ဂန္ထဝင်များဖြစ်ကြတဲ့ ခရစ္စတီယာနိုရော်နယ်ဒို၊ ဝိန်းရွန်းနီတို့အား အတုယူပြီး တိုက်ပွဲဝင်ရန် ကိုဘီမိုင်နူးအား ရူဘင်အမိုရမ် ပြောကြားလာ
=====================
ရူဘင်အမိုရမ်က ကိုဘီမိုင်နူးအနေဖြင့် ခရစ္စတီယာနိုရော်နယ်ဒို၊ ဝိန်းရွန်းနီတို့အား အတုယူကာ ယူနိုက်တက်တွင် နေရာရရှိရေး အစွမ်းကုန် တိုက်ပွဲဝင်ရန် တိုက်တွန်း ပြောကြားလာပါတယ်။
အသက် ၂၀ နှစ်ရှိ အင်္ဂလန်စတားကိုဘီမိုင်နူးဟာ နွေရာသီတုန်းက အသင်းပြောင်းရန် ကြိုးပမ်းမှု ငြင်းပယ်ခံခဲ့ရပြီးနောက် ယခုရာသီတွင် ပရီးမီးယားလိဂ်ပွဲတစ်ပွဲမျှ ပွဲထွက်ခွင့်မရမှုနှင့်အတူ အနာဂတ်မရေမရာ ဖြစ်နေသူ ဖြစ်ပါတယ်။
သူကိ ဇန်နဝါရီအပြောင်းအရွှေ့ဈေးကွက်တွင်လည်း နာပိုလီကပင် ဆက်လက် ခေါ်ယူလိုနေဆဲ ဖြစ်ပါတယ်။
ယခုအခါ ရူဘင်အမိုရမ်က "သူ့အလုပ်အတွက် ကိုဘီအနေနဲ့ တိုက်ပွဲဝင်ဖို့ လိုတယ်။ အသက် ၂၀ နှစ်အရွယ်မှာ ယူနိုက်တက်အရန်ခုံမှာ ထိုင်နေရတာ ဆိုးရွားတဲ့အရာ မဟတ်ပါဘူး။ ရော်နယ်ဒိုလည်း အရန်ခုံမှာ ထိုင်ခဲ့ရတယ်။ ရွန်းနီလည်း အရန်ခုံမှာ တခါတလေ ထိုင်ခဲ့ရတယ်။ ဟွန်ဆီဘာစတီယန်ဗီရွန်လည်း ကစားခွင့်မရခဲ့ဘူး။ ယူနိုက်တက်သမိုင်းအားလုံးကို မှတ်မိတယ်။ ကိုဘီကို 'မင်းက တကယ့်ကစားသမားကြီး။ အရည်အချင်းကို ပြဖို့ အရန်ခုံမှာ ထိုင်နေကွာ'လို့ ပြောနေတာ မဟုတ်ပါဘူး။ ကျွန်တော်က အဲဒါရဲ့ ဆန့်ကျင်ဘက်ကို ပြောနေတာ။ ကျွန်တော်က အသင်းကို အနိုင်ရစေချင်ရုံသက်သက်ပါ။ ပြီးတော့ ကိုဘီကိုလည်း ပိုကောင်းတဲ့ ကစားသမားဖြစ်စေချင်တယ်"လို့ ပြောကြားသွားပါတယ်။
ကိုဘီမိုင်နူးဟာ ယူရို ၂၀၂၄ ပြိုင်ပွဲတုန်းက အင်္ဂလန်ရဲ့အကောင်းဆုံးကစားသမားတွေထဲက တစ်ဦးအဖြစ် ခြေစွမ်းပြနိုင်ခဲ့သူဖြစ်ပါတယ်။ သူဟာ လာမယ့် ၂၀၂၆ ကမ္ဘာ့ဖလားပြိုင်ပွဲဝင် အင်္ဂလန်အသင်းတွင် ပါဝင်ရန် ပုံမှန်ပွဲထွက်ကစားခွင့် ရရှိရန် လိုအပ်နေပါတယ်။
မိုင်နူးရဲ့အသက်အရွယ်တွင် ခရစ္စတီယာနိုရော်နယ်ဒိုမှာ ယူနိုက်တက်ပွဲအားလုံးရဲ့ ၈၀ ရာခိုင်နှုန်းအား ပွဲထွက်ကစားခွင့်ရခဲ့ပါတယ်။ ဆာအဲလက်စ်ဖာဂူဆန်ဟာ ခံစစ်ဗျူဟာ ပြင်ဆင်ချိန်တွင်သာ ရော်နယ်ဒိုကို အရန်ခုံမှာ ထိုင်ခိုင်းခဲ့တာပါ။
