ခြောက်လကြာ ကလပ်လက်မဲ့ဖြစ်ပြီးနောက် လီယွန်နယ်မက်ဆီရဲ့ တွဲကစားခွင့်ရလာတော့မယ့် စပါးစ်နှင့် ယူနိုက်တက်စတားဟောင်း
=====================
အင်တာမိုင်ယာမီဟာ စပါးစ်နှင့် ရီးရဲလ်မက်ဒရစ်ဘယ်နောက်ခံလူဟောင်းဆာဂျီယိုရီဂူလွန်ကို အလွတ်ပြောင်းရွှေ့ကြေးဖြင့် ခေါ်ယူလာပါတယ်။
အသက် ၂၈ နှစ်ရှိ စပိန်နောက်ခံလူဟာ ပြီးခဲ့တဲ့ရာသီအကုန်တွင် စပါးစ်မှ ထွက်ခွာလာပြီးနောက် ကလပ်လက်မဲ့ ဖြစ်နေခဲ့သူ ဖြစ်ပြီး အင်တာမိုင်ယာမီနှင့် ၂၀၂၇ ခုနှစ်၊ ဒီဇင်ဘာလအထိ စာချုပ်ချုပ်ဆိုလာပါတယ်။
ရီဂူလွန်ဟာ ၂၀၂၀ ခုနှစ် စက်တင်ဘာလတွင် ရီးရဲလ်မက်ဒရစ်မှ စပါးစ်သို့ ပြောင်းလာပြီးနောက် ပြီးခဲ့တဲ့ ၃ ရာသီအား ယူနိုက်တက်၊ အက်သလက်တီကိုနှင့် ဘရန့်ဖို့ဒ်တို့တွင် အငှားဖြင့် သွားရောက်ကစားနေခဲ့ရသူ ဖြစ်ပါတယ်။
သူဟာ ပရီးမီးယားလိဂ်ပွဲ ၈၆ ပွဲကစားကာ ၂ ဂိုးသွင်းယူနိုင်ခဲ့ပါတယ်။
ရီဂူလွန်က "အရမ်းကို ရည်မှန်းချက်ကြီးတဲ့ ပရော့ဂျက်တစ်ခုပါ။ အောင်မြင်နေတဲ့ကလပ်က လမ်းမှန်တဲ့လမ်းကြောင်းပေါ်မှာ ရှိနေပါတယ်။ ဒါကပဲ ကျွန်တော့်ကို ဆွဲဆောင်နေတာပါ။ ဆက်လက်နိုင်ပွဲတွေယူပြီး ယှဉ်ပြိုင်မယ်။ ကျွန်တော့် ရည်မှန်းချက်က အောင်နိုင်ရေး၊ လိုအပ်နေတဲ့ ဆုဖလားရယူရေး၊ ပြိုင်ပွဲတိုင်းမှာ အောင်နိုင်ရေး ဖြစ်ပါတယ်"လို့ ပြောကြားသွားပါတယ်။
