ပေါင်သန်း ၅၀ တန်ဖိုးရှိ ကိုယ်ပိုင်လေယာဉ်၊ Batcopter နှင့် Batmobile တို့ကို နေမာပြသလာ
====================

နေမာဟာ ပေါင် ၁.၃ သန်းတန်ဖိုးရှိ Batmobile ကို ဝယ်ယူလိုက်ပြီး အိပ်မက်တစ်ခုကို အကောင်အထည်ဖော်လိုက်နိုင်ပြီ ဖြစ်ပါတယ်။

အသက် ၃၃ နှစ်ရှိ ဘရာဇီးစူပါစတားဟာ ကိုယ်ပိုင်ဂျက်လေယာဉ်၊ Batcopter ၊Batmobile တို့နှင့် တွဲရိုက်ကူးထားတဲ့ ဓာတ်ပုံအား အင်စတာဂရမ်တွင် တင်လာတာလည်း ဖြစ်ပါတယ်။

Batmobile ကို လူ ၅၀ ပါ အဖွဲ့တစ်ခုက သုံးနှစ်အထိ အချိန်ယူတည်ဆောက်ခဲ့ရတာ ဖြစ်ပါတယ်။ ယင်းကားကို ဆာအိုပေါ်လိုအနီး Dream Car Museum မှ နေမာရဲ့ ကားဂိုထောင်သို့ ပြောင်းရွှေ့လာပြီလည်း ဖြစ်ပါတယ်။

နေမာဟာ Batmobile ကို ဝယ်ယူလိုက်ပြီ ဖြစ်ပေမယ့် ယင်းကားကို အများသူငါ အသုံးပြုတဲ့ လမ်းမှာ မောင်းနှင်နိုင်ခွင့် မရှိပါဘူး။

ဘရာဇီးသမိုင်းတွင် ဂိုးအများဆုံးသွင်းယူသူအဖြစ် ရပ်တည်နေတဲ့ နေမာဟာ Batman အမာခံပရိသတ်တစ်ဦးဖြစ်ပြီး ၂၀၂၂ ခုနှစ်ထွက် The Batman ကားအား ပဲရစ်တွင် အထူးပွဲပြသရာသို့ မင်းသားရောဘတ်ပက်တာဆင်၊ ဇိုးခရာဗက်ဇ်တို့နှင့်အတူ တက်ရောက်ကြည့်ရှုခဲ့သူလည်း ဖြစ်ပါတယ်။

နေမာဟာ တန်ဖိုး ပေါင် ၁၀ သန်းဝန်းကျင်ရှိ Batcopter အပြင် ပေါင် ၃၇ သန်းတန်ဖိုးရှိ Dassault Falcon 900LX တို့ကိုလည်း ပြသလာတာဖြစ်ပြီး ယင်းယာဉ်သုံးမျိုးပေါင်းတန်ဖိုးက ပေါင်သန်း ၅၀ နီးပါး ရှိပါတယ်။

နေမာဟာ ပြိုင်ကားစုဆောင်းသူတစ်ဦးဖြစ်ပြီး ပြီးခဲ့တဲ့နှစ်တုန်းကလည်း ပေါင် ၃ သိန်းတန်ဖိုးရှိ Rolls-Royce Ghost ကားကို ဝယ်ယူခဲပါတယ်။

သူဟာ Bentley Continental GT ၊ Aston Martin DBX ၊ Lamborghini Huracan ၊ Mercedes G Wagon နှင့် Maserati MC12 တို့ကိုလည်း ပိုင်ဆိုင်ထားသူ ဖြစ်ပါတယ်။

ဘာစီလိုနာ၊ ပီအက်စ်ဂျီတို့တွင် အောင်မြင်မှုများ ရယူခဲ့တဲ့ နေမာဟာ ဆော်ဒီကလပ် Al Hilal တွင် ကစားစဉ်တုန်းက တစ်ပတ်လုပ်ခ ပေါင် ၂.၅ သန်းအထိ ရရှိကာ တစ်နှစ်ခွဲကြာကစားခဲ့ပါတယ်။

ဒါပေမယ့် သူဟာ တစ်နှစ်ခွဲကြာ ကစားစဉ်အတွင်း ဒဏ်ရာကြောင့် ၇ ပွဲတည်းသာ ကစားနိုင်ခဲ့ပါတယ်။ ဒါပေမယ့် သူဟာ လုပ်ခ ပေါင် ၁၉၃.၈ သန်းအထိ ရရှိခဲ့ပါတယ်။

သူဟာ ၂၀၂၅ ခုနှစ်အစောပိုင်းမှာတော့ လုပ်ခလျှော့ယူကာ အသင်းဟောင်းဆန်းတို့စ်သို့ ပြန်လည်ပြောင်းလာခဲ့ပါတယ်။ သူဟာ ပေါင်သန်း ၃၃၀ ကြွယ်ဝချမ်းသာသူ ဖြစ်ပါတယ်။