ကိုလံဘီယာမိသားစုတစ်ခုအားလူကုန်ကူးမှုလုပ်ခဲ့တယ်ဆိုတဲ့ စွပ်စွဲမှုဖြင့် ရင်ဆိုင်နေရတဲ့ ပီအက်စ်ဂျီစတားလူးကပ်စ်ဟာနန်ဒက်ဇ်
====================
ပီအက်စ်ဂျီနောက်ခံလူလူးကပ်စ်ဟာနန်ဒက်ဇ်နှင့် ဇနီးတို့က နေအိမ်တွင် အလုပ်လုပ်ခဲ့တဲ့ ကိုလံဘီယာမိသားစုတစ်ခုအား အလုပ်အကျွံအလုပ်စေခိုင်းမှု၊ လူကုန်ကူးမှုပြုလုပ်ခဲ့တယ်လို့ စွပ်စွဲခံရမှုအား ငြင်းဆိုလာပါတယ်။
ပြင်သစ်သတင်းစာ Paris Match က အသက် ၂၉ နှစ်ရှိ ပြင်သစ်လက်ရွေးစင်နှင့် ဇနီးသည်ဗစ်တိုးရီးယားထရိုင်ယာတို့ဟာ ၂၀၂၄ ခုနှစ် စက်တင်ဘာလမှ ၂၀၂၅ ခုနှစ် နိုဝင်ဘာလအတွင်းတွင် နေအိမ်တွင် ကိုလံဘီယာမိသားစု ငါးဦးတို့အား ငှားရမ်း လုပ်ကိုင်စေခဲ့ရာမှာ အလွန်အကျွံအလုပ်ခိုင်းခဲ့တယ်လို့ ဖော်ပြလာခဲ့တာပါ။
ယင်းကိုလံဘီယာမိသားစုဝင်များတွင် မိခင်၊ ဖခင်နှင့် သားသမီး ၃ ဦးပါဝင်ပြီး ဟာနန်ဒက်ဇ်ရဲ့ နေအိမ်တွင် လုံခြုံရေး၊ ချက်ပြုတ်ခြင်း၊ ကလေးထိန်းခြင်းတို့အား ပြုလုပ်ခဲ့ရတာပါ။ ဒါပေမယ့် ၎င်းတို့ဟာ အလုပ်လုပ်ခွင့်ဗီဇာ၊ စာချုပ်တို့ဖြင့် ခန့်အပ် လုပ်ကိုင်ခဲ့ရတာ မဟုတ်ပါဘူး။
ယင်းမိသားစုဟာ ပြင်သစ်လူမှုဖုံလုံရေးစနစ်တွင် မှတ်ပုံတင်ထားခြင်း မရှိသလို လုပ်ခကိုလည်း ငွေသားဖြင့် ရယူခဲ့ကြတာပါ။ ၎င်းတို့ဟာ ပိတ်ရက်မရှိဘဲ တစ်ပတ်လျှင် ၇၂ နာရီမှ ၈၄ နာရီအတွင်း အလုပ်လုပ်ခဲ့ရတယ်လို့ ယူဆရပါတယ်။
ဒါ့အပြင် ယင်းမိသားစုကို စပိန်နိုင်ငံသားအဖြစ် လိမ်လည်ခဲ့တဲ့အပြင် ၂၀၂၅ ခုနှစ် ဖေဖော်ဝါရီတွင် ယင်းတို့အား ထုတ်ဖော်ပြောကြားခြင်း မပြုလုပ်ရန် သဘောတူညီခဲ့ပါသေးတယ်။
ယင်းကဲ့သို့ ဖာနန်ဒက်ဇ်နှင့် ဇနီးသည်တို့ဟာ တရားမဝင် အလုပ်သမားများအား အလုပ်စေခိုင်းမှုနှင့်အတူ လူကုန်ကူးမှုဖြင့် စွပ်စွဲခြင်းခံနေရတာလည်း ဖြစ်ပါတယ်။
