ချန်ပီယံလိဂ်ဗိုလ်လုပွဲတွင် ပင်နယ်တီလွဲပြီးနောက် ဟိုတယ် ၂၅ လွှာမှ ခုန်ချကာ ကိုယ့်ကိုယ်ကို အဆုံးစီရင်ရန် တွေးခဲ့ကြောင်း ဂျွန်တယ်ရီ ဖွင့်ဟလာ
=======================
ချဲလ်ဆီးအသင်းခေါင်းဆောင်ဂျွန်တယ်ရီဟာ ချန်ပီယံလိဂ်ဗိုလ်လုပွဲတွင် ပင်နယ်တီ လွဲချော်ခဲ့ပြီးနောက် ဘဝအမှောင်ဖုံးတဲ့ ကာလများအကြောင်း ရင်ဖွင့်လာပါတယ်။
ချဲလ်ဆီးအသင်းခေါင်းဆောင်ဟောင်းဟာ ၂၀၀၈ ခုနှစ်တုန်းက ယူနိုက်တက်နှင့် ရင်ဆိုင်ရတဲ့ မော်စကိုချန်ပီယံလိဂ်ဗိုလ်လုပွဲရဲ့ ပင်နယ်တီအဆုံးအဖြတ်တွင် ပင်နယ်တီဝင်လျှင် ချန်ပီယံဖြစ်နိုင်တဲ့ အခွင့်အရေး ကြုံခဲ့ပါတယ်။
ဒါပေမယ့် ဂျွန်တယ်ရီဟာ ခြေချော်ပြီး ပင်နယ်တီ လွဲချော်ကာ ယူနိုက်တက်တို့ ချန်ပီယံလိဂ်ဖလား ဆွတ်ခူးသွားခဲ့ပါတယ်။
ယခုအခါ ဂျွန်တယ်ရီက ချန်ပီယံလိဂ်ဗိုလ်လုပွဲအပြီး မော်စကိုရှိ ဟိုတယ်သို့ ရောက်လာချိန်တွင် စိတ်ဓာတ်ပိုင်း အဆိုးရွားဆုံးဖြစ်နေကာ ဟိုတယ် ၂၅ လွှာမှ ခုန်ချပြီး ကိုယ့်ကိုယ်ကို အဆုံးစီရင်ရန်အထိ တွေးခဲ့ကြောင်း ဖှင့်ဟလာပါတယ်။
Mennie Talks အစီအစဉ်တွင် တယ်ရီက "ပွဲပြီးတော့ ကျုပ်တို့ အားလုံး ဟိုတယ်ပြန်ကြတယ်။ ကျုပ်က ၂၅ လွှာမှာနေတာ။ ပြတင်းပေါက်ကနေ အပြင်ကို ကြည့်ပြီး 'ဘာကြောင့်လဲ? ငါ့ကျမှ ဘာလို့လဲ? လို့ မေးခွန်းထုတ်နေမိတယ်။ ခုန်ချဖို့ အခွင့်အရေး ရှိတယ်လို့တော့ မပြောလိုပါဘူး။ ဒါပေမယ့် အဲဒီတုန်းက ခုန်ချဖို့ တွေးနေမိတယ်။ အဲဒီနောက် ကောင်လေးတွေ ရောက်လာပြီး ကျုပ်ကို ခေါ်လာခဲ့တယ်။ အဲဒီကာလမှာ ဘာမဆို ဖြစ်သွားနိုင်တယ်"လို့ ပြောကြားသွားပါတယ်။
ဂျွန်တယ်ရီဟာ ၂၀၁၂ ခုနှစ်တွင် ချန်ပီယံလိဂ်ဖလား ကိုင်မြှောက်နိုင်ခဲ့ပါတယ်။ ဒပေမယ့်လည်း သူဟာ ဆီမီးဖိုင်နယ်တွင် အနီကတ်ပြသခြင်းခံခဲ့ရကာ ဗိုလ်လုပွဲအား လွဲခဲ့ပါတယ်။
တယ်ရီဟာ ကြီးကျယ်ခမ်းနားတဲ့ ချဲလ်ဆီးကစားသမားဘဝအတွင်းတွင် ပရီးမီးယားလိဂ်ဖလား ၅ ကြိမ်အပါအဝင် ဆုဖလားများစွာ ဆွတ်ခူးခဲ့ပါတယ်။
ဒါပေမယ့် သူဟာ ချန်ပီယံလိဂ်ဗိုလ်လုပွဲတွင် ခြေချော်ကာ ပင်နယ်တီ လွဲမှုရဲ့ စိတ်ဒဏ်ရာအား ယခုတိုင် ရရှိနေတုန်း ဖြစ်နေတုန်း ဖြစ်ပါတယ်။
၎င်းက "ကျုပ်ခေါင်းထဲမှာ အခုအချိန်အထိ ရှိနေတုန်းပဲ။ နှစ်တွေ ကြာလာတော့ မေ့မေ့ပျောက်ပျောက် ဖြစ်လာတာတော့ မှန်တယ်။ ဒါပေမယ့် ပွဲကစားနေတုန်း ဒါကို ကန့်သတ်ထားပေမယ့်အခြေအနေကြုံကြိုက်လာရင် အဲဒါကြီးက ခေါင်းထဲ ရောက်လာတယ်။ အခု အနားယူထားပြီးပြီ။ အပတ်တိုင်း ပွဲကစားဖို့ အာရုံစိုက်စရာ မလိုတော့ဘူး။ ဒါပေမယ့် ဒါက ကျွန်တော့်ကို ခုထိ နှောင့်ယှက်နေတုန်းပါ။ ညနက်သန်းခေါင် အိပ်မက်ဆိုးကနေ နှိုးထလာတတ်တယ်။ 'ဒါ ဖြစ်ခဲ့တယ်'လို့ပဲ တွေးတယ်။ဒါကြီးက အမြဲတမ်း ဖြစ်နေမယ်လို့တော့ မထင်ပါဘူး။ မော်စကိုမှာ ပင်နယ်တီ လွဲပြီးတဲ့အချိန်မှာ ကိုယ့်ကို တကယ်ဂရုစိုက်တဲ့ သူငယ်ချင်းအရင်းက ဘယ်သူဆိုတာ သိလာရတယ်။ ပွဲအပြီးမှာ ရေး(ဝီလ်ကင်)ဖုန်းဆက်ပြီး ကျွန်တော့်ကို အားပေးတယ်။ အခြားသူအချို့လည်း အားပေးကြတယ်။ ရေးက အရမ်းကောင်းတယ်။ တခါတည်း အားပေးတာ မဟုတ်ဘူး"လို့ ဆိုသွားပါတယ်။
