ချဲလ်ဆီးနည်းပြဘဝ အဆိုးရွားဆုံး ၄၈ နာရီ ကြုံခဲ့ရတယ်လို့ ပြောကြားခဲ့ပြီးနောက် ပြဿနာအဆုံးသတ်မှု ပြုလုပ်လာတဲ့ မာရက်စ်ကာ
========================
အန်ဇိုမာရက်စ်ကာက ချဲလ်ဆီးတွင် ပျော်ရွှင်နေကြောင်း ပြောကြားလာကာ ကလပ်အတွင်းလူများနှင့် ပြဿနာတက်ခဲ့မှုအား အဆုံးသတ်လာပါတယ်။
ချဲလ်ဆီးနည်းပြဟာ စနေနေ့တုန်းက အဲဗာတန်နှင့်ပွဲစဉ်အပြီးတွင် ချဲလ်ဆီးနည်းပြဘဝ အဆိုးရွားဆုံး ၄၈ နာရီနှင့် ကြုံခဲ့ရပြီး ကလပ်အတွင်းလူများရဲ့ ပံ့ပိုးကူညီမှု မရခဲ့ကြောင်း ဆိုသွားပါတယ်။
ယနေ့ည ကာဒစ်ဖ်နှင့် ရင်ဆိုင်ရမယ့် ခါရာဘောင်ဖလားကွာတားဖိုင်နယ်ပွဲစဉ်မတိုင်မီ သတင်းစာရှင်းလင်းပွဲမှာတော့ အီတလီလူမျိုးနည်းပြဟာ သူ့ပြောဆိုမှုနှင့်ပတ်သက်ပြီး ထပ်မံပြောစရာမရှိတော့ကြောင်း ဆိုသွားပါတယ်။
ချဲလ်ဆီးတွင် ပျော်ရဲ့လားလို့ မေးမြန်းလာချိန်တွင် မာရက်စ်ကာက "သေချာပေါက် ပျော်ပါတယ်။ ဒါနဲ့ပတ်သက်ပြီး ပြောခဲ့ပြီးပြီ(ပံ့ပိုးမှုမရှိတာ)။ ထပ်ပြီးတော့ ပြောနေစရာ မရှိတော့ပါဘူး။ ဒါနဲ့ပတ်သက်ပြီး ပြောပြီးပါပြီ။ ရှင်းရှင်းလေး ပြောခဲ့တယ်လို့ ထင်တယ်။ ခင်ဗျားအမြင်ကို လေးစားပါတယ်။ ပြီးတော့ ကျုပ်မှာလည်း ထပ်ပြောစရာ မရှိပါဘူး။ မနက်ဖြန်ပွဲအတွက်ပဲ အာရုံစိုက်နေပါတယ်။ ဒီကလပ်ကို ကိုင်တွယ်ပြီးတဲ့နောက် တတိယအကြိမ်ဆီမီးဖိုင်နယ်တက်နိုင်မယ့် အခွင့်အရေးရထားပါတယ်။ ကျုပ်တို့က ထင်ရာ ပြောနိုင်တဲ့ နေရာမှာ ရှိတယ်။ လူတွေရဲ့အမြင်ကို လေးစားပါတယ်။ ဒါပေမယ့် ထပ်လောင်း မပြောချင်တော့ပါဘူး"လို့ ဆိုသွားပါတယ်။
ဒါ့အပြင် မာရက်စ်ကာက ပေါင်ခြံဒဏ်ရာမှ ပြန်လည်ကောင်းမွန်လာပြီဖြစ်တဲ့ ကိုးလ်ပါလ်မာမှာ ယနေ့ည ကာဒစ်ဖ်နှင့်ပွဲစဉ်တွင် ပါဝင်လာမှာ မဟုတ်ကြောင်း အတည်ပြုသွားပါတယ်။ ဒါပေမယ့် ချဲလ်ဆီးဟာ ပွဲပယ်ပြစ်ဒဏ်မှ လွတ်မြောက်လာပြီဖြစ်တဲ့ ကွင်းလယ်ကစားသမားကိုင်စီဒိုကို အသုံပြုလာနိုင်ပြီ ဖြစ်ပါတယ်။
