ဆာအဲလက်စ်ဖာဂူဆန်နှင့် စကားပြောပြီးမှ ယူနိုက်တက်ယာယီနည်းပြရာထူးကို ရယူခဲ့ခြင်းဖြစ်ကြောင်း ဖလက်ချာဖွင့်ဟလာ
======================

ဒါရင်းဖလက်ချာက ယူနိုက်တက်ဂန္ထဝင်နည်းပြဆာအဲလက်စ်ဖာဂူဆန်နှင့် စကားပြောဆွေးနွေးပြီးမှ ယူနိုက်တက်ယာယီနည်းပြရာထူးကို လက်ခံခဲ့ခြင်းဖြစ်ကြောင်း ဖွင့်ဟ ပြောကြားလာပါတယ်။

ဖလက်ချာဟာ ရူဘင်အမိုရမ် ထုတ်ပယ်ခြင်းခံရပြီးနောက် ယနေ့ည ဘန်လေနှင့် ပရီးမီးယားလိဂ်အဝေးကွင်းပွဲစဉ်အား ယာယီနည်းပြအဖြစ် ကြီးကြပ်လာမှာ ဖြစ်ပြီး တနင်္ဂနွေနေ့ ဘရိုက်တန်နှင့် အက်ဖ်အေဖလားတတိယအဆင့်ပွဲစဉ်ကိုလည်း ကြီးကြပ်လာမယ်လို့ ယူဆရပါတယ်။

ဖလက်ချာဟာ ယူနိုက်တက်ယူ-၂၁ အသင်းကို ကိုင်တွယ်နေသူ ဖြစ်ပြီး ဖာဂူဆန်နှင့် ဆွေးနွေးစကားပြောပြီးမှ ယူနိုက်တက်ယာယီနည်းပြရာထူးကို လက်ခံခဲ့တာပါ။ အသက် ၈၄ နှစ်ရှိ ဖာဂူဆန်ဟာ အမိုရမ်ရဲ့ နောက်ဆုံးပွဲဖြစ်တဲ့ လိဒ်နှင့် တစ်ဂိုးစီသရေကျတဲ့ပွဲကိုလည်း ကိုယ်တိုင်တက်ရောက်ကြည့်ရှုခဲ့သူ ဖြစ်ပါတယ်။

အသက် ၄၁ နှစ်ရှိ ဖလက်ချာက "ဆာအဲလက်စ်နဲ့ စကားမပြောဘဲ အရေးကြီးတဲ့ ဆုံးဖြတ်ချက်မချပါဘူး။ ဆာအဲလက်စ်နဲ့ အရမ်းကောင်းတဲ့ ဆက်ဆံရေး ရှိပါတယ်။ ပထမဆုံး သူနဲ့ပဲ စကားပြောချင်တယ်။ သူ့ရဲ့ကောင်းချီရယူတယ်။ လေးစားမှုနဲ့ သူ ထိုက်တန်တယ်လို့ ထင်ပါတယ်။ သူ့ဆီက အကြံဉာဏ်နဲ့ပဲ သွားချင်တယ်။ သူ့စကားသံတွေ ကျွန်တော့်အတွေးထဲမှာ ရိုက်ခတ်နေတယ်။ ကလပ်ရဲ့ ဝန်ထမ်းတစ်ဦးဖြစ်နေတဲ့အချိန်မှာ မန်ချက်စတာယူနိုက်တက်အတွက် အကောင်းဆုံးလုပ်ပေးဖို့က ကိုယ့်အလုပ်ပါ။ နေ့တိုင်း ကျွန်တော် တခုခု လုပ်တယ်၊ ရှင်သန်တယ်၊ ယုံကြည်တယ်။ ဒီလိုပြောရလို့ သူ့အတွက်ရော ကျွန်တော့်အတွက်ပါ နှစ်သိမ့်မှုရပါတယ်"လို့ ပြောကြားသွားပါတယ်။

