ပရီးမီးယားလိဂ်ဖလားအား စိန်ခေါ်နိုင်ရန် ရာဇဝင်ဆိုးရှိတဲ့ ခရစ္စမတ်ပွဲကြပ်ကာလကို ကျော်ဖြတ်ရမယ့် ချဲလ်ဆီး
====================
ဒီဇင်ဘာလ ချမ်းအေးမှုက ကျွန်တော်တို့ လူသားတွေအားလုံး ပုံမှန်ဖြတ်ကျော်ရတဲ့အရာ ဖြစ်ပါတယ်။
ဒါပေမယ့် အန်ဇိုမာရက်စ်ကာနှင့် ချဲလ်ဆီးအတွက်ကတော့ ကျန်တဲ့ လူသားတွေ အားလုံးထက် ဒီဇင်ဘာလရဲ့ ကာလတဲ့ ခက်ခဲမှုဒဏ်နှင့် ပိုပြီးတော့ အသားကျနေတဲ့သူတွေပါ။
ပြီးခဲ့တဲ့ခြောက်ရာသီအတွင်းမှာ ချဲလ်ဆီးဟာ ဒီဇင်ဘာလအတွင်း အမှတ် ၁၀၂ မှတ်ဖိုး ကစားခဲ့ရာမှာ ၅၆ မှတ်တည်းပဲ ရယူနိုင်ခဲ့ပါတယ်။ ပြီးခဲ့တဲ့ရာသီတုန်းက ရာသီအစ တာထွက်ကောင်းခဲ့တဲ့ ချဲလ်ဆီးဟာ ခရစ္စမတ်ကာလမှာပဲ ချန်ပီယံဖြစ်ရေး မျှော်လင့်ချက် သဲထဲရေသွန်ဖြစ်ခဲ့ရပါတယ်။
ပြီးခဲ့တဲ့ရာသီတုန်းက မာရက်စ်ကာရဲ့ ချဲလ်ဆီးဟာ ရာသီအဖွင့်ပွဲမှာ မန်စီးတီးကို ရှုံးနိမ့်ပြီးနောက် အဖွင့်ပွဲ ၁၆ ပွဲမှာ ၁ ပွဲတည်းပဲ ရှုံးနိမ့်ကာ ချန်ပီယံဆုအတွက် လီဗာပူးကို စိန်ခေါ်နိုင်ခဲ့ပါတယ်။
ဒါပေမယ့် ဘောက်ဆင်ဒေးမှာ ဖူလ်ဟမ်ကို ရှုံးပြီးနောက် အစ္စဝှစ်ချ်ကို အဝေးကွင်းမှာ ရှုံးနိမ့်ခဲ့သလို ပဲလေ့စ်နှင့် ဘုန်းမောက်တို့နှင့်လည်း ဆက်တိုက် သရေကျခဲ့ပါတယ်။
ယခု မာရက်စ်ကာက ပရီးမီးယားလိဂ်အမှတ်ပေးဇယားအဆင့် ၂ တွင် ရပ်တည်နေတဲ့ ချဲလ်ဆီးအနေဖြင့် ချန်ပီယံဆုကို စိန်ခေါ်နိုင်ရန်အတွက် ဒီဇင်ဘာလပွဲကြပ်ကာလကို အောင်မြင်စွာ ဖြတ်သန်းနိုင်ဖို့ လိုအပ်ကြောင်း သတိပေးလာပါတယ်။
အီတလီလူမျိုးနည်းပြက "ပွဲတွေ ကစားတဲ့အခါ အတွေ့အကြုံရလာတယ်။ ပိုပြီးတော့ ကောင်းလာတယ်။ အခု ကျွန်တော့်အတွက် မက်ဆေ့ချ်က ရှင်းရှင်းလေးပါ။ ဘာစီလိုနာကို နိုင်ရင် အမှတ်ဘယ်လောက်ရလဲ။ သုံးမှတ်။ အာဆင်နယ်ကို နိုင်ရင်ကော။ သုံးမှတ်ပဲ။ လိဒ်ကို နိုင်ရင်ကော့ ဘယ်လောက်ရလဲ။ သုံးမှတ်ပဲ။ ပွဲတွေက အကြောင်းပြချက်ကိုယ်စီနဲ့ အရေးပါတယ်ဆိုတာ နားလည်ပါတယ်။ ဒါပေမယ့် ဘယ်လိုပဲ ဖြစ်ဖြစ် သုံးမှတ်ပါပဲ။ အရေးကြီးတာက လိဒ်ကို နိုင်ဖို့။ နိုင်ပွဲတွေ လိုအပ်နေလို့ပါ။ လိဒ်နဲ့ ဘုန်းမောက် နှစ်ပွဲလုံးက အထူးသဖြင့် အဝေးပွဲတွေဆိုတော့ ချဲလ်ဆီးအတွက် ခက်ခဲနေတယ်။ သူတို့က ဘယ်အသင်းအတွက်မဆို ခက်ခဲပါတယ်။ ဘာစီလိုနာ၊ အာဆင်နယ်ပွဲတွေနဲ့နှိုင်းယှဉ်ရင် ကွဲပြားတဲ့ပွဲ ဖြစ်လာပါမယ်။ ကျွန်တော်တို့ အသင့်ဖြစ်နေဖို့ လိုတယ်။ အတတ်နိုင်ဆုံး နှစ်ပွဲလုံး နိုင်အောင် ကစားရမယ်။ တစ်ပွဲချင်းစီ တွေးရမယ်။ ပထမဆုံးပွဲကို အရင်တွေးရမယ်။ ပြီးမှ နောက်တစ်ပွဲကို အာရုံစိုက်ရမယ်"လို့ ပြောကြားသွားပါတယ်။
ဒါ့အပြင် မာရက်စ်ကာက ဒဏ်ရာကြောင့် အနားယူလာခဲ့ရတဲ့ ကိုးလ်ပါလ်မာမှာ ယနေ့ည လိဒ်နှင့်ပွဲတွင် ပွဲကစားရန် အသင့် ဖြစ်နေပြီ ဖြစ်ကြောင်း၊ မိနစ်အနည်းငယ်ပွဲကစားစေပြီးမှ ပွဲချိန်ပြည့်ကစားစေလာမှာ ဖြစ်ကြောင်း ဆိုသွားပါတယ်။
