ဆန်းတို့စ်နှင့် စာချုပ်သက်တမ်းတိုးချုပ်ဆိုလာတဲ့ ဘရာဇီးစူပါစတားနေမာ
=======================
ဘရာဇီးစူပါစတားနေမာဟာ ၂၀၂၆ ခုနှစ် နှစ်ကုန်အထိ ဆန်းတို့စ်နှင့် စာချုပ်သစ်ချုပ်ဆိုလာပါတယ်။
အသက် ၃၃ နှစ်ရှိ နေမာဟာ ၂၀၂၅ ခုနှစ် ဇန်နဝါရီလတွင် ကစားသမားဘဝစတင်ရာ ဆန်းတို့စ်သို့ ရောက်လာခဲ့သူ ဖြစ်ပြီး ၂၀၂၆ ကမ္ဘာ့ဖလားပြိုင်ပွဲဝင် ဘရာဇီးအသင်းနှင့် ပါဝင်ရန် ရည်မှန်းနေသူလည်း ဖြစ်ပါတယ်။
သူဟာ ဒဏ်ရာပြဿနာများကြောင့် ၂၀၂၃ ခုနှစ်ကတည်းက ဘရာဇီးအတွက် ကစားခွင့်မရလာခဲ့သူ ဖြစ်ပါတယ်။
ဘာစီလိုနာနှင့် ပီအက်စ်ဂျီစူပါစတားဟောင်းဟာ ပြီးခဲ့တဲ့ ၂၀၂၅ ခုနှစ်နှောင်းပိုင်းတုန်းက ဒဏ်ရာပြဿနာရှိနေလင့်ကစား ဆန်းတို့စ်အတွက် ကစားကာ နောက်ဆုံး ၅ ပွဲတွင် ၅ ဂိုးသွင်းကာ တန်းမဆင်းရရေး အဓိကနေရာမှ ကူညီပေးခဲ့သူလည်း ဖြစ်ပါတယ်။
ယင်းနောက် သူဟာ ရာသီအကုန်တွင် ဘယ်ဖက်ဒူးဒဏ်ရာကို ခွဲစိတ်ကုသမှု ခံယူခဲ့ရပါတယ်။ ဒါပေမယ့် သူဟာ ၂၀၂၆ ရာသီသစ်တွင် ဆန်းတို့စ်အတွက် အကောင်းဆုံးကစားကာ ဘရာဇီးနည်းပြကာလိုအန်ဆယ်လော့တီရဲ့ ကမ္ဘာ့ဖလားစီမံကိန်းတွင် ပါဝင်ရန် မျှော်လင့်နေပြီလည်း ဖြစ်ပါတယ်။
နေမာက "ဆန်းတို့စ်က ကျွန်တော့်နေရာပါ။ ကျွန်တော့်အိမ်ပါ။ လိုအပ်နေသေးတဲ့ အိပ်မက်တွေ ဖြစ်လာဖို့ ဒီမှာပဲ ရချင်တယ်"လို့ ပြောကြားသွားပါတယ်။
အောက်တိုဘာလတုန်းက ဘရာဇီးနည်းပြအန်ဆယ်လော့တီက ၇၉ ဂိုးဖြင့် ဘရာဇီးသမိုင်းတွင် ဂိုးအများဆုံးသွင်းယူသူအဖြစ် ရပ်တည်နေတဲ့ နေမာအနေဖြင့် ဘရာဇီးအသင်းတွင် ပြန်လည်ရွေးချယ်ခြင်းခံရရန် ကြံ့ခိုင်မှုပြည့်ဝနေရန် လိုအပ်ကြောင်း ပြောကြားထားပါတယ်။
နေမာဟာ ၂၀၂၃ ခုနှစ် အောက်တိုဘာလတုန်းက ဘရာဇီးအတွက် ကစားစဉ် ဒူးအရွတ်ဒဏ်ရာရရှိကာ ၁၂ လတိုင်တိုင် အနားယူခဲ့ရသူဖြစ်ပြီး ပြီးခဲ့တဲ့နှစ်တွင်မှ ပြန်လည်ကစားလာနိုင်ခဲ့တာပါ။
သူဟာ ပြီးခဲ့တဲ့နှစ်တုန်းက ဘရာဇီးအသင်းတွင် ပြန်လည်ရွေးချယ်ခံခဲ့ရပေမယ့်လည်း ကြွက်သားဒဏ်ရာကြောင့် နုတ်ထွက်ခဲ့ရပါတယ်။
ဘရာဇီးဟာ ၂၀၂၆ ကမ္ဘာ့ဖလားအုပ်စုအတွင်းတွင် အုပ်စု(ဂ)တွင် စကော့တလန်၊ မော်ရိုကို၊ ဟေတီတို့နှင့် တစ်အုပ်စုတည်း ကျရောက်နေပါတယ်။
