ခွင့်ပြန် ပြည်ပလုပ်သားတွေ အနေနဲ့ ရန်ကုန်လေဆိပ် ရောက်ပါက သတင်းပို့ကြရန်လို
နှစ်ကုန် အားလပ်ရက်တွေမှာ မြန်မာပြည်ကို ခွင့်နဲ့ ပြန်ကြမယ့် ပြည်ပလုပ်သားတွေ အနေနဲ့ ရန်ကုန် အပြည်ပြည်ဆိုင်ရာ လေဆိပ်ကို ရောက်ရှိပါက သတ်မှတ်နေရာမှာ သတင်းပို့ကြဖို့ လိုအပ်တယ်လို့ အစိုးရ ပြည်ပအလုပ်အကိုင် အေဂျင်စီ အလုပ်သမား ညွှန်ကြားရေးဦးစီးဌာနက ထုတ်ပြန်ထားပါတယ်။
အဲဒီအတွက် ဆိုက်ရောက် (Arrival) မှာ ရွှေ့ပြောင်းလုပ်သားအဝင် သတင်းပို့ကောင်တာ (Arrival Counter) ထားရှိပေးထားပြီး မပျက်မကွက် ပြုလုပ်ရမှာ ဖြစ်တယ်လို့ အသိပေးထားပါတယ်။
အခုလို စည်းကမ်းချက် သတ်မှတ်ရခြင်းဟာ ခွင့်ပြီးဆုံးလို့ ပြန်လည် ထွက်ခွာပါက စိစစ်မှုတွေမှာ နှောင့်နှေးကြန့်ကြာခြင်း မရှိစေဖို့အတွက် ရည်ရွယ်တာ ဖြစ်တယ်လို့ သိရပါတယ်။
ဒီသတ်မှတ်ချက်နဲ့ ပတ်သက်လို့ ပြည်ပအလုပ်အကိုင် အေဂျင်စီလုပ်ငန်း လုပ်ကိုင်သူ တယောက်က “ဘာတွေစစ်မှာလဲ ဆိုတော့ အဓိက က ပတ်စ်ပို့က PJ (အလုပ်နိုင်ငံကူးလက်မှတ်) ဟုတ်၊ မဟုတ်နဲ့ OWIC (ပြည်ပအလုပ်အကိုင် အလုပ်သမား သက်သေခံကတ်) ရှိ၊ မရှိ စစ်မှာပါ။ PV (အလည်အပတ် နိုင်ငံကူးလက်မှတ်) ကိုင်ထားတဲ့သူဆိုရင်တော့ PJ ပြောင်းထားဖို့ လိုတယ်” လို့ ပြောပါတယ်။
OWIC ကတ် ပြုလုပ်ခွင့် လျှောက်ထားမှုကို အရင်က ရန်ကုန်မြို့၊ ဒဂုံမြို့သစ် (မြောက်ပိုင်း) မြို့နယ်ရှိ အလုပ်သမားရုံးနဲ့ မရမ်းကုန်းမြို့နယ်ရှိ ၈ မိုင် အလုပ်သမားရုံးတို့မှာ နေ့ချင်းပြီး ပြုလုပ်ပေးခဲ့တာ ဖြစ်ပေမယ့် အခု ၂၀၂၅ ခုနှစ်၊ မတ်လ ၂၀ ရက်မှစတင်ကာ ကတ်ပြုလုပ်ခွင့်ကို နေပြည်တော် အလုပ်သမားရုံးကို စာတိုက်ကနေ လိုအပ်တဲ့ စာရွက်စာတမ်းတွေ ပေးပို့ လျှောက်ထားရတာ ဖြစ်ပါတယ်။
အဲဒီလို လျှောက်ထားရာမှာ အထောက်အထား၊ အချက်အလက် မပြည့်စုံတဲ့သူတွေကို OWIC ကတ် ပြုလုပ်ဖို့ စာရင်းမသွင်းပေးဘူးလို့ အလုပ်သမားဝန်ကြီးဌာနက ကြေညာထားပေမယ့် အချက်အလက် ပြည့်စုံမှု ရှိ၊ မရှိကို အချိန်တိုအတွင်း စစ်ဆေးပေးတာမျိုး မရှိတဲ့အတွက် အလုပ်သမားတွေ အနေနဲ့ အချိန်ကြန့်ကြာမှု အခက်အခဲတွေ ဖြစ်ပေါ်လျက်ရှိတယ်လို့ သိရပါတယ်။