ရူဘင်အမိုရမ်ဟာ လိဒ်နှင့်ပွဲအပြီး သတင်းစာရှင်းလင်းပွဲတွင် ၎င်းမှာ နည်းပြမဟုတ်ဘဲ မန်နေဂျာတစ်ဦးအဖြစ် တာဝန်ထမ်းဆောင်ရန် ယူနိုက်တက်သို့ ရောက်လာခြင်း ဖြစ်ကြောင်း ပြောကြားကာ ဘုတ်အဖွဲ့အား စိန်ခေါ်မှု ပြုလုပ်ခဲ့ပါတယ်။ ဒါ့အပြင် အမိုရမ်က ယူနိုက်တက်စီနီယာဝန်ထမ်းများမှာ ဂယ်ရီနဗီးလ်အပါအဝင် ဘောလုံးဝေဖန်ရေးသမားများအဖြစ် အလုပ်လုပ်နေကြတဲ့ ကစားသမားဟောင်းများရဲ့ အသံကို ပိုမိုအာရုံစိုက်ကြောင်းလည်း ပြောဆိုခဲ့ပါသေးတယ်။

ဒါရင်းဖလက်ချာဟာ ယူနိုက်တက်ကစားသမားဟောင်းများနှင့် အတူ တွဲကစားလာခဲ့တဲ့ သူ ဖြစ်တဲ့အပြင် ယခုတိုင် ခင်မင်နေကြဆဲ ဖြစ်ပါတယ်။

ဆက်လက်ပြီး ဖလက်ချာက "သူတို့ကို လေသံလျှော့ဖို့ ပြောလို့ မရပါဘူး။ သူတို့က အရမ်းစိတ်အားထက်သန်တဲ့သူတွေပါ။ သတို့မှာလည်း ကိုယ်ပိုင်အမြင်ရှိတယ်။ ပြီးတော့ သူတို့က အရမ်းကောင်းကြတယ်။ သူတို့မှာ အချိတ်အဆက်ရှိတယ်။ သူတို့ပြောတာကောင်းပါတယ်။ သူတို့ ပြောတာ ကောင်းကောင်းနားထောင်တယ်။ သူတို့နဲ့ အဝတ်အစားလဲခန်းမှာ နှစ်အကြာကြီးနေလာခဲ့တာပါ။ အတူတူထိုင်လာတာပါ။ အားလုံးကို သင့်ယူခဲ့တယ်။ ဒီကစားသမားတွေက အားလုံး အောင်မြင်ခဲ့တော့ အပြင်က ဆူညံသံကို ကိုင်တွယ်ဖို့က အရမ်းခက်တယ်။ သူတို့ အောင်မြင်မှုတွေ အများကြီးရခဲ့တယ်။ ဆုဖလားတွေ ရခဲ့တယ်။ သူတို့မှာ ဆုဖလားတွေ စားပွဲအပြည့်ရှိတော့ ပြန်ဝေဖန်ဖို့ ခက်တယ်။ ဒါပေမယ့် မန်ချက်စတာယူနိုက်တက်ကစားသမားဆိုတာ ဒီကနေ သင်ယူရပါမယ်၊ စိန်ခေါ်မှုနဲ့ အသားကျရပါမယ်"လို့ ပြောကြားသွားပါတယ်။

ဒါ့အပြင် ဒါရင်းဖလက်ချာက အချိန်များစွာ မရှိမှုနှင့်အတူ ကစားသမားများနှင့် တစ်ဦးချင်း စကားမပြောဖြစ်သေးကြောင်းလည်း ဆိုသွားပါတယ်။

ဒါပေမယ့် သူဟာ အသင်းခေါင်းဆောင်ဘရူနိုဖာနန်ဒက်စ်၊ ကစားသမားသစ်များဖြစ်ကြတဲ့ ဘင်ဂျာမင်ဆက်စ်ကို၊ မားသီးယပ်စ်ကန်ညာတို့နှင့်မူ စကားပြောခဲ့ပြီး ဖြစ်ပါတယ်။

ဒါရင်းဖလက်ချာဟာ ၁၉၉၅ ခုနှစ်တွင် အသက် ၁၁ နှစ်အရွယ်မှာ ဆဲလ်တစ်မှ ယူနိုက်တက်သို့ ရောက်လာပြီးနောက် ပွဲပေါင်းသုံးရာကျော်ကစားပေးခဲ့ကာ ပရီးမီးယားလိဂ်ဖလား ၅ ကြိမ်၊ ကွန်မြူနတီဒိုင်း ၃ ကြိမ်၊ ချန်ပီယံလိဂ်ဖလား၊ လိဂ်ဖလား၊ အက်ဖ်အေဖလားနှင့် ကလပ်ကမ္ဘာ့ဖလားတို့လည်း ဆွတ်ခူးခဲ့ပါတယ်။