စဉ့်ကူးနဲ့ သပိတ်ကျင်းမြို့မှာ လေကြောင်း တိုက်ခိုက်မှုဖြစ်ပြီး ၁၀ ယောက် သေဆုံး

မန္တလေးတိုင်း၊ စဉ့်ကူးနဲ့ သပိတ်ကျင်းမြို့နယ်မှာ မနေ့ နိုဝင်ဘာ ၂၇ ရက်က လေကြောင်း တိုက်ခိုက်မှုတွေ ဖြစ်ပွားခဲ့ပြီး ၁၀ ယောက် သေဆုံးခဲ့တယ်လို့ ဒေသခံတွေနဲ့ ကူညီပေးနေသူတွေဆီက သိရပါတယ်။
မနေ့ မနက် ၉ နာရီခွဲဝန်းကျင်က စဉ့်ကူးမြို့နယ်ရှိ ဝါးရုံကုန်းကျေးရွာမှာ လေကြောင်း တိုက်ခိုက်မှု စတင် ဖြစ်ပွားခဲ့တာဖြစ်ပြီး ငါးယောက် သေဆုံးကာ ၁၀ ယောက် ထိခိုက်ဒဏ်ရာ ရရှိခဲ့တယ်လို့ သိရပါတယ်။
အဲဒီနေ့ ညနေ ၄ နာရီခွဲ ဝန်းကျင်ကလည်း စဉ့်ကူးမြို့နယ်အတွင်းက ပင်လယ်ကြီး၊ ​ရှောက်ပင်ရိုးနဲ့ ပျဥ်းပင်ရွာတို့မှာ လေကြောင်း တိုက်ခိုက်ခဲ့ခြင်းကြောင့် နှစ်ယောက် သေဆုံးကာ နှစ်ယောက် ထိခိုက်ဒဏ်ရာ ရရှိခဲ့တယ်လို့ ကူညီပေးနေသူ တယောက်က ပြောပါတယ်။
“ဝါးရုံကုန်းရွာ လေကြောင်း ဖြစ်စဉ်မှာတော့ ပြင်းထန်ဒဏ်ရာ ရတဲ့သူတွေရှိတယ်။ အဲဒီမှာ လေကြောင်း တိုက်ခိုက်မှု နှစ်ကြိမ်ဖြစ်တယ်။ ဘုန်းကြီးကျောင်းပေါ် ကျတယ်။ ညနေပိုင်း လေကြောင်း ဖြစ်စဉ်မှာတော့ ပျဉ်းပင်ရွာက စာသင်ကျောင်းနားကို ကျတာမှာ အဲဒီမှာ တယောက်က ပွဲချင်းပြီး ဆုံးတယ်။ နောက်တယောက်ကတော့ ဆေးကုသနေရင်း ဆုံးတယ်” လို့ သူက ပြောပါတယ်။
အဲဒီ နိုဝင်ဘာ ၂၇ ရက်နေ့၊ ညနေပိုင်းမှာပဲ သပိတ်ကျင်းမြို့နယ်၊ ချောင်းကြီးကျေးရွာမှာ လေကြောင်း တိုက်ခိုက်မှု ဖြစ်ပွားခဲ့ပြီး သုံးယောက် သေဆုံးခဲ့တယ်လို့ ဒေသခံတွေက ပြောပါတယ်။
“အဲဒီဖြစ်စဉ်က ဖြစ်တာမှန်ပေမယ့် ကျွန်တော်တို့နဲ့ နည်းနည်း အလှမ်းဝေးတဲ့နေရာ ဖြစ်နေတော့ အသေးစိတ်အခြေအနေ မသိရသေးဘူး ဖြစ်နေတယ်။ သေဆုံးသူ သုံးယောက်လို့တော့ အကြမ်းဖျင်းသိထားတယ်။ ဒဏ်ရာအခြေအနေ၊ နောက် အဆောက်အအုံ ထိခိုက်ပျက်စီးမှု ဒါတွေလည်း မသိရသေးဘူး” လို့ ဒေသတွင်း သတင်းရင်းမြစ်က ပြောပါတယ်။
လက်ရှိ လေကြောင်းတိုက်ခိုက်မှု ဖြစ်စဉ်တွေနဲ့ ပတ်သက်လို့ အစိုးရ တာဝန်ရှိသူတွေနဲ့ ဒေသတွင်း လက်နက်ကိုင် တပ်ဖွဲ့တွေက သတင်း ထုတ်ပြန်ထားတာ မတွေ့ရသေးပါဘူး။
