တရုတ်အထူးသံနှင့်ကမ္ဘောဒီးယားခေါင်းဆောင်များတွေ့ဆုံ၍အပစ်ရပ်ရေး ထပ်မံတွန်းအားပေးခဲ့
ကမ္ဘောဒီးယားနိုင်ငံနှင့်ထိုင်းနိုင်ငံတို့အကြားရှိ တင်းမာမှုများကို လျော့ကျစေရန်နှင့် လက်ရှိဖြစ်ပွားနေသော လက်နက်ကိုင်ပဋိပက္ခများကို အဆုံးသတ်ရန် တကျော့ပြန်ကြိုးပမ်းသည့်အနေဖြင့် တရုတ်နိုင်ငံ၏ အထူးသံတမန် တန်ရှီကျွန်သည် ဖနွမ်းပင်တွင် အဆင့်မြင့်အရာရှိအဆင့် တိုင်ပင်ဆွေးနွေးမှုများ ကို စတင်ခဲ့ပြီး ချက်ချင်းအပစ်အခတ်ရပ်စဲရေးနှင့် ငြိမ်းချမ်းစွာ ညှိနှိုင်းဖြေရှင်းရေးတောင်းဆိုမှုများကို ထပ်လောင်းပြုလုပ်ခဲ့သည်။
၎င်း၏ ခရီးစဉ်အတွင်း တန်သည် ဒီဇင်ဘာလ ၁၉ ရက်နေ့တွင် ဝန်ကြီးချုပ် ဟွန်မာနက်နှင့် တွေ့ဆုံခဲ့သည်။
သဘောတူညီထားသော နှစ်နိုင်ငံမူဘောင်များနှင့် ချမှတ်ထူထောင်ထားသော ယန္တရားများကို အပြည့်အဝလေးစားလိုက်နာခြင်းနှင့် အကောင်အထည်ဖော်ခြင်း၏ အရေးပါမှုကို မစ္စတာ ဟွန်မာနက်က အလေးပေးပြောကြားခဲ့ပြီး အဆိုပါ ယန္တရားများသည် သဘောထားကွဲလွဲခြင်းများကို ဖြေရှင်းရန်၊ နိုင်ငံတကာဥပဒေနှင့်အညီ တရားမျှတပြီး ရေရှည်တည်တံ့ခိုင်မြဲကာ ငြိမ်းချမ်းသော ဖြေရှင်းချက်ရရှိရန်အတွက် မရှိမဖြစ်လိုအပ်သော အရာများအဖြစ် ဆက်လက်တည်ရှိနေကြောင်း ပြောကြားခဲ့သည်ဟု ကမ္ဘောဒီးယားနိုင်ငံခြားရေးနှင့် နိုင်ငံတကာပူးပေါင်းဆောင်ရွက်ရေးဝန်ကြီးဌာနက ဒီဇင်ဘာလ ၂၀ ရက်နေ့တွင် ထုတ်ပြန်သော ကြေညာချက်၌ ဖော်ပြခဲ့သည်။
တရုတ်နိုင်ငံ ကို အထူးသဖြင့် သမ္မတ ရှီကျင့်ဖျင်ကို နှစ်နိုင်ငံအကြား ငြိမ်းချမ်းရေးကို ပြန်လည်ထူထောင်ရန်နှင့် ဒေသတွင်း ငြိမ်းချမ်းရေးနှင့် တည်ငြိမ်ရေးကို ထိန်းသိမ်းရန် ၎င်း၏ ဦးဆောင်မှုနှင့် ပုဂ္ဂိုလ်ရေးအရ ကြိုးပမ်းအားထုတ်မှုများအတွက် ကျေးဇူးတင်ကြောင်းကို မစ္စတာ ဟွန်မာနက်က ထုတ်ဖော်ပြောကြားခဲ့သည်ဟုလည်း သတင်းထုတ်ပြန်ချက်တွင် ဖော်ပြခဲ့သည်။
တရုတ်နိုင်ငံသည် အငြင်းပွားမှုများကို ငြိမ်းချမ်းစွာဖြေရှင်းရေးကို မြှင့်တင်ရန် ရည်ရွယ်ချက်ဖြင့် ကမ္ဘောဒီးယားနှင့် ထိုင်းနိုင်ငံတို့အကြား ဆွေးနွေးမှုများကို လွယ်ကူချောမွေ့စေရန် အပြုသဘောဆောင်သော အခန်းကဏ္ဍမှ ဆက်လက်ပါဝင်မည်ဖြစ်ကြောင်း တန်က ပြောကြားခဲ့သည်။
ကမ္ဘောဒီးယားနှင့် ထိုင်း နှစ်နိုင်ငံစလုံး၏ မိတ်ဆွေအနေဖြင့် တရုတ်နိုင်ငံသည် ချက်ချင်းအပစ်အခတ်ရပ်စဲရေးနှင့် အိမ်နီးချင်းနှစ်နိုင်ငံအကြား ယုံကြည်မှုပြန်လည်တည်ဆောက်ရေးဆီသို့ ဦးတည်သော ကြိုးပမ်းအားထုတ်မှုအားလုံးတွင် ပါဝင်ရန်အသင့်ရှိနေကြောင်း တန်က ဆက်လက်ပြောကြားခဲ့သည်။
