မန်စီးတီးသို့ ပြောင်းလုနီးပါးဖြစ်နေတဲ့ ဆီမန်ယိုရဲ့ ဘုန်းမောက်အတွက် နောက်ဆုံးပွဲကစားလာခြင်း မဟုတ်ကြောင်း အိုင်ရာအိုလာ ပြောကြားလာ
===================
မန်စီးတီးဟာ အန်တိုနီဆီမန်ယိုကို ပေါင် ၆၅ သန်းဖြင့် ခေါ်ယူရန် ဘုန်းမောက်နှင့် သဘောတူညီမှုရလုနီးပါး ဖြစ်နေပြီ ဖြစ်ပါတယ်။ ဒါပေမယ့် ဘုန်းမောက်နည်းပြအန်ဒိုနီအိုင်ရာအိုလာက တောင်ပံတိုက်စစ်သမားမှာ ဘုန်းမောက်အတွက် နောက်ဆုံးပွဲ ကစားလာခြင်း မဟုတ်ကြောင်း ဆိုလာပါတယ်။
မန်စီးတီးဟာ အသက် ၂၅ နှစ်ရှိ ဂါနာတိုက်စစ်သမားအား ခေါ်ယူရေးအတွက် ပြီးခဲ့တဲ့ ၄၈ နာရီအတွင်း ဆွေးနွေးမှု တိုးတက်မှုများ ရှိနေပြီး အပြောင်းအရွှေ့အပြီးသတ်လုနီးပါး ဖြစ်နေပြီလည်း ဖြစ်ပါတယ်။
မန်စီးတီးဟာ ဆီမန်ယိုကို စာချုပ်အချက်အတိုင်း ပေါင် ၆၅ သန်းပေးရန် အသင့် ရှိနေပြီး ကစားသမားရဲ့ ကိုယ်စားလှယ်များဟာ တနင်္လာနေ့တွင် မန်ချက်စတာသို့ သွားရောက်ကာ ပုဂ္ဂိုလ်ရေးဆိုင်ရာ ဆွေးနွေးမှုများ ပြုလုပ်ခဲ့ပါတယ်။
အင်္ဂါနေ့တွင်လည်း ဆက်လက် ဆွေးနွေးခဲ့ကြပြီး ကြာသပတေးနေ့ အပြောင်းအရွှေ့ဈေးကွက် ဖွင့်လာချိန်တွင် အပြောင်းအရွှေ့အပြီးသတ်ရေး နီးစပ်လာပြီလည်း ဖြစ်ပါတယ်။
တဖက်တွင် ဆီမန်ယိုဟာ မန်စီးတီးသို့ ပြောင်းလုနီးပါး ဖြစ်နေပေမယ့်လည်း မနေ့ညတုန်းက ချဲလ်ဆီးနှင့် ၂ ဂိုးစီသရေကျတဲ့ပွဲတွင် ပွဲချိန်ပြည့်ကစားသွားပါတယ်။ သူကိုယ်တိုင်ကလည်း ဇန်နဝါရီလ ၁ ရက်နေ့တွင် အပြောင်းအရွှေ့အပြီးသတ်လိုနေပါတယ်။
ဒါပေမယ့် နည်းပြအိုင်ရာအိုလာက ဂါနာတောင်ပံတိုက်စစ်သမားမှာ စနေနေ့ အာဆင်နယ်နှင့်ပွဲစဉ်တွင်လည်း ပါဝင်ကစားလာဦးမှာ ဖြစ်ကြောင်း ပြောကြားလာပါတယ်။
ဘုန်းမောက်နည်းပြက "သူက ကျွန်တော်တို့အတွက် အရေးပါတဲ့ကစားသမားပါ။ ကျွန်တော်တို့နဲ့အတူ ဆက်ရှိနေပါဦးမယ်။ ကျွန်တော်တို့အတွက် ကစားတဲ့ နောက်ဆုံးပွဲ မဟုတ်ပါဘူး။ လုံးဝ မဟုတ်ပါဘူး"လို့ ပြောကြားသွားပါတယ်။
ဘုန်းမောက်ဟာ ဆီမန်ယိုအား ပေါင် ၆၅ သန်းဖြင့် ထွက်ခွာနိုင်တဲ့ စာချုပ်ပါအချက် အကြုံးဝင်တဲ့ ဇန်နဝါရီလ ၁၀ ရက်နေ့မတိုင်မီ အာဆင်နယ်၊ စပါးစ်(ဇန်နဝါရီလ ၇ ရက်)ပွဲတို့တွင် အသုံးပြုလိုနေသေးတာပါ။
ဆီမန်ယိုအား ခေါ်ယူရေး လီဗာပူး၊ ယူနိုက်တက်၊ ချဲလ်ဆီးနှင့် စပါးစ်တို့ကလည်း စိတ်ဝင်စားပေမယ့်လည်း ဆီမန်ယိုကိုယ်တိုင်က မန်စီးတီးသို့ ပြောင်းလိုနေခဲ့တာလည်း ဖြစ်ပါတယ်။
ဆီမန်ယိုဟာ ယခုရာသီတွင် ဘုန်းမောက်အတွက် ၉ ဂိုးသွင်းကာ ၃ ကြိမ် ဖန်တီးထားသူ ဖြစ်ပြီး ကလပ်အတွက် ကြီးမားတဲ့ ဆုံးရှုံးမှု ဖြစ်လာဖို့ သေချာနေပါတယ်။
