ရွေးကောက်ပွဲနီးလို့ မူဆယ်မြို့ အဝင် စစ်ဆေးရေး တင်းကြပ်
ရှမ်းပြည်နယ် မြောက်ပိုင်း၊ မူဆယ်မြို့ အဝင်ဂိတ်မှာ အခု ဒီဇင်ဘာလ လကုန်ပိုင်းအတွင်း စစ်ဆေးရေး ပိုတင်းကြပ်လာကြောင်း ဒေသခံတွေဆီက သိရပါတယ်။
"မြို့ အဝင်က အစိုးရ စစ်တပ်ဂိတ်မှာ စစ်ဆေးရေး တင်းကြပ်တယ်။ မှတ်ပုံတင် စစ်တယ်။ သံသယရှိတဲ့လူဆိုရင် ဖုန်းတွေ၊ အကောင့်တွေပါစစ်တယ်။" လို့ ဒေသခံ အမျိုးသမီး တယောက်က ပြောပါတယ်။
မှတ်ပုံတင် မပါဘူး လို့ ယူဆရတဲ့ သူတွေ ပြန်လှည့်သွားတာတွေ့ရသလို လူလတ်ပိုင်း အမျိုးသား တယောက်ကိုတော့ TikTok အကောင့်တွေပါ စစ်ဆေးနေတာကို တွေ့ခဲ့တယ်လို့ သူက ပြောပါတယ်။
"ဒီရက်ပိုင်း ရွေးကောက်ပွဲနဲ့ နီးလို့လား မသိဘူး မြို့ အဝင်တွေ စစ်ဆေးရေး အရမ်းတင်းကြပ်တယ်။ မှတ်ပုံတင် ပါမပါ အဓိက စစ်တယ်" လို့ နောက်ထပ် ဒေသခံ တယောက်က ပြောပါတယ်။
ခရီးသည် ယာဉ်တွေကိုလည်း စစ်တာ တွေ့ခဲ့ရတယ်လို့ သူက ပြောပါတယ်။
အရင်ပုံမှန်အားဖြင့် အဲဒီဂိတ်မှာ ဆိုင်ကယ် ဆင်းတွန်းရတာမျိုးပဲ ရှိတယ်လို့ ဆိုပါတယ်။
မူဆယ်မြို့ပေါ်မှာတော့ အစိုးရ အုပ်ချုပ်ရေးယန္တရား ပုံမှန်လည်ပတ်နေပြီး အခုလ ဒီဇင်ဘာ ၂၈ ရက်နေ့မှာလည်း မြို့ပေါ် ရပ်ကွက် ၉ ခုမှာ အထွေထွေရွေးကောက်ပွဲ ကျင်းပ သွားဖို့ ရှိပါတယ်။
