မန်းရွှေစက်တော်ဘုရားပွဲတော် ၂၀၂၆ ခုနှစ် ဇန်နဝါရီ ၂၂ ရက်မှစတင်၍ ၈၆ရက် ကြာ ကျင်းပမည်
မကွေးတိုင်းဒေသကြီး မင်းဘူးခရိုင်မင်းဘူး(စကု)မြို့နယ်ရှိ မန်းရွှေစက်တော်ဘုရား ဗုဒ္ဓပူဇနိယပွဲတော် ကြီးကို ၂၀၂၆ ခုနှစ်ဇန်နဝါရီ ၂၂ ရက်မှ ဧပြီ ၁၇ ရက်အထိ မဟာသင်္ကြန်ရုံးပိတ်ရက်အပါအဝင် ၈၆ ရက်ကြာ ကျင်းပ သွားမည်ဖြစ်ကြောင်းမန်းရွှေစက်တော် ဘုရားပွဲတော်ကျင်းပရေးဦးစီးကော်မတီထံမှ သိရသည်။
မန်းရွှေစက်တော် ဘုရားပွဲ တော်ကြီးကို အစဉ်အလာမပျက် စည်ကားသိုက်မြိုက်စွာကျင်းပနိုင်ရန် မန်းရွှေစက်တော်ဘုရား ဩဝါဒါစရိယ ဆရာတော်ကြီးများထံမှ ဩဝါဒခံယူပြီးဖြစ်ကာ လာမည့် ဇန်နဝါရီ ၂၂ ရက်တွင် စတင်ဖွင့်လှစ်သွားမည်ဖြစ်ကြောင်း ပွဲတော် ကျင်းပရေးဦးစီးကော်မတီဥက္ကဋ္ဌ ခရိုင်အုပ်ချုပ်ရေးမှူး ဦးအေးလွင်က ပြောသည်။
အနယ်နယ်အရပ်ရပ်မှ ဘုရားဖူးလာရောက်ကြသူများ အဆင်ပြေစေရန် တည်းခိုဆောင်နှင့် ဈေးဆိုင်ခန်းများ ဆောက်လုပ်ပေးသွားမည်ဖြစ်ပြီး ရပ်ဝေး၊ ရပ်နီးမှ ဘုရားဖူးလာရောက်ကြမည့် ဘုရားဖူး ရဟန်းရှင်လူ မိဘပြည်သူများအားတည်းခိုဆောင်များ၌ ညအိပ်တည်းခိုနားနေခွင့်ပြုမည်ဖြစ်ကြောင်းသိရသည်။
လက်ရှိတွင် စက်ယန္တယားကြီးများဖြင့် မန်းချောင်း ရေလမ်းကြောင်းပြုပြင်ခြင်း၊ ပွဲတော်မြေနေရာ ပြုပြင်ရှင်းလင်းခြင်းနှင့် အောက်စက်တော်ရာနဂါးအိုင်ပြုပြင်ခြင်းလုပ်ငန်းများကို စတင်ဆောင်ရွက်နေပြီး မန်းချောင်း သောင်ပြင်ပြုပြင်ပြီးပါကတည်းခိုဆောင်နှင့် ဆိုင်ခန်းနေရာများ ဆောက်လုပ်နိုင်ရန် မြေနေရာ သတ်မှတ်ခြင်းနှင့် ဆောက်လုပ်ခြင်းလုပ်ငန်းများ ဆောင်ရွက်သွားမည်ဖြစ်ကြောင်း မန်းရွှေစက်တော် ဘုရားဂေါပကအဖွဲ့ ဥက္ကဋ္ဌ ဦးအေးကိုက ရှင်းပြသည်။
ပွဲတော် ကျင်းပရန် တင်ဒါ၊ လေလံ၊ ခေါ်ယူရောင်းချရေးလုပ်ငန်းများ၊ ဘုရားပရိဝုဏ်အတွင်းထုံး၊ ဆေးသုတ်ခြင်း လုပ်ငန်းများအပြင် တည်ဆောက်ပြုပြင်ထိန်းသိမ်းရေးနှင့် အဆင့်မြှင့်တင်ခြင်းလုပ်ငန်းများ အားလုံးကို ဘုရားပွဲတော်ရက်မတိုင်မီ အပြီးဆောင်ရွက်သွားမည်ဖြစ်ကြောင်း၊ထို့ပြင် မန်းရွှေစက်တော် ဘုရားကြီးရှိ အောက်စက်တော်ရာ (ခြေတော်ရာ)အား ဘုရားဖူးလာရောက်ကြသူများ အလွယ်တကူ အဆင်ပြေချောမွေ့စွာ သွားရောက်ဖူးမြော်နိုင်ရန်အတွက် ဘေလီသံပေါင် အထူးတံတားကို တပ်ဆင် ဆောက်လုပ်သွားမည်ဖြစ်ကြောင်း သိရသည်။
