ဘင်္ဂလားဒေ့ရှ်နိုင်ငံလုံးဆိုင်ရာ ရွေးကောက်ပွဲများ ဖေဖော်ဝါရီမှာကျင်းပမည်
ဘင်္ဂလားဒေ့ရှ်နိုင်ငံ၏ နိုင်ငံလုံးဆိုင်ရာ ရွေးကောက်ပွဲအသစ်ကို ဖေဖော်ဝါရီလ ၁၂ ရက်နေ့တွင် ကျင်းပသွားမည်ဖြစ်ကြောင်း ရွေးကောက်ပွဲမင်းကြီးချုပ်က ကြာသပတေးနေ့တွင် ပြောကြားခဲ့သည်။ လူရာနှင့်ချီ ေ-သဆုံးကာ ထောင်နှင့်ချီ၍ ဒ-ဏ်ရာရရှိခဲ့သော ဝန်ကြီးချုပ်ဟောင်း ရှိတ်ဟာစီနာကို ပြုတ်ကျစေခဲ့သည့် သီတင်းပတ်ချီကြာသော လူထုအုံကြွမှုများဖြစ်ပြီးနောက် ၁၈ လအကြာတွင် ရွေးကောက်ပွဲအသစ်အတွက် အချိန်ဇယားထွက်ပေါ်လာခြင်းဖြစ်သည်။
ရွေးကော်မင်းကြီးချုပ်အေအမ်အမ် နာဆီရ်အူဒင်က နိုင်ငံတော်သို့ ပြောကြားသောမိန့်ခွန်းတွင် ရွေးကောက်ပွဲကျင်းပမည့်နေ့ရက်ကို အတည်ပြုသွားခဲ့ပြီး ဥပဒေပြုအမတ် ၃၀၀ ကို ရွေးကောက်တင်မြှောက်ရမည့် ရွေးကောက်ပွဲနေ့တွင်ပင် နိုင်ငံရေးပြုပြင်ပြောင်းလဲမှုဆိုင်ရာ ပြည်လုံးကျွတ်ဆန္ဒခံယူပွဲကျင်းပသွားမည်ဟုလည်း ပြောကြားခဲ့သည်။
ဒီဇင်ဘာလ ၁၂ ရက် နေ့မှ ၁၉ ရက်နေ့အထိ ရွေးကောက်ခံကိုယ်စားလှယ်လောင်းအမည်စာရင်း မှတ်ပုံတင်ခြင်းဖြင့် ရွေးကောက်ပွဲလုပ်ငန်းစဉ်စတင်မည်ဖြစ်ကာ ဒီဇင်ဘာလ ၃၀ ရက်နေ့မှ ဇန်နဝါရီလ ၄ ရက် နေ့အထိ ကိုယ်စားလှယ်လောင်းများကို စိစစ်သွားမည်ဖြစ်သည်။ ဇန်နဝါရီ လ၂၀ ရက်နေ့ကို အမည်စာရင်းတင်သွင်းမှုများကို ရုပ်သိမ်းရမည့် နောက်ဆုံးရက်အဖြစ် သတ်မှတ်ထားသည်။
နိုင်ငံတွင် ၂၀၂၄ ခုနှစ် ဇန်နဝါရီလအတွင်းက နောက်ဆုံးရွေးကောက်ပွဲများ ကျင်းပခဲ့ပြီး ဟာစီနာသည် လေးကြိမ်ဆက်တိုက် ဝန်ကြီးချုပ်ရာထူးကို ပြန်လည်ရယူနိုင်ခဲ့သည်။ အဆိုပါရွေးကောက်ပွဲကို သူ၏ အဓိကပြိုင်ဘက်များက သပိတ်မှောက်ခဲ့ပြီး မဲမသမာမှုများလုပ်ခဲ့ကြောင်း သူ့အစိုးရကို စွပ်စွဲခဲ့ကြသည်။
ယခုကျင်းပမည့် ရွေးကောက်ပွဲသည် ၁၉၇၁ ခုနှစ်စစ်ပွဲအပြီး ပါကစ္စတန်ထံမှ လွတ်လပ်ရေးရရှိခဲ့ပြီးနောက်ပိုင်း ၁၃ ကြိမ်မြောက် ရွေးကောက်ပွဲဖြစ်လာမည်ဖြစ်သည်။
ပါတီကို ပိတ်ပင်ထားခြင်းကို ရုပ်သိမ်းပေးရန် ဟာစီနာ၏ ပါတီက တောင်းဆိုထားသကဲ့သို့ ဟာစီနာ၏ သားဖြစ်သူကလည်း အားလုံးပါဝင်သော ရွေးကောက်ပွဲဖြစ်ပါက ဘင်္ဂလားဒေ့ရှ်သည် တည်တည်ငြိမ်ငြိမ်ဖြစ်နိုင်ကြောင်း အေပီသတင်းဌာနနှင့် အင်တာဗျူးတစ်ခုတွင် ပြောဆိုထားခဲ့သည်။
