အပစ်ရပ်သဘောတူညီချက် ကမ္ဘောဒီးယား ချိုးဖောက်တယ်လို့ ထိုင်းစစ်တပ် စွပ်စွဲ
ထိုင်းနဲ့ ကမ္ဘောဒီးယားတို့အကြား နယ်စပ်ပြဿနာနဲ့ပတ်သက်ပြီး မကြာသေးမီက လက်မှတ်ရေးထိုးခဲ့တဲ့ အပစ်အခတ်ရပ်စဲရေးသဘောတူညီချက်ကို ကမ္ဘောဒီးယားက ချိုးဖောက်တယ်လို့ ထိုင်းစစ်တပ်က စွပ်စွဲလိုက်ပါတယ်။
ကမ္ဘောဒီးယားဘက်ကနေ ပျံသန်းလာတဲ့ ဒရုန်းအစင်း ၂၅၀ ကျော်ကို တွေ့ရှိခဲ့ကြောင်း ထိုင်းစစ်တပ်ရဲ့ ကြေညာချက်တစောင်မှာ ပြောပါတယ်။ မကြာသေးမီးက အပစ်အခတ်ရပ်စဲရေးဟာ စနေနေ့ ဒေသစံတော်ချိန် မွန်းတည့်ချိန်မှာ စတင်အသက်ဝင်ခဲ့တာပါ။
နှစ်ဖက်စလုံးက တပ်ဖွဲ့ဝင်တွေ လက်ရှိရှိနေသော ရှေ့တန်းစစ်မျက်နှာမှာ တိုက်ပွဲတွေရပ်ဖို့ ၊ အင်အားဖြည့်တင်းမှုတွေ မပြုလုပ်ဖို့နဲ့ နယ်စပ်ဒေသတွေမှာ နေထိုင်တဲ့ အရပ်သားတွေကို နေရပ်ပြန်နိုင်ဖို့အတွက်တွေကို သဘောတူညီခဲ့ကြပါတယ်။
ဒီသဘောတူညီချက်ဟာနှစ်နိုင်ငံစလုံးအပေါ် တရုတ်နဲ့ အမေရိကန်တို့ရဲ့ သံတမန်ရေးဖိအားပေးမှုနဲ့အတူ ရက်ပေါင်းများစွာ ဆွေးနွေးမှုတွေအပြီးမှာ ထွက်ပေါ်လာတာဖြစ်ပါတယ်။
ကမ္ဘောဒီးယားရဲ့ လုပ်ရပ်တွေဟာ တင်းမာမှုတွေကို လျှော့ချဖို့ ရည်ရွယ်ထားတဲ့ အစီအမံတွေကို ချိုးဖောက်ခြင်ေ ဖြစ်ပြီး အပစ်အခတ်ရပ်စဲရေး စည်းကမ်းချက်တွေနဲ့ မကိုက်ညီဘူလို့ တနင်္လာနေ့က ထုတ်ပြန်ခဲ့တဲ့ ကြေညာချက်တခုမှာ ထိုင်းစစ်တပ်က ပြောပါတယ်။
ဇူလိုင်လမှစပြီး ထိုင်းနိုင်ငံမှာ ဖမ်းဆီးခံထားရတဲ့ ကမ္ဘောဒီးယားစစ်သား ၁၈ ယောက်ကို လွှတ်ပေးဖို့ကိုလည်း ပြန်စဉ်းစားမယ်လို့ ဆိုပါတယ်။ "သဘောတူညီချက်တွေနဲ့ နိုင်ငံတော်အချုပ်အခြာအာဏာကို ချိုးဖောက်မှုတွေ ဆက်လက်ဖြစ်ပေါ်နေပါက တုံ့ပြန်သွားမယ်လို့ " လို့ ထိုင်းစစ်တပ်က ပြောပါတယ်။
ကမ္ဘောဒီးယားနိုင်ငံခြားရေးဝန်ကြီး ပရက် ဆိုခွန်ကတော့ လက်ရှိစွပ်စွဲချက်ဟာ နယ်စပ်မျဉ်းတလျှောက် နှစ်ဖက်စလုံးမှ မြင်တွေ့ရတဲ့ ဒရုန်းပျံသန်းမှုနဲ့ ဆက်စပ်တဲ့ အသေးအဖွဲပြဿနာတခုလို့ ပြောဆိုထားပါတယ်။
