အမေရိကန်၏ ဗင်နီဇွဲလားအပေါ် လုပ်ဆောင်ချက်များကို “အလွန်အမင်း စိုးရိမ်ထိတ်လန့်မိကြောင်း” ဂူတာရက်စ်ပြောကြား
အမေရိကန်နှင့် ဗင်နီဇွဲလားနိုင်ငံတို့အကြား မကြာသေးမီလများအတွင်း ဖြစ်ပွားခဲ့သော တင်းမာမှုများသည် စနေနေ့နံနက်ပိုင်းတွင် သမ္မတ နီကိုးလက်စ် မာဒူရိုကို အမေရိကန်အထူးတပ်ဖွဲ့များက ဖမ်းဆီးလိုက်ခြင်းဖြင့် အထွတ်အထိပ်သို့ ရောက်ရှိသွားသည့်အပေါ် ကုလသမဂ္ဂ အထွေထွေအတွင်းရေးမှူးချုပ် အန်တိုနီယို ဂူတာရက်စ်က “အလွန်အမင်း စိုးရိမ်ထိတ်လန့်မိကြောင်း” ပြောကြားခဲ့သည်။
သမ္မတ ဒေါ်နယ်ထရမ့်ကမူ "အမေရိကန်ပြည်ထောင်စုသည် ဗင်နီဇွဲလားနိုင်ငံကို အနည်းဆုံး ယာယီအားဖြင့် စီမံအုပ်ချုပ်သွားမည်ဖြစ်ပြီး နိုင်ငံ၏ များပြားလှသော ရေနံသိုက်များကို ထုတ်ယူကာ အခြားနိုင်ငံများသို့ ရောင်းချသွားမည်ဖြစ်ကြောင်း" ဆိုသည်။ ဗင်နီဇွဲလား၏ ခေါင်းဆောင်မဲ့ဖြစ်နေသော အခြေအနေကို အသုံးချကာ နိုင်ငံ၏ ရေနံအခြေခံအဆောက်အအုံများကို "ပြုပြင်" သွားမည်ဖြစ်ပြီး အခြားနိုင်ငံများသို့ ရေနံ "အမြောက်အမြား" ရောင်းချသွားမည်ဟုလည်း ထရမ့်ကဆိုခဲ့သည်။
ဗင်နီဇွဲလားအစိုးရကမူ ဤလုပ်ရပ်သည် အမေရိကန်၏ “အလွန်ပြင်းထန်သော စစ်ရေးကျူးကျော်မှု” ဖြစ်ကြောင်း ပြစ်တင်ရှုတ်ချခဲ့သည်။
ဗင်နီဇွဲလား ဒုတိယသမ္မတ မစ္စ ဒဲလ်စီ ရိုဒရီဂွက်ဇ်ကလည်း မာဒူရိုကို ပြန်လွှတ်ပေးရန် အမေရိကန်ထံသူ၏ မိန့်ခွန်းမှတစ်ဆင့် တောင်းဆိုခဲ့ပြီး မာဒူရိုသည်သာ နိုင်ငံ၏ တရားဝင်ခေါင်းဆောင်ဖြစ်ကြောင်း ပြောကြားခဲ့သည်။ သို့သော်လည်း နောက်ပိုင်းတွင် ဗင်နီဇွဲလား တရားရုံးချုပ်က သူမအား ယာယီသမ္မတအဖြစ် တာဝန်ယူရန် အမိန့်ထုတ်ပြန်ခဲ့သည်။
ဥပဒေရေးရာကျွမ်းကျင်သူများက ဤစစ်ဆင်ရေးသည် ဥပဒေနှင့်ညီညွတ်ခြင်းရှိမရှိအပေါ် မေးခွန်းများ ချက်ချင်းထုတ်လာခဲ့ကြသည်။
