မဲဆောက်မှာ ထိုင်းရဲကို သေနတ်နဲ့ပစ်ခတ်မှု မြန်မာတယောက် ဖမ်းမိထား

ထိုင်း - မြန်မာနယ်စပ် မဲဆောက်မြို့မှာ ထိုင်းရဲတယောက် သေနတ်နဲ့ ပစ်ခတ်ခံရမှု ဖြစ်စဥ်မှ မြန်မာတယောက် ဖမ်းမိထားပြီး သေနတ်နဲ့ ပစ်ခတ်သူကတော့ လွတ်မြောက်နေဆဲ ဖြစ်တယ်လို့ ထိုင်းသတင်း ဖော်ပြချက်တွေအရ သိရပါတယ်။
အဲဒီ ပစ်ခတ်မှုဖြစ်စဉ်ဟာ မဲဆောက်မြို့၊ မယ်ကုရပ်ကွက်၊ တော့ဖောင်း အထည်ချုပ်စက်ရုံဘေးရှိ 7/11 စတိုးဆိုင်အနီးမှာ မနေ့ ဇန်နဝါရီ ၂၀ ရက်၊ ညနေ ၅ နာရီဝန်းကျင်က ဖြစ်ပွားခဲ့တာလို့ သိရပါတယ်။
ဆိုင်ကယ်စီးလာသူ နှစ်ယောက်ကို ထိုင်းရဲက စစ်ဆေးတာမှာ ‌နောက်မှာစီးလာသူက ရဲတွေကို ပစ္စတိုသေနတ်နဲ့ အချက်ပေါင်းများစွာ ပစ်ခတ်ပြီး ထွက်ပြေးခဲ့တာ ဖြစ်တယ်လို့ သိရပါတယ်။
“အခင်းဖြစ်ချိန် ရဲတယောက်တော့ သေနတ်မှန်သွားတယ်။ သေနတ်နဲ့ပစ်ပြီး ဆိုင်ကယ်မောင်းပြေးလို့ ရဲတွေက လိုက်ဖမ်းတာ ဆိုင်ကယ်မောင်းတဲ့ တယောက်ကို မိတယ်။ သေနတ်နဲ့ ပစ်တဲ့တယောက်က လွတ်သွားတယ်။ ဒီနေ့တော့ ပစ်ခတ်မှုဖြစ်တဲ့ နေရာနဲ့ မီတာ ၅၀၀ လောက်အကွာမှာ သေနတ်ကို တွေ့တယ်။ သေနတ်သမားကိုတော့ မမိသေးဘူး” လို့ မဲဆောက်မြို့မှာ နေထိုင်သူတယောက်က ပြောပါတယ်။
ပစ်ခတ်မှုအတွင်း အသုံးပြုခဲ့တဲ့ သေနတ်ကို တော့ဖောင်းစက်ရုံ အနောက်ဘက်က ကြံစိုက်ခင်းထဲမှာ ရဲတွေက ရှာဖွေတွေ့ရှိခဲ့တာဖြစ်ပြီး သေနတ်သမားရဲ့ အင်္ကျီ၊ ဘောင်းဘီနဲ့ အိတ်တွေကိုလည်း တွေ့ရှိခဲ့တယ်လို့ သူက ပြောပါတယ်။
ဒီကနေ့ နေ့လယ်ပိုင်း အချိန်အထိ ထိုင်း - မြန်မာနယ်စပ် နေရာတွေမှာ ထိုင်းအာဏာပိုင် အဖွဲ့အစည်းတွေက ထိုင်းနယ်ခြားစောင့်တပ်၊ ရဲမှုခင်းတပ်ဖွဲ့၊ ဒရုန်းတပ်ဖွဲ့အပြင် အနံ့ခံမှုခင်းရှာဖွေရေး ခွေးတပ်ဖွဲ့ဝင်တွေ အသုံးပြုပြီး ကျေးရွာ၊ ရပ်ကွက်၊ လမ်းမတွေနဲ့ စိုက်ခင်းနေရာတွေကို ပိုက်စိပ်တိုက် ဆက်လက် ရှာဖွေနေကြတယ်လို့ သိရပါတယ်။
လက်ရှိမှာ သေနတ်ပစ်ခတ် ထွက်ပြေးသူကို ဖမ်းဆီးရမိခြင်း သေးတဲ့အတွက် မဲဆောက်ဒေသအာဏာပိုင် အဖွဲ့အစည်းတွေက ရပ်ကွက်၊ ကျေးရွာအတွင်း နေထိုင်သူတွေအနေနဲ့ မသင်္ကာမှုတွေကို တွေ့ရှိရပါက သတင်းပေးပို့ကြဖို့ အရေးပေါ်အခြေအနေ ထုတ်ပြန် ကြေညာထားတယ်လို့ သိရပါတယ်။
“မနေ့ (ဇန်နဝါရီ ၂၀ ရက်) ညကလည်း မယ်ကုရပ်ကွက်ထဲ ရဲတွေအများကြီး ဝင်လာပြီး ရှာနေတာတွေ့တယ်။ ထိုင်းက မြန်မာတွေကတော့ နေရထိုင်ရတာ ဒုက္ခတွေရောက်တယ်။ ပြဿနာတွေက တနေ့တမျိုး မရိုးနိုင်အောင်ဘဲ” လို့ ထိုင်းရောက် မြန်မာတယောက်က ပြောပါတယ်။
အခင်းဖြစ်ပွားရာ နေရာမှာ မြန်မာနိုင်ငံသား အသက် ၂၀ အရွယ် မင်းဇော်သူ ဆိုသူကို ဖမ်းဆီးရမိခဲ့တာလို့ သိရပြီး လွတ်မြောက်နေသူကတော့ အသက် ၂၀ အရွယ် နိုင်အောင် ဆိုသူဖြစ်တယ်လို့ သိရပါတယ်။
နိုင်အောင်ဟာ လက်နက်နဲ့ ကျည်ဆန်တွေ ယူဆောင်ပြီး ထိုင်း - မြန်မာ နယ်စပ်အနီးက ကြံခင်းထဲကို ထွက်ပြေးသွားကြောင်း ဖမ်းဆီးခံရသူက ဝန်ခံထွက်ဆိုထားတယ်လို့ သိရပါတယ်။
မနေ့ ညနေက ဖြစ်ပွားခဲ့တဲ့ ပစ်ခတ်မှုအတွင်း မဲဆောက် ရဲစခန်းက တပ်ကြပ်ကြီး Seksan Kanka ဟာ ဗိုက်ကို သေနတ်ထိမှန်ပြီး ဒဏ်ရာပြင်းထန်စွာ ရရှိခဲ့တာကြောင့် အရေးပေါ် ဆေးကုသမှု ခံယူနေရတယ်လို့ သိရပါတယ်။
တရားခံ နှစ်ယောက်စလုံးဟာ မဲဆောက်မြို့၊ မယ်ပရပ်ကွက်မှာ နေထိုင်သူတွေဖြစ်ကာ သေနတ် အရောင်းအဝယ် ချိန်းဆိုမှုကြောင့် မယ်ကုကို လာရောက်ခဲ့ကြတာ ဖြစ်တယ်လို့ သိရပြီး လက်ရှိအချိန်မှာတော့ တရားခံတွေနဲ့ အတူနေထိုင်တဲ့ မိသားစုတွေကို သက်ဆိုင်ရာက ခေါ်ယူ မေးမြန်းနေတယ်လို့ သိရပါတယ်။