မေဂျာလိဂ်ကလပ် ချီကာဂိုဖိုင်းယားသို့ ပြောင်းရွှေ့ရန် လီဝန်ဒေါ့စကီး ဆွေးနွေးနေ
=====================

ချီကာဂိုဖိုင်းယားဟာ ဘာစီလိုနာတိုက်စစ်မှူးရောဘတ်လီဝန်ဒေါ့စကီးအား ခေါ်ယူရေး ဆွေးနွေးမှုများ ပြုလုပ်နေပါတယ်။
ပိုလန်အသင်းခေါင်းဆောင်ဟာ ယခုရာသီအကုန်တွင် ဘာစီလိုနာနှင့် စာချုပ်သက်တမ်းကုန်ဆုံးမှာ ဖြစ်ပြီး ချီကာဂိုဖိုင်းယားက အသက် ၃၇ နှစ်ရှိ ဒေါ့မွန်နှင့် ဘိုင်ယန်မြူးနစ်တိုက်စ်စမှူးဟောင်းအား ခေါ်ယူလိုနေပါတယ်။
ရောဘတ်လီဝန်ဒေါ့စကီးကိုယ်တိုင်က မေဂျာလိဂ်သို့ ပြောင်းရွှေ့ကစားလိုနေမှုနှင့်အတူ လုပ်ခက စာချုပ်ကိစ္စဆွေးနွေးရာမှာ အဓိကနေရာမှ ပါဝင်လာမှာ မဟုတ်ပါဘူး။
ဒါပေမယ့် သူဟာ ဘာစီလိုနာတွင် ဆက်ကစားရေး၊ ဆော်ဒီသို့ ပြောင်းရေးကိုလည်း စဉ်းစားနေပေမယ့်လည်း မေဂျာလိဂ်သို့ ပြောင်းရန် အလေးသာနေပါတယ်။
ချီကာဂိုဖိုင်းယားဟာ ယခု မေဂျာလိဂ်ရာသီတွင် ၂၀၁၇ ခုနှစ်နောက်ပိုင်း ပထမဆုံးအကြိမ်အဖြစ် မေဂျာလိဂ်ပလေးအော့ဖ်အဆင့်သို့အထိ တက်ခဲ့တဲ့အသင်းပါ။
ချီကာဂိုဖိုင်းယားဟာ ရောဘတ်လီဝန်ဒေါ့စကီးအား ၎င်းတို့ရဲ့ 'discovery list' တွင် ထည့်သွင်းထားရာ ၎င်းတို့အား နစ်နာကြေးပေးမှသာလျှင် အခြားမေဂျာလိဂ်ကလပ်များက ခေါ်ယူနိုင်ပါမယ်။
အင်တာမိုင်ယာမီကလည်း လီဝန်ဒေါ့စကီးကို ခေါ်ယူလိုနေပေမယ့်လည်း ချီကာဂိုဖိုင်းယားကသာ သူ့ကို ခေါ်ယူရေး နံပါတ်တစ်ဆုံးဖြတ်ခွင့် ရရှိထားပါတယ်။
အင်တာမိုင်ယာမီဟာ ပြီးခဲ့တဲ့ရာသီအကုန်တွင် ဂျော်ဒီအယ်ဘာ ကစားသမားဘဝမှ အနားယူသွားပြီးနောက် ကလပ်ရဲ့ designated player စာရင်းထဲတွင် မက်ဆီတစ်ဦးတည်းသာ ရှိနေပါတယ်။
ချီကာဂိုဖိုင်ယားဟာ ယခုနှစ် အစောပိုင်းတုန်းက နေမာနှင့် ကီဗင်ဒီဘရိုင်းတို့ကိုလည်း ခေါ်ယူရန် ကြိုးပမ်းခဲ့ဖူးပါတယ်။
ချီကာဂိုမှာ အမေရိကန်တွင် ပိုလန်အသိုင်းအဝိုင်းကြီးတစ်ခု ပိုင်ဆိုင်ထားမှုနှင့်အတူ ချီကာဂိုဖိုင်းယားအနေဖြင့် ရောဘတ်လီဝန်ဒေါ့စကီးအား ခေါ်ယူနိုင်ပါက ကလပ်မှာ ကွင်းတွင်း ကွင်းပြင် အောင်မြင်မှုများ ရယူလာနိုင်ပါမယ်။
လီဝန်ဒေါ့စကီးဟာ ၂၀၂၂ ခုနှစ်တုန်းက ဘိုင်ယန်မြူးနစ်မှ ဘာစီလိုနာသို့ ၄ နှစ်စာချုပ်ဖြင့် ပြောင်းလာပြီးနောက် ၁၆၄ ပွဲကစားထားရာမှာ ၁၀၉ ဂိုးသွင်းထားနိုင်ပါတယ်။
သူဟာ ယခုရာသီတွင် ဘာစီလိုနာအတွက် ၁၇ ပွဲကစားထားရာမှာ ၈ ဂိုးသွင်းထားပါတယ်။