ထိုင်းနိုင်ငံ အီလက်ထရောနစ် စက်ရုံကအလုပ်သမား ၁၀၀၀ ကျော် ရုတ်တရက် အလုပ်ထုတ်ခံရ
ထိုင်းနိုင်ငံ၊ ဖစ်ဘူရီခရိုင်ရှိ Cal-Comp အီလက်ထရောနစ် စက်ရုံမှာ အလုပ်လုပ်ကိုင်နေတဲ့ မြန်မာအလုပ်သမား ၁၀၀၀ ကျော် ရုတ်တရက် အလုပ်ထုတ်ခံလိုက်ရတယ်လို့ အလုပ်သမားအရေး ဆောင်ရွက်နေသူတွေဆီက သိရပါတယ်။
ဒီကနေ့ ဒီဇင်ဘာ ၂၉ ရက်၊ မနက်ပိုင်းမှာ စက်ရုံ တာဝန်ရှိသူတွေက တစုံတရာ ကြိုတင်အသိပေး အကြောင်းကြားခြင်း မရှိဘဲ အလုပ်သမား အယောက် ၁၆၀၀ ဝန်းကျင်ကို နစ်နာကြေးပေးကာ အလုပ်ရပ်နားလိုက်တာ ဖြစ်တယ်လို့ သိရပါတယ်။
ထိုင်းဥပဒေအရ သတ်မှတ်ထားတဲ့ နစ်နာကြေးအဖြစ် တနှစ်နဲ့ သုံးနှစ်ကြား လုပ်သက်ရှိသူ အလုပ်သမား တယောက်အတွက် လျော်ကြေး ဘတ် ငါးသောင်းလေးထောင်၊ လုပ်သက် တနှစ်အောက် အလုပ်သမား တယောက်အတွက် လျော်ကြေး ဘတ် နှစ်သောင်းခုနစ်ထောင် အသီးသီး ရရှိခဲ့တယ်လို့ သိရပါတယ်။
“ဒီလို လျော်ကြေးတွေ ရခဲ့ကြပေမယ့် ခုလိုကာလမှာ နောက်ထပ် အလုပ်သစ်ထပ်ရဖို့ ငွေထပ်ကုန်ပြီး အခက်အခဲတွေ ရင်ဆိုင်ရဦးမှာ ဖြစ်တာမို့ ဘယ်သူမှ မပျော်နိုင်ကြဘူး” လို့ ထိုင်းရောက် ရွှေ့ပြောင်း မြန်မာအလုပ်သမားတွေကို ကူညီပေးနေတဲ့ အေအေစီ ကိုရဲမင်းက သူ့ရဲ့ လူမှုကွန်ရက် စာမျက်နှာကတဆင့် ပြောဆိုထားပါတယ်။
အဲဒီ အီလက်ထရောနစ် စက်ရုံဟာ အခု ၂၀၂၅ ခုနှစ်ထဲမှာ အလုပ်သမားတွေကို အလုပ်ထုတ်ပစ်တာ နှစ်ကြိမ်ရှိပြီလို့ သိရပြီး ပထမတကြိမ် စက်တင်ဘာလတုန်းကတော့ အလုပ်သမား ဦးရေ ၁၅၀၀ ကျော်ကို အလုပ်ရပ်နားခဲ့တာ ဖြစ်တယ်လို့ ထိုင်းနိုင်ငံရောက် မြန်မာလုပ်သားတွေဆီက သိရပါတယ်။
“Cal-Comp က ဒုတိယအကြိမ် အလုပ်ထုတ်တာကို အကြောင်းကြားပါတယ်။ နစ်နာကြေး အတော်အသင့်ရလို့ တချို့ ပျော်နေကြပါတယ်” လို့ ထိုင်းရောက် မြန်မာလုပ်သား တယောက်က ပြောပါတယ်။
အဲဒီ စက်ရုံဟာ နံပါတ် ၁ ကနေ ၁၅ လောက်အထိ ရုံခွဲတွေ အများကြီးရှိပြီး လတ်တလော အလုပ်ထုတ်တဲ့ ရုံတွေက နံပါတ် ၁၀ နဲ့ ၁၁ ဖြစ်ကာ ဖုန်းနာရီ ထုတ်လုပ်တာ ဖြစ်တယ်လို့ နောက်ထပ် အလုပ်သမား တယောက်က ပြောပါတယ်။
“ကျန်တဲ့ရုံတွေက မျိုးစုံထုတ်လုပ်တာ။ တရုံတည်းမှာတင် လူဦးရေ သုံးသောင်းကျော်လောက် ရှိတယ်။ ဒီစက်ရုံက ဥပဒေနဲ့အညီ လျော်ကြေးပေးတယ်။ နစ်နာကြေးပေးတယ်။ စက်ရုံအခွင့်ရေး ပေးထားတာတွေက ထမင်းနှစ်နပ်၊ နှစ်စဥ် bonus ၊ ပတ်စ်ပို့ စာရွက်စာတမ်း ဘယ်နှစ်နှစ်နေနေ အကုန် free လုပ်ပေးတယ်။ ရက်မှန်ကြေး ၁၀၀၀ ၊ နေ့စားအစိုးရဈေး၊ အိုဗာတိုင် အစိုးရဈေး၊ ပိတ်ရက်ခိုင်းရင် နှစ်ဆ၊ တခြားရုံနဲ့ယှဥ်ရင်တော့ အခွင့်ရေးများများရတယ်။ လူများတယ်။ ကျွန်တော်တို့ အခုလုပ်နေတာ ရုံခွဲမှာ” လို့ သူက ပြောပါတယ်။
လက်ရှိ အလုပ်ရပ်နားခံရသူတွေဟာ နှစ်နိုင်ငံနားလည်မှု (MoU) စနစ်နဲ့ ထိုင်းနိုင်ငံကို လာရောက်ခဲ့သူတွေဖြစ်ပြီး မူလအလုပ်မှာ အဆင်မပြေတဲ့အတွက် Cal-Comp စက်ရုံကို ပြောင်းရွှေ့လာခဲ့သူတွေ ဖြစ်ကာ အလုပ်သမားပတ်စ်ပို့ (PJ) နဲ့ ပန်းရောင်ကတ် အထောက်အထား ကိုင်ဆောင်ထားသူတွေလို့ သိရပါတယ်။
Cal-Comp Electronics (Thailand) ကုမ္ပဏီဟာ ဟောင်ကောင်အခြေစိုက် KINPO GROUP လုပ်ငန်းစုရဲ့ လက်အောက်ခံ ကုမ္ပဏီတခု ဖြစ်တယ်လို့ သိရပါတယ်။
