တစ်လအထိ နားရမယ့် အသင်းခေါင်းဆောင်ဘရူနိုဖာနန်ဒက်စ် နေရာတွင် အစားထိုးရန် မဖြစ်နိုင်ကြောင်း အမိုရမ် ပြောကြားလာ
================
ယူနိုက်တက်နည်းပြရူဘင်အမိုရမ်က တစ်လအထိ အနားယူရမယ့် အသင်းခေါင်းဆောင်ဘရူနိုဖာနန်ဒက်စ်နေရာတွင် အစားထိုးရန် မဖြစ်နိုင်ရန် ပြောကြားလာပါတယ်။
ဖာနန်ဒက်စ်ဟာ တနင်္ဂနွေနေ့တုန်းက ဗီလာပါ့ခ်တွင် အက်စတွန်ဗီလာအား ၂-၁ ဖြင့် ရှုံးနိမ့်တဲ့ပွဲစဉ်တွင် တံကောက်ကြောဒဏ်ရာရရှိကာ လူစားလဲလှယ်ခဲ့ရပြီး သောကြာနေ့ည နယူးကာဆယ်အား အဝေးကွင်းသို့ သွားရောက်ကစားရမယ့်ပွဲစဉ်ကို လွဲချော်လာပါမယ်။
အမိုရမ်ဟာ နယူးကာဆယ်ပွဲမတိုင်မီ သတင်းစာရှင်းလင်းပွဲတွင် ပေါ်တူဂီလက်ရွေးစင် ကစားသမား ဘယ်လောက် နားရမယ်ဆိုတာနှင့်ပတ်သက်ပြီး ပြောဆိုရန် ငြင်းဆိုသွားခဲ့ပါတယ်။
ဒါပေမယ့် အတွင်းသတင်းများအရ အသက် ၃၁ နှစ်ရှိ ကွင်းလယ်ဖန်တီးရှင်မှာ ဇန်နဝါရီလ ၁၇ ရက်နေ့ အိုးထရက်ဖို့ဒ်တွင် မန်စီးတီးနှင့် ရင်ဆိုင်ကစားရမယ့် မန်ချက်စတာဒါဘီပွဲတွင် ပြန်လည်ကစားလာနိုင်မှာ ဖြစ်ပြီး ၅ ပွဲ လွဲချော်လာမှာ ဖြစ်ကြောင်း သိရပါတယ်။
ယူနိုက်တက်ဟာ အာဖရိကဖလားပြိုင်ပွဲအတွက် ဘရိုင်ယန်အမ်ဘူမို၊ အာမက်ဒီရယ်လိုနှင့် မာ့ဇ်ရာဝီတို့အား ဆုံးရှုံးထားသလို ဖာနန်ဒက်စ်နေရာတွင် အစားထိုးမယ့် ကိုဘီမိုင်နူးကလည်း ခြေသလုံးဒဏ်ရာကြောင့် နားနေရရာ ကြီးမားတဲ့ ထိုးနှက်ချက် ကြုံနေရပါတယ်။
အမိုရမ်က "ဘရူနိုနေရာမှာ အစားထိုးဖို့ဆိုတာ ဘယ်လိုမှ မဖြစ်နိုင်ဘူး။ ဒါကို ဒီမနက် အသင်းကိုလည်း ပြောခဲ့တယ်။ ကောင်းတဲ့အရာနဲ့ယူရမယ်။ တကယ်လို့ ကောင်းတာမွန်တာ ရှိတယ်ဆိုရင် လူတွေအများကြီး ဒီနေရာမှာ ဖြည့်ဆည်းရမယ်"လို့ ပြောကြားသွားပါတယ်။
ဘရူနိုဖာနန်ဒက်စ်ဟာ ယူနိုက်တက်သို့ ရောက်လာတဲ့ ခြောက်နှစ်တာကာလအတွင်းတွင် ဖျားနာမှုနှင့် ဒဏ်ရာကြောင့် ၂ ပွဲတည်းသာ လွဲချော်တဲ့အထိ အံ့ဩစရာကောင်းတဲ့ ကြံ့ခိုင်မှုမှတ်တမ်းပိုင်ဆိုင်ထားသူလည်း ဖြစ်ပါတယ်။
ဆက်လက်ပြီး အမိုရမ်က "ဖန်တီးမှုအပိုင်းသာ မဟုတ်ပါဘူး။ အလွတ်တည်ကန်ဘောအပိုင်းမှာရော အသင်းကို စုစည်းတဲ့အပိုင်းမှာရော အရေးပါနေတာပါ။ ကွင်းထဲက နေရာတိုင်းကို သူနားလည်တယ်။ အချက်အလက်တိုင်းကိုလည်း အသေးစိတ်သတိထားတယ်။ လူစားလဲမှု တစ်ခုလုပ်လာတိုင်း သူတို့ ဘာလုပ်လာမယ်ဆိုတာ အခြားသူတွေကို ပြောပြတယ်"လို့ ပြောကြားသွားပါတယ်။
ဒါ့အပြင် အမိုရမ်က ဖာနန်ဒက်စ် မရှိတော့တဲ့အချိန်တွင် ယူနိုက်တက်အသင်းခေါင်းဆောင်အဖြစ် လုခ်ရှော သို့မဟုတ် လီဆန်ဒရိုမာတီနက်ဇ်က တာဝန်ယူလာမှာ ဖြစ်ကြောင်းလည်း ဆိုသွားပါတယ်။
