၂၀၂၅ ခုနှစ်၊ ဒီဇင်ဘာ နောက်ဆုံးပတ်တွင် ရင်းနှီးမြှုပ်နှံမှုလုပ်ငန်း (၆) ခုကို ရန်ကုန်တိုင်းရင်းနှီးမြှုပ်နှံမှုကော်မတီကခွင့်ပြုပေးခဲ့
ရန်ကုန်တိုင်းအတွင်း၌ ရင်းနှီးမြှုပ်နှံမှုများပြုလုပ်မည့် ရင်းနှီးမြှုပ်နှံမှုလုပ်ငန်း (၆) ခုကို ၂၀၂၅ ခုနှစ်၊ ဒီဇင်ဘာ ၃၀ ရက်ကပြုလုပ်သည့် ရန်ကုန်တိုင်းရင်းနှီးမြှုပ်နှံမှုကော်မတီ၏ (၁၂/၂၀၂၅) ကြိမ်မြောက်အစည်းအဝေးမှခွင့်ပြုပေးခဲ့ကြောင်း သိရသည်။
ဟိုတယ်နှင့် ခရီးသွားလာရေးကဏ္ဍတွင် ရာနှုန်းပြည့် မြန်မာနိုင်ငံသားရင်းနှီးမြှုပ်နှံမှုလုပ်ငန်း (၁) ခု၊ စက်မှုကဏ္ဍတွင် ရာနှုန်းပြည့်မြန်မာနိုင်ငံသားရင်းနှီးမြှုပ်နှံမှုလုပ်ငန်း (၂) ခု၊ ရာနှုန်းပြည့် နိုင်ငံခြားရင်းနှီးမြှုပ်နှံမှုလုပ်ငန်း (၂) ခုနှင့် အခြားဝန်ဆောင်မှုကဏ္ဍတွင် ဖက်စပ်နိုင်ငံခြားရင်းနှီးမြှုပ်နှံမှုလုပ်ငန်း (၁)ခုတို့ကိုခွင့်ပြုပေးခဲ့ခြင်းဖြစ်ကြောင်း သိရသည်။
၎င်းတို့သည် ဆောက်လုပ်ရေးလုပ်ငန်းသုံးပစ္စည်းများထုတ်လုပ်၍ (၁၀၀) ရာခိုင်နှုန်း ပြည်တွင်း၌ရောင်းချခြင်းလုပ်ငန်း၊ ဆန်ကြိတ်ခွဲ၍ ပြည်ပသို့ (၉ဝ ဒသမ ၇၄) ရာခိုင်နှုန်းတင်ပို့၍ ပြည်တွင်း၌ (၉ ဒသမ ၂၆) ရာခိုင်နှုန်းထုတ်လုပ်တင်ပို့ရောင်းချခြင်းလုပ်ငန်း၊ လယ်ယာထွက်သီးနှံများအား တန်ဖိုးမြှင့်တင်ထုတ်လုပ်ပြီး (၁၀၀) ရာခိုင်နှုန်း ပြည်ပသို့တင်ပို့ခြင်းလုပ်ငန်း၊ Recycle Metal scraps Product အမျိုးမျိုးအားခွဲခြားထုတ်ပိုး၍ (၁၀၀) ရာခိုင်နှုန်း ပြည်ပသို့တင်ပို့ခြင်းလုပ်ငန်း၊ SKD စနစ်ဖြင့် လောင်စာဆီသုံး (၂) ဘီး၊ (၃) ဘီး မော်တော်ဆိုင်ကယ်အမျိုးမျိုးတပ်ဆင်ခြင်း၊ ထုတ်လုပ်ခြင်းနှင့် ပြည်တွင်း၌ (၁၀၀) ရာခိုင်နှုန်း ဖြန့်ဖြူးရောင်းချခြင်းလုပ်ငန်းနှင့် ဟိုတယ်ဝန်ဆောင်မှုလုပ်ငန်းတို့ကိုလုပ်ဆောင်သွားကြမည်ဖြစ်ကြောင်း သိရသည်။
အဆိုပါ ရင်းနှီးမြှုပ်နှံမှုလုပ်ငန်းများ၏ မတည်ငွေရင်းပမာဏမှာ ငွေကျပ် (၉,၅၆၄ ဒသမ ၀၂၀) သန်းနှင့် အမေရိကန်ဒေါ်လာ (၄ ဒသမ ၉၈၈) သန်းတို့ဖြစ်ပြီး ပြည်တွင်းအလုပ်အကိုင်အခွင့်အလမ်း (၄၁၅) ဦးအတွက် အလုပ်အကိုင်များဖန်တီးပေးနိုင်မည်ဖြစ်ကြောင်း သိရသည်။
ထို့အတူ အစည်းအဝေး၌ ပြည်တွင်းဝန်ထမ်း (၄၃၀) ဦး တိုးမြှင့်ခန့်ထားခွင့်တင်ပြလာသည့်လုပ်ငန်း (၁) ခုအပါ အဝင် အထွေထွေကိစ္စများတင်ပြလာသည့် ကုမ္ပဏီ (၁၇) ခု၏ တင်ပြချက်များကိုလည်းဆွေးနွေးဆုံးဖြတ်ခဲ့ကြကြောင်း သိရသည်။
