ချီဖွေမြို့အဝင်လမ်းမှာ အိမ်စီးကားတစီး မေခမြစ် ချောက်ကမ်းပါးထဲကျလို့ နှစ်ယောက်သေ
ကချင်ပြည်နယ်၊ ချီဖွေမြို့ အနီး မြို့အဝင် ကားလမ်းမှာ ဇန်နဝါရီလ ၂၀ ရက်နေ့ မနက် ၅ နာရီခွဲခန့်က အိမ်စီးကားတစီး မေခမြစ် ချောက်ကမ်းပါးဘက် ကျသွားလို့ လူ ထိခိုက်သေဆုံးမှုရှိကြောင်း ဒေသခံတွေဆီက သိပါတယ်။
“ချီဖွေမြို့အဝင် လမ်းမှာ အိမ်စီးကားတစီး မေခမြစ် ချောက်ကမ်းပါးဘက် ကျသွားလို့ ဘုရားကျောင်းက အမှုတော်ဆောင် ဆရာတယောက် နဲ့ ၁၀ တန်းကျောင်းသား တယောက် သေဆုံးသွားပြီး ၁၀ တန်း ကျောင်းသား နောက်တယောက်က ဒဏ်ရာရသွားတယ်” လို့ ဒေသခံ အမျိုးသမီး တယောက်က ပြောပါတယ်။
Toyota Noah ကားအဖြူ ဖြစ်ပြီး ကားမောင်းသူ အမှုတော်ဆောင်ဆရာ နဲ့အတူ ကားပေါ်မှာ ၁၀ တန်း ကျောင်းသား နှစ်ယောက်ပါလာတာဖြစ်ပြီး ယမန်နေ့ ဇန်နဝါရီလ ၂၀ ရက်နေ့ မနက် ၅ နာရီခွဲဝန်းကျင်မှာ မေခမြစ်ကမ်းပါးဘက်ထဲ မှောက်ကျသွားတာလို့ သူက ပြောပါတယ်။
“ကားမှောက်တယ်လို့ သိရလို့ သွားကြည့်တဲ့အချိန် နှစ်ယောက်က အသက်မရှိတော့ဘူး။ တယောက်က အသက်ရှင်နေသေးတယ်။ စက်လှေနဲ့ပဲ ဆေးရုံပို့လိုက်တယ်။ အခု ချီဖွေ ပြည်သူ့ဆေးရုံမှာ ဆေးကုသမှု ခံယူနေတယ်။” လို့ ဒေသခံ အမျိုးသား တယောက်က ပြောပါတယ်။
ကားမောင်းတဲ့သူက နမ်ဝါရွာက ဖြစ်ပြီး ကျောင်းသား နှစ်ယောက်ကတော့ မျောမောပါရွာက ဖြစ်တယ်လို့ သိရကြောင်း သူက ပြောပြပါတယ်။
ချီဖွေမြို့ရဲ့ အရှေ့တောင်ဘက်မှာတော့ တရုတ်-မြန်မာနယ်စပ်မြို့ဖြစ်တဲ့ ပန်ဝါမြို့နဲ့ ၄၀ မိုင်ခန့်ကွာဝေးပြီး မြောက်ဖက်မှာ လောခေါင်၊ ထော်ဂေါ့၊ ဆော့လော်မြို့တွေဘက် ကားလမ်းနဲ့ဆက်သွယ်ထားကာ လက်ရှိမှာတော့ KIA/KIO က ထိန်းချုပ်ထားတာဖြစ်ပါတယ်။