ဒါပေမယ့် ဖာနန်ဒက်ဇ်က"ကျွန်တော်တိုဟာ နေအိမ်နဲ့ ဘဝတွေကို သူတို့ကိုယ်သူတို့ သူငယ်ချင်းတွေပါ ဆိုတဲ့သူတွေအတွက် တံခါးဖွင့်ပေးခဲ့တယ်။ သူတို့အပေါ်မှာလည်း ကျွန်တော်တို့ရဲ့ စစ်မှန်တဲ့ ချစ်ခြင်းမေတ္တာတွေ ပေးခဲ့တယ်။ ဒီလူတွေက ကျွန်တော်တို့နဲ့အတူ လေးစားမှု၊ ဂုဏ်သိက္ခာရှိမှုတွေနဲ့ မျှဝေခဲ့ကြတယ်။သူတို့ရဲ့ အခြေအနေတွင် ပုံမှန်အခြေအနေရောက်အောင် လုပ်ဆောင်မယ်လို့ ကတိပေးလာတဲ့အခါ ကျွန်တော်တို့ သူတို့ကို ကူညီခဲ့ကြတယ်။ သူတို့ကို ပံ့ပိုးပေးခဲ့ကြတယ်။ သူတို့အပေါ် ယုံကြည်ပေးခဲ့တယ်။ ကံဆိုးစွာပဲ ဒီအခြေအနေမျိုးကြုံတာ ပထမဆုံးအကြိမ် မဟုတ်ပါဘူး။ ကျုပ်တို့ မတိုင်ခင် အခြားသူတွေလည်း ကြုံခဲ့ဖူးကြပါတယ်။ အခြားသူတွေလိုပဲ ကျွန်တော်တို့ဟာလည်း စိတ်ခံစားချက်ပါဝင်တဲ့ ဇာတ်လမ်းတွေ၊ အချက်အလက်အမှားတွေနဲ့ ခြယ်လှယ်ခံရတယ်။ ကျွန်တော်တို့ဟာ ဥပဒေကို မကောင်းတဲ့ ရည်ရွယ်ချက်ဖြင့်သော်လည်းကောင်း၊ ရည်ရွယ်ချက်ရှိရှိသော်လည်းကောင်း ချိုးဖောက်ခဲ့ဖူးခြင်း မရှိပါဘူး။ လူသားဆန်ဆန်ပဲ လုပ်ခဲ့တယ်။ ဂရုဏာတရားကို အသုံချနိုင်တယ်ဆိုတာ နာကျင်စွာ သင်ခန်းစာ ရရှိခဲ့ပါပြီ။ ဒီအခြေအနေကို ပိုပြီးတော့ ခက်ခဲသွားစေတာက ယုံကြည်မှုနဲ့ လူသားဆန်မှုတို့ရဲ့ အပြုအမူတွေက လူသိရှင်ကြားတိုက်ခိုက်မှု စွပ်စွဲမှုတွေအဖြစ်ပြောင်းလဲသွားစေခဲ့တယ်။ ဒီခက်ခဲတဲ့ အဖြစ်အပျက်အတွက် ကျွန်တော်တို့ မိသားစုနာကျင်ရပါတယ်"လို့ ပြောကြားသွားပါတယ်။
ဒါ့အပြင် ဟာနန်ဒက်ဇ်က ယခုအဖြစ်အပျက်အား ဆိုရှယ်မီဒီယာတွင် ဖြန့်ဝေတဲ့သူများအား တရားစွဲဆိုရန် စီစဉ်နေကြောင်းလည်း ဆိုသွားပါတယ်။
တဖက်တွင် ပြင်သစ်အာဏာပိုင်များကလည်း ဟာနန်ဒက်ဇ်ရဲ့ အဖြစ်အပျက်အား စုံစမ်းစစ်ဆေးမှုများ ပြုလုပ်နေပါတယ်။
ဟာနန်ဒက်ဇ်မှာ ၂၀၂၃ ခုနှစ်ကတည်းက ပီအက်စ်ဂျီတွင် ကစားနေသူ ဖြစ်ပြီး ဆော်ဒီပရိုလိဂ်ကလပ် Al Hilal တွင် ကစားနေတဲ့ သီယိုရဲ့ အစ်ကိုလည်း ဖြစ်ပါတယ်။
သူဟာ ပီအက်စ်ဂျီအတွက် ယခုရာသီ ၁၇ ပွဲအပါအဝင် ၈၇ ပွဲကစားထားပါတယ်။ သူဟာ အက်သလက်တီကိုတွင် ကစားသမားဘဝစတင်ပြီးနောက် ဘိုင်ယန်မြူးနစ်တွင် လေးနှစ်ကြာ ကစားခဲ့သူလည်း ဖြစ်ပါတယ်။
