ရုပ်ရှင်ထူးချွန်ဆုချီးမြှင့်ပွဲ ဖေဖော်ဝါရီ ၇ ရက်နေ့မှာ ကျင်းပမှာဖြစ်ပြီး အကယ်ဒမီအတွက် ဇာတ်ကားလေးကား တစ်ပြေးနေ
၂၀၂၅ ခုနှစ်အတွက် မြန်မာ့ရုပ်ရှင် ထူးချွန်ဆုချီးမြှင့်ပွဲကို လာမယ့် ဖေဖော်ဝါရီလ ၇ ရက်နေ့မှာ နေပြည်တော်ရှိ မြန်မာအပြည်ပြည် ဆိုင်ရာ ကွန်ဗင်းရှင်းဗဟိုဌာန - ၁ (MICC-1) မှာ ကျင်းပသွားမှာဖြစ်တယ်လို့ မြန်မာ့ရုပ်ရှင်ထူးချွန်ဆု ချီးမြှင့်ပွဲအခမ်းအနား ကျင်းပရေး ဦးစီးကော်မတီဥက္ကဋ္ဌ ပြန်ကြားရေးဝန်ကြီးဌာန၊ ပြည်ထောင်စုဝန်ကြီး ဦးမောင်မောင်အုန်းက ပြောပါတယ်။
မနေ့ ဇန်နဝါရီ ၇ ရက်က နေပြည်တော်ရှိ ပြန်ကြားရေးဝန်ကြီးဌာန အစည်းအဝေးခန်းမမှာ ကျင်းပပြုလုပ်တဲ့ ၂၀၂၅ ခုနှစ်အတွက် မြန်မာ့ရုပ်ရှင်ထူးချွန်ဆု ချီးမြှင့်ပွဲအခမ်းအနား ကျင်းပရေး ဦးစီးကော်မတီ လုပ်ငန်းညှိနှိုင်း အစည်းအဝေးမှာ ပြောကြားခဲ့တာ ဖြစ်ပါတယ်။
“၂၀၂၅ ခုနှစ်အတွင်း ရုံတင်ဇာတ်ကားတွေထဲက ရွေးချယ်ထားတဲ့ ဆန်ခါတင် ဇာတ်ကားတွေကို ဆုရွေးချယ်ရေး ဆပ်ကော်မတီက အသေးစိတ်ကြည့်ရှု စစ်ဆေးနေပြီဖြစ်ပါတယ်” လို့ ဦးမောင်မောင်အုန်းက ပြောပါတယ်။
အခမ်းအနား ပြင်ဆင်ရေးအတွက် Forever Group Company Limited နဲ့ ပေါင်းစပ်ပြီး ပြီးခဲ့တဲ့ နှစ်တွေကထက် ပိုမိုကောင်းမွန်အောင် ဆောင်ရွက်သွားမှာ ဖြစ်တယ်လို့ ဆိုပါတယ်။
အကယ်ဒမီ ထူးချွန်ဆုတွေ ချီးမြှင့်နိုင်ဖို့အတွက် ၂၀၂၅ ခုနှစ်မှာ ပြသခဲ့တဲ့ ရုပ်ရှင် ဇာတ်ကားပေါင်း ၇၂ ကားကို ပြီးခဲ့တဲ့ ၂၀၂၅ ခုနှစ်၊ နိုဝင်ဘာလ ၂၈ ရက်မှ စတင်ကာ စိစစ်ကြည့်ရှု အကဲဖြတ်ခဲ့တာ ဖြစ်တယ်လို့ မြန်မာနိုင်ငံ ရုပ်ရှင်အစည်းအရုံးက သိရပါတယ်။
