ရူဘင်အမိုရမ်အား ထုတ်ပယ်လိုက်မှုအပေါ် ယူနိုက်တက်ကစားသမားများ မပျော်မရွှင်ဖြစ်နေ
=====================
ယူနိုက်တက်ကစားသမားအများစုဟာ ရူဘင်အမိုရမ်အား ထုတ်ပယ်လိုက်မှုအပေါ် မပျော်မရွှင် ဖြစ်နေကြပါတယ်။
ယူနိုက်တက်သတင်းအရင်းအမြစ်အရ အမိုရမ်ဟာ ကစားသမားများအကြား ရေပန်းစားသူ ဖြစ်ပြီး ကစားသမားအများစုရဲ့ ထောက်ခံအားပေးမှု ရရှိထားခဲ့သူလည်း ဖြစ်ပါတယ်။
ယူနိုက်တက်ကစားသမားများဟာ တနင်္လာနေ့ နံနက်ပိုင်းတွင် အမိုရမ်အား ထုတ်ပယ်လိုက်ကြောင်း သတင်းပေးခြင်းခံခဲ့ရပါတယ်။ ဒါပေမယ့် ကစားသမားများမှာ အမိုရမ်မှာ ထုတ်ပယ်ခြင်းခံရလိမ့်မယ်လို့ ယူဆထားကြပြီး ဖြစ်ပါတယ်။
ရူဘင်အမိုရမ်ဟာ လိဒ်နှင့် ၁ ဂိုးစီသရေကျတဲ့ပွဲအပြီး သတင်းစာရှင်းလင်းပွဲတွင် ၎င်းမှာ နည်းပြမဟုတ်ဘဲ မန်နေဂျာအဖြစ် တာဝန်ထမ်းဆောင်နေခြင်း ဖြစ်ကြောင်း ပြောကြားကာ ဘုတ်အဖွဲ့အား တိုက်ခိုက် ပြောဆိုခဲ့ပါတယ်။
အမိုရမ်အား ထုတ်ပယ်လိုက်ပြီးချိန်တွင် ယူနိုက်တက်ကစားသမားများဟာ ပေါ်တူဂီလူမျိုးနည်းပြအတွက် စိတ်မကောင်းဖြစ်ရကြောင်း ဆိုရှယ်မီဒီယာတွင် ပို့စ်တင်လာကြပါတယ်။
ပက်ထရစ်ဒေါ်ဂူနှင့် ဘင်ဂျာမင်ဆက်စ်ကိုတို့ဟာ အမိုရမ်ရဲ့ လူသိရှင်ကြား ဝေဖန်မှု ခံခဲ့ရပေမယ့်လည်း အနာဂတ်တွင် အကောင်းဆုံးဖြစ်ပါစေ ဆုမွန်ကောင်းတောင်းပေးခဲ့ကြပါတယ်။
ဒေါ်ဂူနှင့် ဆက်စ်ကိုတို့ဟာ အမိုရမ်ရဲ့ မီးစိမ်းပြမှုကြောင့် ယူနိုက်တက်သို့ ရောက်လာကြသူများ ဖြစ်ပါတယ်။
၎င်းတို့အပြင် ဒီယေဂိုဒါလော့၊ ဟယ်ရီမက်ဂွိုင်းယား၊ မားသီးယပ်စ်ဒီလက်၊ ဘရိုင်ယန်အမ်ဘူမို၊ မေဆင်မောင့်၊ ဘရူနိုဖာနန်ဒက်စ်၊ ဂျိုရှာဇတ်ဇီးတို့ကလည်း အမိုရမ်အား ကျေးဇူးတင်ကြောင်း အင်စတာဂရမ်တွင် ပို့စ်တင်ခဲ့ကြပါတယ်။
၂၀၁၈ ခုနှစ် ဒီဇင်ဘာလတုန်းက မော်ရင်ဟို ထုတ်ပယ်ခြင်းခံရတုန်းက ယူနိုက်တက်ကစားသမား ၄ ဦးတည်းသာ ကျေးဇူးတင်ကြောင်း လူသိရှင်ကြား ပို့စ်တင်ခဲ့ကြပါတယ်။
ယူနိုက်တက်ဟာ နည်းပြသစ် ရှာဖွေနေစဉ်အတွင်း ယူ-၂၁ အသင်းနည်းပြဒါရင်းဖလက်ချာကို ယာယီနည်းပြအဖြစ် ခန့်အပ်ထားပါတယ်။
ဒါရင်းဖလက်ချာဟာ ဗုဒ္ဓဟူးနေ့ ဘန်လေအား အဝေးကွင်းသို့ သွားရောက် ရင်ဆိုင်ရမယ့်ပွဲစဉ်တွင် ယူနိုက်တက်အား စတင်ကြီးကြပ်လာပါမယ်။
အမိုရမ်ဟာ ယူနိုက်တက်နည်းပြရာထူးမှ ထုတ်ပယ်ခြင်းခံရပြီးနောက် ချီရှိုင်းယားရှိ နေအိမ်အနီးတွင် ဇနီးသည်နှင့်အတူ ပျော်ရွှင်စွာ လမ်းလျှောက်နေတာ တွေ့ရပါတယ်။
ယူနိုက်တက်ဟာ အမိုရမ်အား ထုတ်ပယ်လိုက်မှုအတွက် ပေါင်သန်း ၃၀ ဝန်းကျင်အထိ ကုန်ကျလာပါမယ်။
