘာချီနှင့်ပွဲတွင် လူစာရင်း ၆ ဦးအပြောင်းအလဲ ပြုလုပ်ကစားခဲ့ပေမယ့်လည်း ပွဲကို လွှမ်းမိုးထားနိုင်ခဲ့ပါတယ်။ ယင်းပွဲတွင် ဆန်ချိုဟာ ကလပ်အတွက် ၁၉ ပွဲမြောက်ပွဲကစားရာမှာ ပထမဆုံးဂိုးသွင်းနိုင်ခဲ့ပါတယ်။
