မလေးရှား အွန်လိုင်းငွေလိမ်ဂိုဏ်းခေါင်းဆောင်တစ်ဦးကို ထိုင်းမှာ ဖမ်းမိ
နယ်စပ်ပဋိပက္ခမှ ရှောင်တိမ်းရန်အတွက် ကမ္ဘောဒီးယားနိုင်ငံ ပွိုင်ပက်မြို့မှ ထွက်ပြေးလာသော မလေးရှားလူမျိုး အွန်လိုင်းငွေလိမ်လုပ်ငန်းခေါင်းဆောင်တစ်ဦးကို တနင်္ဂနွေနေ့က ထိုင်းနိုင်ငံ ဆာကာအိုပြည်နယ်တွင် ဖမ်းဆီးရမိခဲ့သည်။
ဘန်ကောက်မြို့ရှိ ကွန်ဒိုတစ်ခုတွင် ဆင်းမ်ဘောက်စ်လေးခု တပ်ဆင်ခဲ့မှုအတွက် အင်ဒိုနီးရှားလူမျိုး ကီဗင်နှင့် ထိုင်းလူမျိုး ဂျီရာနန်ဟုသာ အမည်ထုတ်ပြန်ထားသော စုံတွဲတစ်တွဲကို ရဲတပ်ဖွဲ့က ဖမ်းဆီးရမိခဲ့ပြီးနောက်မှစတင်ကာ အဆိုပါ သံသယရှိမလေးလူမျိုး အန်ဂျိူးဟန်ကို ခြေရာခံမိခဲ့ခြင်းဖြစ်ကြောင်း နည်းပညာရာဇဝတ်မှုနှိမ်နင်းရေးဌာနမှူး ရဲဗိုလ်ချုပ် ချာနန်နတ် ဆာရာထာဝမ်ဖယက်က တနင်္လာနေ့တွင် ပြောကြားခဲ့သည်။
အင်ဒို-ထိုင်း စုံတွဲကို ဖက်ချာဘူရီပြည်န် ချာအမ်ခရိုင်ရှိ ဇိမ်ခံဗီလာတစ်ခုတွင် ဖမ်းဆီးရမိခဲ့ခြင်းဖြစ်သည်။ မစ္စတာ အန်ဂျိူးသည် ၎င်းတို့၏ အလုပ်ရှင်ဖြစ်ကြောင်းနှင့် ပွိုင်ပက်တွင် သူနေထိုင်ကြောင်းကို ၎င်းတို့က ထွက်ဆိုခဲ့သည်။
နယ်စပ်တလျှောက်တို-က်ပွဲများကြောင့် မစ္စတာအန်ဂျိုးသည် တောလမ်းအတိုင်း နယ်စပ်ကိုဖြတ်၍ ဆာကိုအိုပြည်နယ်အတွင်း ခိုးဝင်ခဲ့ကြောင်း ရဲတပ်ဖွဲ့က သိရှိခဲ့သည်။
အေရန်ယာဖရာထက်ခရိုင် ခလွန်နမ်ဆိုင်မြို့ နယ်စပ်အနီးတွင် ၎င်းကို ဖမ်းဆီးခဲ့သည်။ ထိုင်းနိုင်ငံတွင်းရှိ နေရာအမျိုးမျိုးတွင် ဆင်းမ်ဘောက်စ်များတပ်ဆင်ရန်အတွက် စုံတွဲကို သူ ညွှန်ကြားခဲ့ကြောင်း ဝန်ခံခဲ့သည်။
စက်ပစ္စည်းတစ်ခုစီတွင် ပြည်တွင်း ဆင်းမ်ကတ်များစွာပါဝင်ပြီး ဆက်သွယ်ရေးကွန်ရက်များကို နိုင်ငံတကာခေါ်ဆိုမှုများသို့ လမ်းကြောင်းပြောင်းရန် လှည့်စားခဲ့ကာ အွန်လိုင်းလိမ်လည်သူများက အသုံးပြုခဲ့ကြောင်း ရဲဗိုလ်ချုပ် ချာနန်နတ်က ပြောကြားခဲ့သည်။
အမှုနှင့် ပတ်သက်၍ ဆက်လက်အရေးယူဆောင်ရွက်ရန်အတွက် စုံစမ်းစစ်ဆေးသူများထံ လွှဲပြောင်းပေးခဲ့သည်။
