ဘင်္ဂလားဒေ့ရှ်အစိုးရက ဝန်ကြီးချုပ်ဟောင်း ဟာဆီနာအား လွှဲပြောင်းအပ်နှံရန် ဘင်္ဂလားဒေ့ရှ်အစိုးရက အိန္ဒိယကို တိုက်တွန်း
ဘင်္ဂလားဒေ့ရှ်အစိုးရက ဝန်ကြီးချုပ်ဟောင်း ရှိတ်ဟာဆီနာကို လွှဲပြောင်းအပ်နှံရန် အိန္ဒိယကို နိုဝင်ဘာ ၂၃ ရက်က တိုက်တွန်းခဲ့ကြောင်း အေအက်ဖ်ပီသတင်းတွင် ဖော်ပြထားသည်။
ဟာဆီနာသည် ကျောင်းသားများဦးဆောင်သည့် ဆူပူအုံကြွမှုကာလအတွင်း ပြင်းထန်စွာ အင်အားသုံးနှိမ်နင်းမှုနှင့်ပတ်သက်ပြီး ပြီးခဲ့သည့်သီတင်းပတ်အစောပိုင်းက သေဒဏ်ချမှတ်ခံခဲ့ရသည်။
အသက် ၇၈ နှစ်အရွယ် ဟာဆီနာသည် ၂၀၂၄ ခုနှစ် သြဂုတ်လက ရာထူးမှဖြုတ်ချခံခဲ့ရပြီးကတည်းက နိုင်ငံအတွင်းမှ ထွက်ပြေးသွားခဲ့ကာ အိန္ဒိယနိုင်ငံတွင် ပြည်ပြေးအဖြစ် နေထိုင်လျက်ရှိသည်။
ဟာဆီနာသည် ဝန်ကြီးချုပ်အဖြစ်တာဝန်ထမ်းဆောင်ခဲ့ချိန်က အိန္ဒိယနှင့် ဆက်ဆံရေးကောင်းမွန်ခဲ့သူဖြစ်ပြီး အိန္ဒိယအစိုးရ၏ ထောက်ခံမှုကို ရရှိခဲ့သူဖြစ်သည်။
ဘင်္ဂလားဒေ့ရှ် ယာယီအစိုးရအဖွဲ့၏ နိုင်ငံခြားရေးဝန်ကြီးဌာန၏ အကြံပေးပုဂ္ဂိုလ် တူဟစ်ဟော့စိန်ကမူ “ရှိတ်ဟာဆီနာကို လွှဲပြောင်းအပ်နှံဖို့ ကျွန်တော်တို့ စာတစ်စောင်ပေးပို့ခဲ့ပါတယ်”ဟု နိုဝင်ဘာ ၂၁ ရက်က ပြောကြားခဲ့သည်။
ထိုစာထဲတွင် မည်သည့်အကြောင်းအရာများကို ရေးသားထားသည်ဆိုခြင်းကိုမူ ၎င်းက ထုတ်ဖော်ပြောဆိုခဲ့ခြင်းမရှိသော်လည်း ဘင်္ဂလားဒေ့ရှ်သတင်းစာ Prothom Alo ကမူ ယင်းသည် ဟာဆီနာ ထွက်ပြေးသွားခဲ့ပြီးနောက် ၎င်းအားလွှဲပြောင်းအပ်နှံရန် တတိယအကြိမ်မြောက် တရားဝင်တောင်း ဆိုမှုဖြစ်ကြောင်း ဖော်ပြခဲ့သည်။
ဟာဆီနာကို လူသားမျိုးနွယ်အား ဆန့်ကျင်သည့် ရာဇဝတ်မှုများဖြင့် တရားရုံးက နိုဝင်ဘာ ၁၇ ရက်တွင် သေဒဏ်ချမှတ်ခဲ့ပြီးနောက် ဘင်္ဂလားဒေ့ရှ်နိုင်ငံခြားရေးဝန်ကြီးဌာနက ထုတ်ပြန်သည့် ကြေညာချက်တွင် ဟာဆီနာကို ပြန်လည်လွှဲပြောင်းအပ်နှံမှုအတွက် အိန္ဒိယအနေဖြင့် နှစ်နိုင်ငံကြားချုပ်ဆိုထားသည့် စာချုပ်အရ ဆောင်ရွက်ရမည့် တာဝန်ဝတ္တရားရှိကြောင်း ဖော်ပြထားသည်။
