နယူးကာဆယ်သို့ ပြောင်းခွင့်ရရေးအတွက် အပိုဆုကြေး ဆုံးရှုံးခံခဲ့တဲ့အပြင် လုပ်ခလည်း လျှော့ပေါ့ပေးခဲ့တဲ့ ယိုအာနီဝစ်ဆာ
======================
ယိုအာနီဝစ်ဆာဟာ နယူးကာဆယ်သို့ ပေါင် ၅၅ သန်းဖြင့် ပြောင်းခွင့် ရရှိရေးအတွက် ဘရန့်ဖို့ဒ်ထံမှ ရရန် ရှိတဲ့ အပိုဆုကြေး အကြွေးကို ဆုံးရှုံးခံခဲ့ကြောင်း သိရပါတယ်။
ဝစ်ဆာရဲ့ နယူးကာဆယ်အပြောင်းအရွှေ့က နွေရာသီတုန်းက အလွန်ကြန့်ကြာမှု ဖြစ်ခဲ့ပြီး အပြောင်းအရွှေ့ဈေးကွက်နောက်ဆုံးနေ့တွင်မှ ဖြစ်ပျက်ခဲ့ပါတယ်။
အသက် ၂၉ နှစ်ရှိ ကွန်ဂိုတိုက်စစ်မှူးဟာ နယူးကာဆယ်ဘက်က ကမ်းလှမ်းမှု ၂ ကြိမ်အား ဘရန့်ဖို့ဒ်က ပယ်ချလာမှုနှင့်အတူ အသင်းပြောင်းခွင့်ရရေး သပိတ်မှောက်ခဲ့ရသူလည်း ဖြစ်ပါတယ်။
ဝစ်ဆာဟာ အသင်းပြောင်းခွင့် ငြင်းပယ်ခြင်းခံရပြီးနောက် ကလပ်ဘက်က သူ့အပေါ် ပေးထားတဲ့ ကတိချိုးဖောက်ခဲ့တယ်လို့ ကြေညာချက် ထုတ်ပြန်ပြီး ကလပ်ကို ဝေဖန်ခဲ့ပါသေးတယ်။
နောက်ဆုံးမှာတော့ နယူးကာဆယ်ဟာ ဝစ်ဆာအား ပြောင်းရွှေ့ကြေး ပေါင်သန်း ၅၀ အပြင် ပေါင် ၅ သန်းထပ်မံပေးရမယ့်အချက်ဖြင့် သဘောတူညီမှုရခဲ့ပါတယ်။
ယနေ့တွင် talkSPORT ရဲ့ဖော်ပြလာမှုအရ ဝစ်ဆာဟာ အပြောင်းအရွှေ့ချောမွေ့စွာ ဖြစ်မြောက်လာရေးအတွက် ဘရန့်ဖို့ဒ်ထံမှ ရရန် ရှိတဲ့ အပိုဆုကြေး အကြွေးကို လျှော်ပစ်ခဲ့ကြောင်း သိရပါတယ်။
သူဟာ အသင်းပိုင်ရှင်မက်သော်ဘန်ဟမ်နှင့် တွေ့ဆုံဆွေးနွေးရာတွင် အပြောင်းအရွှေ့ ဖြစ်မြောက်ရေးအတွက် အစွမ်းကုန် လုပ်ဆောင်ပေးခဲ့တာလည်း ဖြစ်ပါတယ်။
သူဟာ ပိုင်ရှင်နှင့် ၂ နာရီကြာ ဆွေးနွေးမှုတွင် နယူးကာဆယ်သို့ ပြောင်းခွင့်ရရေးအတွက် လုပ်ဆောင်နိုင်သမျှ လုပ်ခဲ့တာလည်း ဖြစ်ပါတယ်။ ဒါ့အပြင် သူဟာ နယူးကာဆယ်ဘက်က ကုန်ကျစရိတ်သက်သာလာစေရန်အတွက်လည်း လုပ်ခကို လျှော့ပေါ့ ရယူခဲ့ပါသေးတယ်။
သူဟာ နယူးကာဆယ်သို့ ပြောင်းနိုင်ခဲ့ပေမယ့်လည်း နိုင်ငံအတွက် ကစားစဉ် ဒူးဒဏ်ရာရရှိကာ တစ်ပွဲမျှ မကစားနိုင်သေးပါဘူး။
ဒါပေမယ့် သူဟာ နယူးကာဆယ်အတွက် ပြန်ကစားနိုင်ရန် နီးစပ်နေပြီ ဖြစ်ပြီး စနေနေ့ည ဘန်လေနှင့်ပွဲအတွက် အသင်းလူစာရင်းတွင် ပါဝင်လာနိုင်ဖို့ ရှိနေပါတယ်။
သူဟာ ပြီးခဲ့တဲ့အပတ်မှ စတင်ကာ နယူးကာဆယ်နှင့်အတူ အပြည့်အဝ လေ့ကျင့်ခန်းဆင်းနိုင်ခဲ့ပြီး လေ့ကျင့်ရေးကွင်းပွဲတွင် ပါဝင်ကစားထားနိုင်ပြီးလည်း ဖြစ်ပါတယ်။
နယူးကာဆယ်အတွက် နောက်ထပ် ကောင်းမွန်လာစေတဲ့အချက်ကတော့ ဝစ်ဆာဟာ ကွန်ဂိုရဲ့ အာဖရိကဖလားပြိုင်ပွဲ လူစာရင်းတွင် မပါဝင်လာတာပါ။
ဒါပေမယ့် သူဟာ လက်ရှိအချိန်တွင် အဓိက အထောင်တိုက်စစ်မှူးနစ်ဝယ်တီမိတ်နှင့် နေရာအတွက် ယှဉ်ပြိုင်လာရမှာဖြစ်လို့ ပွဲထွက်ကစားခွင့်ရဖို့တော့ ခက်ခဲနေပါတယ်။
ဂျာမနီတိုက်စစ်မှူးဟာ နွေရာသီတွင် စတုဂတ်မှ ပေါင် ၆၉ သန်းဖြင့် ပြောင်းလာပြီးနောက် နယူးကာဆယ်အတွက် ၇ ဂိုးသွင်းထားနိုင်ပါတယ်။
သူဟာ နောက်ဆုံး ၂ ပွဲတွင် ၁ ဂိုးသွင်းကာ ၁ကြိမ် ဖန်တီးထားပြီး ပရီးမီးယားလိဂ် ၁၁ ပွဲတွင် ၅ ဂိုးသွင်းထားပါတယ်။
