ရှမ်းနဲ့ ရန်ကုန်ကြား (၁) မှတ်သာကွာဟတော့လို့ ချန်ပီယံဆုအတွက် ပြိုင်ဆိုင်မှုပြင်းထန်လာ
ဒီရာသီ MNL အမှတ်ပေးလိဂ်ပြိုင်ပွဲ ပွဲစဥ် (၁၂) အပြီးမှာ အမှတ်ပေးဇယားထိပ်ဆုံးက ရှမ်းအသင်းနဲ့ ရန်ကုန်ယူနိုက်တက်အသင်းတို့ကြား အမှတ်ကွာဟမှုက (၁) မှတ်သာ ရှိတော့တာကြောင့် ချန်ပီယံဆုအတွက် ပြိုင်ဆိုင်မှုက ပိုပြီးပြင်းထန်လာနေလျက်ရှိပါတယ်။
ပွဲစဥ် (၁၂) မှာ ရှမ်းယူနိုက်တက်အသင်းက ဒဂုံပေါ့သ်အသင်းနဲ့ ဂိုးမရှိသရေကျခဲ့ပြီး ရန်ကုန်ယူနိုက်တက်အသင်းက ရခိုင်ယူနိုက်တက်အသင်းကို (၇-၁) ဂိုးနဲ့ အနိုင်ရခဲ့ပါတယ်။
ဒါကြောင့် ပွဲစဥ် (၁၂) အပြီးမှာ ရှမ်းယူနိုက်တက်အသင်းက (၁၂) ပွဲကစား၊ (၉) ပွဲနိုင်၊ (၃) ပွဲသရေ၊ ရှုံးပွဲမရှိ၊ ရမှတ် (၃၀) မှတ်နဲ့ ထိပ်ဆုံးကဦးဆောင်နေပြီး ရန်ကုန်ယူနိုက်တက်အသင်းက (၁၂) ပွဲကစား၊ (၉) ပွဲနိုင်၊ (၂) ပွဲသရေ၊ (၁) ပွဲရှုံး၊ ရမှတ် (၂၉) မှတ်နဲ့ ဒုတိယနေရာကနေ (၁) မှတ်အကွာနဲ့ ဖိအားပေးနေလျက်ရှိပါတယ်။
ပွဲစဥ် (၁၃) အဖြစ် ဇန်နဝါရီ (၁၇) ရက်မှာ ရှမ်းယူနိုက်တက်အသင်းက အိမ်ကွင်းဖြစ်တဲ့ တောင်ကြီးကွင်းမှာ သစ္စာအားမာန်အသင်း၊ ရန်ကုန်ယူနိုက်တက်အသင်းက သန်လျင်သီဟဒီပကွင်းမှာ ဧရာဝတီယူနိုက်တက်အသင်းတို့နဲ့ ဆက်လက်ယှဥ်ပြိုင်ကစားကြမှာဖြစ်ပါတယ်။
ရှမ်းယူနိုက်တက်အသင်းက MNL အမှတ်ပေးချန်ပီယံဆုကို ၂၀၁၉ ရာသီကစလို့ (၅) ရာသီဆက်တိုက် ဆွတ်ခူးရရှိထားပြီး ရန်ကုန်ယူနိုက်တက်အသင်းကတော့ ၂၀၁၈ ရာသီက ချန်ပီယံဆု နောက်ဆုံးရရှိထားတာကြောင့် ချန်ပီယံဆုနဲ့ ဝေးနေတာ (၅) ရာသီရှိသွားခဲ့ပြီဖြစ်ပါတယ်။
