ဆောင်းရာသီ အပြောင်းအရွှေ့ဈေးကွက်တွင် သောမတ်စ်ဖရန့်အား ပေါင်သန်း ၁၅၀ အသုံးပြုခွင့်ပေးကာ ထောက်ပံ့လာမယ့် စပါးစ်
====================
စပါးစ်ဟာ လာမယ့် ဇန်နဝါရီအပြောင်းအရွှေ့ဈေးကွက်တွင် ပေါင်သန်း ၁၅၀ အထိ အသုံးပြုကာ သောမတ်စ်ဖရန့်အား ထောက်ပံ့ပေးမှု ပြုလုပ်လာပါမယ်။
ဒါပေမယ့် သောမတ်စ်ဖရန့်နှင့် စပါးစ်အနေနှင့် လာမယ့် ဆောင်းရာသီဈေးကွက်မှာ ၎င်းတို့ရဲ့ အဓိကပစ်မှတ်များကို ခေါ်ယူနိုင်ရေး ရုန်းကန်လာရဖို့တော့ ရှိနေပါတယ်။
တဖက်တွင် စပါးစ်ဟာ အားကစားဒါရိုက်တာဖေဘီယိုပါရာတီကာအား ဖီအိုရင်တီးနားသို့ လက်လွှတ်ရနိုင်ခြေရှိနေမှုကလည်း နည်းပြအတွက် ရှုပ်ထွေးတဲ့ အခြေအနေ ဖြစ်နေစေပါတယ်။
စပါးစ်ဟာ လာမယ့် ဆောင်းရာသီဈေးကွက်မှာ ဘယ်တောင်ပံကို အဓိက အားဖြည့်ရန် ရည်ရွယ်ထားပါတယ်။
၎င်းတို့ဟာ နွေရာသီတုန်းက ဆာဗင်ဟိုကို ခေါ်ယူရန် ကြိုးပမ်းမှု မအောင်မြင်ခဲ့သလို ဘုန်းမောက်ရဲ့ အန်တိုနီဆီမန်ယိုမှာလည်း မန်စီးတီးသို့ လက်လွှတ်လာဖို့ ရှိနေပါတယ်။
တဖက်တွင် စပါးစ်အနေဖြင့် ဆီမန်ယိုသာ မန်စီးတီးသို့ ရောက်သွားလျှင် ဆာဗင်ဟိုကို ခေါ်ယူရေး မျှော်လင့်ချက် ရှိလာနိုင်ပါတယ်။
စပါးစ်ပရိသတ်များကမူ ဂိုးသွင်းခြေစွမ်းမရှိတဲ့ ဆာဗင်ဟိုမှာ အသင်းအတွက် အလုပ်ဖြစ်ပါ့မလား မေးခွန်းထုတ်နေပါတယ်။
ဆာဗင်ဟိုဟာ မန်စီးတီးအတွက် ပြိုင်ပွဲအရပ်ရပ် ၆၉ ပွဲကစားထားရာမှာ ၅ ဂိုးတည်းသာ သွင်းထားနိုင်သလို ပရီးမီးယားလိဂ် ၄၂ ပွဲ(၂၅ ပွဲ ပွဲထွက်)ကစားထားရာမှာ ၁ ဂိုးတည်းသာ သွင်းထားနိုင်ပါတယ်။
ဒါ့အပြင် စပါးစ်ဟာ အဓိကတိုက်စစ်မှူးဒိုမီနစ်ဆိုလန်ကီရဲ့ ခြေကျင်းဝတ်ဒဏ်ရာမှာ ထင်မှတ်ထားတာထက် ဆိုးရွားနေမှုနှင့်အတူ တစ်ရာသီလုံး တိုက်စစ်မှူးမပါဘဲ ကစားရနိုင်ခြေရှိနေမှုကြောင့် တိုက်စစ်မှူးတစ်ဦး ခေါ်ယူလိုနေပါတယ်။
စပါးစ်ဟာ ပေါ်တိုတိုက်စစ်မှူးဆာမူးအက်ဟီဟိုဝါကို ပစ်မှတ်ထားနေပေမယ့်လည်း ပြောင်းရွှေ့ကြေး ပေါင်သန်း ၅၀ အထိ တောင်းဆိုလာနိုင်မှုကြောင့် အခက်တွေ့နေပါတယ်။
ဒါ့အပြင် ဒီစတီနီအူဒိုဂီရဲ့ ဒဏ်ရာပြဿနာ ဆက်ရှိနေမှုကြောင့် ဘယ်နောက်ခံလူ ခေါ်ယူရန်လည်း လိုအပ်နေပါတယ်။
အူဒိုဂီဟာ ယခုရာသီတွင် စပါးစ်ရဲ့ ပွဲ ၁၁ ပွဲအထိ လွဲထားပြီး ဖြစ်သလို တံကောက်ကြောဒဏ်ရာကြောင့် လာမယ့် ဇန်နဝါရီလတွင်မှ ပြန်လည်ကစားနိုင်ပါမယ်။
ယင်းသို့ အခြေအနေကြောင့် သောမတ်စ်ဖရန့်ဟာ ညာသန်ဒီဂျက်စပင့်ကို ဘယ်နောက်ခံလူအဖြစ် သုံးနေရပါတယ်။