စဉ့်ကူးနဲ့ သပိတ်ကျင်းမြို့နယ်မှာ လေကြောင်း တိုက်ခိုက်မှု၊ လက်နက်ကြီး ကျရောက်မှုတွေ မကြာခဏဆိုသလို ဖြစ်ပွားလျက်ရှိတာမှာ ပြီးခဲ့တဲ့ နိုဝင်ဘာ ၂၆ ရက်နေ့ကလည်း သပိတ်ကျင်းမြို့နယ်၊ ချောင်းကြီးကျေးရွာမှာ လေကြောင်း တိုက်ခိုက်မှုကြောင့် လေးယောက် သေဆုံးကာ အဆောက်အအုံ လေးလုံး ပျက်စီးခဲ့တယ်လို့ သိရပါတယ်။
နိုဝင်ဘာ ၇ ရက်ကလည်း စဉ့်ကူးမြို့နယ်၊ ရွှေပြည်ရွာမှာ လေကြောင်း တိုက်ခိုက်မှုကြောင့် ခြောက်ယောက် သေဆုံးကာ ၁၀ ယောက် ထိခိုက်ဒဏ်ရာ ရရှိခဲ့တယ်လို့ သိရပါတယ်။
နိုဝင်ဘာ ၁၂ ရက်နေ့ကလည်း စဉ့်ကူးမြို့နယ်၊ မာလဲတောကျေးရွာမှာ လေကြောင်းတိုက်ခိုက်မှု ဖြစ်ပွားခဲ့ပြီး ငါးယောက်ထက်မနည်း သေဆုံးခဲ့သလို နိုဝင်ဘာ ၂၂ ရက်ကလည်း နတ်ကြီးစင်ရွာမှာ လက်နက်ကြီး ကျရောက်ခဲ့တဲ့အတွက် လေးယောက် သေဆုံးခဲ့တယ်လို့ သိရပါတယ်။
ဒေသတွင်း လက်နက်ကိုင်တပ်တွေဟာ မန္တလေးတိုင်းအတွင်းရှိ မတ္တရာ၊ စဉ့်ကူးနဲ့ သပိတ်ကျင်း မြို့နယ်တွေထဲက အစိုးရစစ်စခန်း အများအပြားကို ပြီးခဲ့တဲ့ ၂၀၂၄ ခုနှစ်၊ နှစ်လယ်ပိုင်းကတည်းက တိုက်ခိုက် ထိန်းချုပ်ထားတာ ဖြစ်တယ်လို့ သိရပါတယ်။
အဲဒီ နယ်မြေတွေကို ပြန်လည် စိုးမိုးနိုင်ဖို့ အစိုးရတပ်တွေက မြေပြင်ကသာမက ဝေဟင်ကပါ လေကြောင်း ပစ်ကူတွေနဲ့ တန်ပြန် ထိုးစစ်ဆင် တိုက်ခိုက်လျက် ရှိတယ်လို့ သိရပါတယ်။
လက်ရှိမှာ မန္တလေး - မတ္တရာ - စဉ့်ကူး - မိုးကုတ် ကားလမ်းအတိုင်း နယ်မြေရှင်းလင်းရေး လုပ်ဆောင်လာတဲ့ အစိုးရတပ်တွေဟာ မတ္တရာနဲ့ စဉ့်ကူး နယ်အစပ်အထိ ရောက်ရှိလာနေပြီး တိုက်ပွဲ ပြင်းထန်‌နေဆဲ ဖြစ်တယ်လို့ သိရပါတယ်။
ဒါကြောင့် မတ္တရာ၊ စဉ့်ကူး၊ သပိတ်ကျင်း စတဲ့ မြို့နယ်တွေက သောင်းနဲ့ချီတဲ့ ဒေသခံတွေဟာ နီးစပ်ရာ တောတောင်တွေအတွင်း တိမ်းရှောင်နေကြရသလို ဧရာဝတီမြစ်ကို ဖြတ်ကူးကာ အနောက်ဘက်ကမ်း စစ်ကိုင်းတိုင်းအတွင်းက မြို့နယ်နဲ့ ကျေးရွာတွေဆီ တိမ်းရှောင်နေကြရတယ်လို့ သိရပါတယ်။