ဖောရက်စ်ပွဲမတိုင်မီ မန်စီးတီးကစားသမားများ ဝိတ်ချိန်ရမည်
===================
ပက်ဂွါဒီယိုလာက မန်စီးတီးကစားသမားများအနေဖြင့် ဒီဇင်ဘာလ ၂၇ ရက်နေ့ နော်တင်ဟမ်ဖောရက်စ်နှင့်ပွဲမတိုင်မီ ပွဲကစားရန် ကြံ့ခိုင်မှု ပြည့်ဝမှု ရှိ/မရှိကြောင်း သိရှိရန် ဝိတ်ချိန်ရမယ်လို့ ပြောကြားလာပါတယ်။
မန်စီးတီးဟာ ခရစ္စမတ်မတိုင်မီ နောက်ဆုံးပွဲအဖြစ် စနေနေ့တုန်းက ဝက်စ်ဟမ်းအား ၃-၀ ဂိုးဖြင့် အနိုင်ယူခဲ့ပါတယ်။
မန်စီးတီးကစားသမားများဟာ ဝက်စ်ဟမ်းပွဲမတိုင်မီ ဝိတ်ချိန်ခဲ့ရပြီး ယခုအပတ် လေ့ကျင့်ခန်းပြန်ဆင်းလာချိန်တွင် သတ်မှတ်ဝိတ်ချိန်အတိုင်း ရှိနေဖို့ ဝိတ်ထိန်းထားရပါမယ်။
အသက် ၅၄ နှစ်ရှိ ဂွါ့ဒီယိုလာက "သုံးရက်အနားပေးလို့ ပြန်ရောက်လာတဲ့အချိန်မှာ ဘယ်လိုပုံစံ ဖြစ်နေတယ်ဆိုတာ သိချင်တယ်။ သူတို့ စားကြမှာပဲ။ ဒါပေမယ့် ကျွန်တော်က သူတို့ကို ထိန်းချုပ်ထားချင်တယ်။ ကစားသမားတစ်ယောက် အခု အပြီးပြည့်စုံဆုံး ဖြစ်နေတယ်ဆိုရင်တောင် ပြန်ရောက်လာတဲ့အခါ ၃ ကီလိုလောက် ဝိတ်ပိုတက်နေရင် မန်ချက်စတာမှာပဲ ကျန်ရစ်ခဲ့ရပါမယ်။ နော်တင်ဟမ်ဖောရက်စ်နဲ့ပွဲအတွက် လိုက်ပါခွင့်ရမှာ မဟုတ်ပါဘူး"လို့ ပြောကြားသွားပါတယ်။
ဂွါ့ဒီယိုလာဟာ ၂၀၁၆ ခုနှစ်တွင် မန်စီးတီးကို ကိုင်တွယ်ပြီးနောက် ကြံ့ခိုင်မှုပိုင်းနဲ့ပတ်သက်ပြီး ကစားသမားများအား များစွ တင်းကြပ်လေ့ရှိသူ ဖြစ်ပါတယ်။ ကစားသမားများဟာ သတ်မှတ်ဝိတ်ထက် မြင့်မားနေပါက ပွဲကစားခွင့်မရဘဲ လေ့ကျင့်ခန်းဆင်းမှုသာ ပြုလုပ်ရပါတယ်။
မန်စီးတီးနောက်ခံလူဟောင်းကလစ်ချီက ဂွါဒီယိုလာရဲ့ တင်းကြပ်တဲ့ စည်းမျဉ်းများကြောင့် ကစားသမားများမှာ ပီဇာ၊ အချိုရည်နှင့် ကယ်လိုရီများတဲ့ အစားအသောက်များကို ရှောင်ရှားရကြောင်း ဖွင့်ဟခဲ့ဖူးပါတယ်။
ထိပ်ဆုံးမှ အာဆင်နယ်နှင့် ၂ မှတ်အကွာတွင် ရပ်တည်နေတဲ့ မန်စီးတီးဟာ စနေနေ့တွင် နော်တင်ဟမ်ဖောရက်စ်နှင့်ရင်ဆိုင်ပြီးပါက နှစ်သစ်ကူးနေ့တွင် ဆန်းဒါးလန်းအား အဝေးကွင်းသို့ ထပ်မံ ရင်ဆိုင်ကစားရပါမယ်။
