အရိုးအက်ဒဏ်ရာကြောင့် လအတန်ကြာ နားလာရမှာဖြစ်လို့ ကမ္ဘာ့ဖလားနေရာအတွက် စိုးရိမ်စရာ ရှိလာတဲ့ ဂျက်ဂရဲလ်လစ်ရှ်
======================
ဂျက်ဂရဲလ်လစ်ရှ်ဟာ အရိုးအက်ဒဏ်ရာကြောင့် လအတန်ကြာ အနားယူလာရဖို့ ရှိနေမှုနှင့်အတူ ကမ္ဘာ့ဖလားပြိုင်ပွဲဝင် အင်္ဂလန်အသင်းတွင် နေရာတစ်နေရာ ရရှိရေး သံသယဝင်စရာ ဖြစ်လာပါတယ်။
အဲဗာတန်ကွင်းလယ်ကစားသမားဟာ ယခုရာသီတွင် ဒေးဗစ်မိုယက်စ်ရဲ့အသင်းတွင် အရေးပါတဲ့ ကစားသမားအဖြစ် ခြေစွမ်းပြနေသူ ဖြစ်ပါတယ်။
ဒါပေမယ့် အဲဗာတန်ဟာ ဂျက်ဂရဲလ်လစ်ရှ် မပါဝင်ဘဲ လာမယ့် ရက်သတ္တပတ်များစွာတို့အား ရင်ဆိုင်လာရတော့မှာ ဖြစ်ပါတယ်။
အသက် ၃၀ နှစ်ရှိ ဂျက်ဂရဲလ်လစ်ရှ်ဟာ လာမယ့် ရက်များအတွင်းတွင် စပါယ်ရှယ်လစ်တစ်ဦးနှင့် ပြသကာ ဒဏ်ရာအခြေအနေကို စစ်ဆေးလာပါမယ်။
သူဟာ ပြီးခဲ့တဲ့အပတ်တုန်းက ဗီလာအား အနိုင်ရတဲ့ပွဲတွင် ပွဲချိန်ပြည့်ကစားခဲ့သူလည်း ဖြစ်ပါတယ်။
သူဟာ ယခုရာသီတွင် အဲဗာတန်နှင့်အတူ အကောင်းဆုံးပုံစံဖြင့် ကစားနေပေမယ့်လည်း ယခုကဲ့သို့ ဒဏ်ရာကြောင့် ရက်သတ္တပတ်အတန်ကြာ အနားယူလာရမှုက ကမ္ဘာ့ဖလားပြိုင်ပွဲဝင် အင်္ဂလန်အသင်းတွင် ပါဝင်ခွင့် ရရေး ထိုးနှက်ချက် ကြုံလာရပါတယ်။
သူဟာ နွေရာသီတွင် မန်စီးတီးမှ အငှားဖြင့် ရောက်လာပြီးနောက် အဲဗာတန်အတွက် ပရီးမီးယားလိဂ်ပွဲ ၂၀ ကစားထားရာမှာ ၂ ဂိုးသွင်းပြီး ၆ ကြိမ် ဖန်တီးထားပါတယ်။
သူဟာ ပရီးမီးယားလိဂ်တွင် မန်စီးတီးစတားရာယန်ချာကီနှင့် ယူနိုက်တက်အသင်းခေါင်းဆောင်ဘရူနိုဖာနန်ဒက်စ်တို့ပြီးလျှင် ဖန်တီးမှု အများဆုံးကစားသမားအဖြစ် ရပ်တည်နေပါတယ်။
အဲဗာတန်ဟာ ဂျက်ဂရဲလ်လစ်ရှ်ရဲ့ အငှားစာချုပ်အတွင်းတွင် ပေါင်သန်း ၅၀ ဖြင့် အပြီးသတ်ခေါ်ယူနိုင်မယ့်အချက်ကို ထည့်သွင်းချုပ်ဆိုထားပါတယ်။
