ဝက်လက်မြို့နယ်မှာ လေကြောင်း တိုက်ခိုက်မှု ခုနှစ်ယောက်သေပြီး ခြောက်ယောက်ဒဏ်ရာရ
စစ်ကိုင်းတိုင်း ၊ ဝက်လက်မြို့နယ် ၊ ငါးပတ်ချောင်းရွာမှာ ဒီဇင်ဘာ ၂၃ ရက်နေ့ ညနေပိုင်းက လေကြောင်း တိုက်ခိုက်ခံရပြီး ခုနှစ်ယောက်သေဆုံး မှုရှိခဲ့တယ်လို့ စုံစမ်းသိရှိ ရပါတယ်။
သေဆုံးသူတွေက အမျိုးသမီး ငါးယောက် နဲ့ အမျိုးသား နှစ်ယောက်တို့ ဖြစ် ကြောင်း သိရှိရပြီး လေကြောင်း တိုက်ခိုက်မှုအတွင်း ထိခိုက်ဒဏ်ရာ ရရှိသူလည်း ခြောက်ယောက်အထိ ရှိထားတယ်လို့ သိရပါတယ် ။
" ညနေ ၄ နာရီ ၂၀ လောက်မှာ ကြဲသွားတယ်။ကနဦး သိရတာ သုံးယောက် ပါ။ထပ်တိုး သေဆုံးတာ လေးယောက်ပါ ။ ထပ်တိုးသေဆုံးတဲ့အထဲမှာ ကလေးနှစ်ယောက်ပါတယ်။ ထိခိုက်ဒဏ်ရာ ရတဲ့အထဲမှာ ယောကျ်ားလေး ငါးယောက်နဲ့ မိန်းကလေး တယောက် လို့သိရတယ်။ " လို့ စစ်ရှောင် အရေးကူညီ နေသူက ပြောပါတယ် ။
အဆိုပါ လေကြောင်း တိုက်ခိုက်မှုအတွင်း လူသေဆုံးမှု အပြင် နေအိမ် အချို့လည်း မီးလောင် ပျက်စီးခဲ့သလို ကား သုံးစီး ထိခိုက် ပျက်စီးဆုံးရှုံးမှု ရှိခဲ့တယ်လို့ သိရပါတယ် ။
လက်ရှိမှာတော့ ထိခိုက်ဒဏ်ရာ ရရှိသူတွေကို ဆေးဝါးကုသမှု လုပ်ပေးနေကြတယ် လို့သိရပါတယ် ။
ဒီဇင်ဘာ ၁၉ ရက်နေ့ ၊ ဝက်လက်မြို့နယ် ထုံးဘိုရွာ တောင်ဘက် သန်းကုန်းတောတိုက် အနီးကို လေကြောင်း တိုက်ခိုက် ခံခဲ့ရပြီး သုံးယောက် ထိခိုက်ဒဏ်ရာရရှိ ခဲ့တယ်လို့ သိရပါတယ်။
အလားတူ ဒီဇင်ဘာ ၁ ရက်နေ့ ကနေ ဒီဇင်ဘာ ၁၈ ရက်အတွင်းမှာလည်း ဝက်လက်မြို့နယ် ထဲက ဆည်တော ရွာ ၊ နတ်မှော်ဦးရွာ ၊ ထုံးဘိုရွာ တောင်ဘက် သန်းကုန်းတောတိုက် ၊ ယင်းမာရွာ တို့မှာ လေကြောင်း တိုက်ခိုက်ခံခဲ့ရပြီး လူ ၁၅ ယောက် သေဆုံးကာ ထိခိုက်ဒဏ်ရာ ရရှိသူ ၃၀ ထက်မနည်း ရှိ ခဲ့တယ်လို့ သိရပါတယ်။
