ယူနိုက်တက်နှင့်ပွဲမတိုင်မီ ဆေးဘက်ဆိုင်ရာအရေးပေါ်ကိစ္စဖြစ်ပြီးနောက် လိဒ်ပရိသတ်တစ်ဦး သေဆုံး
=====================
လိဒ်အသင်းက ယူနိုက်တက်နှင့်ပွဲမတိုင်မီ ဆေးဘက်ဆိုင်ရာ အရေးပေါ်ကိစ္စဖြစ်ပွားခဲ့တဲ့ လိဒ်ပရိသတ်မှာ ကွယ်လွန်သွားခဲ့ပြီ ဖြစ်ကြောင်း အတည်ပြုကြေညာလာပါတယ်။
မနေ့ညက ပွဲစဉ်တွင် လိဒ်ဟာ ဘရန်ဒန်အေရွန်ဆင်ရဲ့ ဂိုးဖြင့် ဦးဆောင်နိုင်ခဲ့ပေမယ့် မားသီးယပ်စ်ကန်ညာက ယူနိုက်တက်အတွက် ချေပဂိုးသွင်းယူကာ တစ်ဂိုးစီသရေဖြင့် ပြီးဆုံးသွားခဲ့ပါတယ်။
ဒါပေမယ့် ယင်းပွဲအပြီး နာရီအနည်းငယ်အကြာမှာတော့ လိဒ်က Elland Road တွင် နေထိုင်မကောင်းဖြစ်ခဲ့တဲ့ ပရိသတ်မှာ ကွယ်လွန်သွားရှာပြီ ဖြစ်ကြောင်း ကြေညာလာပါတယ်။
လိဒ်နှင့် ယူနိုက်တက်ပွဲမတိုင်မီ စနေနေ့တုန်းကလည်း ရှက်ဖီးလ်ယူနိုက်တက်နှင့် လက်စတာတို့ရဲ့ ပွဲစဉ်တွင် ရှက်ဖီးလ်ပရိသတ်တစ်ဦး နေထိုင်မကောင်းဖြစ်ပြီးနောက် ကွယ်လွန်သွားခဲ့ပါသေးတယ်။
ဒါ့အပြင် မနေ့ညက ဖူလ်ဟမ်နှင့် လီဗာပူးပွဲမတိုင်မီ Craven Cottage တွင် ဆေးဘက်ဆိုင်ရာအရေးပေါ်ကိစ္စဖြစ်ပျက်ခဲ့ပြီး ပွဲကို ၁၅ မိနစ်ရွှေ့ဆိုင်းခဲ့ရပါသေးတယ်။
မနေ့ညကပွဲတွင် ယူနိုက်တက်ဟာ လိဒ်ကို တစ်ဂိုးစီသရေကျကစားနိုင်ခဲ့မှုနှင့်အတူ ၂၀၀၂ ခုနှစ် စက်တင်ဘာနောက်ပိုင်းတွင် Elland Road တွင် ရှုံးပွဲမရှိသေးတဲ့ မှတ်တမ်းအား ဆက်ထိန်းထားနိုင်ခဲ့ပါတယ်။