အဲဒီလို စိစစ်အကဲဖြတ်နိုင်ဖို့ အကဲဖြတ်အဖွဲ့ကို ဖွဲ့စည်းထားပြီး ပထမအဆင့် အကဲဖြတ်မှုကို အရင်နှစ်နဲ့မတူဘဲ အကယ်ဒမီရပြီးသား ဝါရင့်အနုပညာရှင်၊အတတ်ပညာရှင်တွေရဲ့ အကဲဖြတ်မှုကို လိုချင်တဲ့အတွက် ဖိတ်ခေါ်ကာ လူဦးရေ အကန့်သတ်မရှိ အကဲဖြတ်နေကြတယ်လို့ သိရပါတယ်။
ဒါနဲ့ပတ်သက်လို့ မြန်မာနိုင်ငံ ရုပ်ရှင်အစည်းအရုံး ဒုတိယဥက္ကဋ္ဌ ဦးအေးကြူလေးက “စိစစ်အကဲဖြတ်မှုနဲ့ ပတ်သက်လို့ ကျန်တဲ့အဖွဲ့တွေက မပြောဘူး။ ခဏခဏ ပြဿနာတက်လို့။ အခု ဒုတိယအဆင့် ကြည့်နေတယ်။ အဲဒီအထိပဲ ပြောလို့ရမယ်” လို့ ပြောပါတယ်။
လက်ရှိမှာတော့ ၂၀၂၅ ခုနှစ်မှာ ပြသခဲ့တဲ့ ဇာတ်ကား ၇၂ ကားထဲက ထူးချွန်ဆု ချီးမြှင့်ပွဲအတွက် အကယ်ဒမီ ဆန်ခါတင်စာရင်းဝင် ရုပ်ရှင်ဇာတ်ကား ၂၁ ကားကို ဒုတိယအကြိမ် ပြန်လည်ကြည့်ရှုမှုတွေ စတင်နေတာ ဖြစ်တယ်လို့ သိရပါတယ်။
၂၀၂၅ ခုနှစ်အတွက် တစ်ပြေးနေတဲ့ ရုပ်ရှင်ဇာတ်ကားတွေကတော့ နတ်ဝင်သည်၊ မြေစာ၊ မြစ်လက်တက်ပေမယ့် ရေစီးကကြမ်းတယ်၊ ပန်းမြိုင်လယ်မှ ဥယျာဉ်မှူး စတဲ့ ဇာတ်ကားတွေဖြစ်ပြီး အမျိုးသား ဇာတ်ဆောင်ဆုအတွက် နေတိုး၊ မြင့်မြတ်၊ အလင်းရောင်၊ နေဝင်း၊ အမျိုးသမီး ဇာတ်ဆောင်ဆုအတွက် ဖွေးဖွေး၊ ဝတ်မှုံရွှေရည်၊ ခင်ဝင့်ဝါ၊ ရတနာဗိုတို့က ရေပန်းစားနေတာကို တွေ့ရပါတယ်။
ပြီးခဲ့တဲ့ ၂၀၂၄ ခုနှစ်အတွက် မြန်မာ့ရုပ်ရှင် ထူးချွန်ဆုတွေ ပေးအပ် ချီးမြှင့်ခဲ့ရာမှာ ရုပ်ရှင်တသက်တာဆု သုံးဆု၊ အထူးဆု တဆု အပါအဝင် အကယ်ဒမီဆု စုစုပေါင်း ၂၀ ဆု ချီးမြှင့်ပေးအပ်ခဲ့တယ်လို့ သိရပါတယ်။
အဲဒီ ၂၀၂၄ ခုနှစ်မှာ ရုံတင်ပြသခဲ့တဲ့ မြန်မာ့ရုပ်ရှင်ဇာတ်ကား ၄၉ ကား ရှိခဲ့ပြီး အဲဒီ ဇာတ်ကားတွေထဲက ၁၈ ကားကို မြန်မာ့ရုပ်ရှင် စိစစ်အကဲဖြတ်ရေးအဖွဲ့က စိစစ် ရွေးချယ်ခဲ့ခြင်း ဖြစ်တယ်လို့ သိရပါတယ်။