“ခွင့်ရတာက တလ။ OWIC ကတ် ရဖို့က နှစ်လ၊ သုံးလလောက် စောင့်ရမယ်ဆို ဘယ်လိုလုပ် အဆင်ပြေမှာလဲ။ ခွင့်ပြန်တာနဲ့ အလုပ်ပြုတ်ဖို့က ၉၀ ရာခိုင်နှုန်း သေချာသလောက် ဖြစ်နေပြီ။ OWIC ကတ် အမြန်ရဖို့ အာမ မခံနိုင်သေးသရွေ့ အလုပ်ပြုတ်ခံပြီး ပြန်ဖို့ ဘယ်လိုမှ မဖြစ်နိုင်ဘူး” လို့ ဂျပန်နိုင်ငံရောက် ရွှေ့ပြောင်း လုပ်သားတယောက်က ပြောပါတယ်။
ဒါကြောင့် သက်ဆိုင်ရာ ဌာနတွေအနေနဲ့ အခုလို ကြေညာချက်တွေ တစောင်ပြီးတစောင် ထုတ်ပြန်နေမယ့်အစား ထိရောက်တဲ့ စီမံခန့်ခွဲနိုင်မှုတွေရှိဖို့ လိုအပ်တယ်လို့ ဆိုပါတယ်။
“OWIC ကတ် ရဖို့အတွက် သူတို့ပြောတဲ့ အခွန်လည်း ဆောင်ထားတယ်။ ၂၅ ရာနှုန်းလည်း လွှဲထားပြီးသား။ ဒါပေမယ့် ဒီကတ်ရဖို့ကို လနဲ့ချီ စောင့်ရမယ်ဆို အဆင်မပြေဘူး။ တကယ်ဆို ခွင့်ပြန်သမားတွေအတွက် တပတ်လောက်ပဲ စောင့်ရအောင် လုပ်ပေးသင့်တာ” လို့ စင်္ကာပူနိုင်ငံရောက် မြန်မာလုပ်သား တယောက်က ပြောပါတယ်။
အလုပ်သမားတွေ အနေနဲ့ ပြည်ပ ပြန်လည် ထွက်ခွာခွင့်အတွက် OWIC ကတ် ရှိနေဖို့ကသာ အဓိက အရေးပါတာဖြစ်ပြီး PV နိုင်ငံကူးလက်မှတ်ကနေ PJ ပြောင်းလဲဖို့ကတော့ တရားဝင် ခွင့်ပြုထားပြီးသား ဖြစ်တဲ့အတွက် ရုံးဝင်ပြီး ၁၄ ရက်အတွင်း စာအုပ် ရရှိနိုင်တယ်လို့ သိရပါတယ်။
“PV ကနေ PJ ပြောင်းတာကတော့ တရားဝင် ခွင့်ပြုထားပြီးသား ဖြစ်တဲ့အတွက် ဘယ်အချိန်ပြောင်းပြောင်း ပြောင်းလို့ရပါတယ်။ PJ အတွက် Labour ကတ် ရှိရမယ်၊ OWIC လိုမယ်။ ဒါပေမယ့် သူတို့ အသက် ကန့်သတ်ထားတဲ့အထဲ ပါနေရင်တော့ ထွက်လို့မရဘူး။ အဓိက ကတော့ OWIC ကတ်ပါ။ အခုအချိန်မှာ ပြည်ပထွက်ဖို့အတွက်က အသက် ကန့်သတ်ချက်တွေလည်း ရှိနေတော့၊ အရင်တုန်းကတော့ ခွင့်ပြန်တွေဆို OWIC ကတ် မလုပ်ရပေမယ့် အခု လုပ်ရတယ်။ လုပ်ရင်လည်း ပိုက်ဆံအများကြီး ကုန်သလို အခုလုပ်၊ အခုရတာလည်း မဟုတ်ဘူး” လို့ နိုင်ငံကူးလက်မှတ် ပြုလုပ်သူတွေအတွက် ဝန်ဆောင်မှုပေးနေသူ တယောက်က ပြောပါတယ်။
ပြည်ပနိုင်ငံတွေမှာ သုံးလနဲ့အထက် နေထိုင်တဲ့သူတွေအနေနဲ့ PJ နဲ့ OWIC ကတ် ရှိထားရမှာဖြစ်ပြီး ပတ်စ်ပို့က PV ဖြစ်နေသလို OWIC ကတ်လည်း မရှိရင်တော့ ပြည်ပပြန်ထွက်ဖို့အတွက် အခက်အခဲတွေ ရှိနေမှာဖြစ်တယ်လို့ သိရပါတယ်။
