ကစားဖော်မိုက်ကယ်ကိန်းကို ပါးရိုက်မှုကြောင့် အိုင်ဒရက်စ်ဆာဂူယီ အနီကတ်ပြသခြင်းခံရမှုအပေါ် အံ့ဩစရာတုံ့ပြန်မှု ပြုလုပ်လာတဲ့ မိုယက်စ်
======================
အိုးထရက်ဖို့ဒ်တွင် ယူနိုက်တက်အား အနိုင်ရတဲ့ပွဲတွင် အိုင်ဒရက်စ်ဆာဂူယီမှာ ကစားဖော်မိုက်ကယ်ကိန်းအား ပါးရိုက်မှုကြောင့် အနီကတ်ပြသခြင်းခံခဲ့ရပြီးနောက် ကစားသမားများ တစ်ဦးနှင့်တစ်ဦး တိုက်ခိုက်နေမှုအပေါ် သဘောကျကြောင်း အဲဗာတန်နည်းပြဒေးဗစ်မိုယက်စ်က ပြောကြားလာပါတယ်။
အသက် ၃၆ နှစ်ရှိ အလယ်တန်းကစားသမားဟာ ပွဲချိန် ၁၃ မိနစ်တွင် ဘရူနိုဖာနန်ဒက်စ်ရဲ့ ကန်ချက် ဂိုးဝင်လုနီးပါး ဖြစ်သွားခဲ့ပြီးနောက် အကြီးအကျယ် ဒေါသထွက်ကာ နောက်ခံလူမိုက်ကယ်ကိန်းနှင့် ပြဿနာတက်ခဲ့ပါတယ်။
ဂူယီဟာ ကစားဖော်မိုက်ကယ်ကိန်းအား ပါးရိုက်ခဲ့ပြီး အသင်းခေါင်းဆောင်ဂျော်ဒန်ပစ်ဖို့ဒ် ဆွဲခေါ်သွားခြင်းခံခဲ့ရပါတယ်။
ဒိုင်လူကြီးတိုနီဟာရင်တန်ဟာ ချက်ချင်းပင် ဂူယီကို တိုက်ရိုက်အနီကတ်ပြထုတ်ပယ်ခဲ့ပါတယ်။
ဂူယီဟာ အနီကတ်ပြသခံရပြီးချိန်တွင်လည်း အကြီးအကျယ်ဒေါသထွက်နေခဲ့ပြီး ပစ်ဖို့ဒ်က အင်္ကျီကော်လံကို ဆွဲခေါ်ခဲ့ရပါတယ်။
အဲဗာတန်ဟာ ၇၇ မိနစ်တိုင်တိုင် တစ်ယောက်အလျှော့ဖြင့် ကစားခဲ့ရပေမယ့်လည်း ကီယာနန်ဒေါ်ဘူရီဟေးလ်ရဲ့ တစ်လုံးတည်းသော အနိုင်ဂိုးဖြင့် ယူနိုက်တက်ကို အနိုင်ရခဲ့ပါတယ်။
ပွဲအပြီးတွင် ဒေးဗစ်မိုယက်စ်က "ဘာမှ မဖြစ်ခဲ့ဘူးဆိုရင် ကွင်းအတွင်းမှာ ရှိတဲ့ လူတိုင်းအံ့ဩသင့်ကြလိမ့်မယ်။ ဒိုင်လူကြီးလည်း ဒါနဲ့ပတ်သက်ပြီး အနည်းငယ်ကြာကြာ တွေးမိပါလိမ့်မယ်။ ဘောလုံးစည်းမျဉ်းအရ ခင်ဗျားသာ ကစားဖော်ကို ပါးရိုက်ရင် ပြဿနာတက်ပါပြီ။ တဖက်က ကြည့်ရင် တစ်ယောက်ယောက်က မသင့်တော်တာလုပ်မိလို့ ကစားသမားတွေ အချင်းချင်း ရန်ဖြစ်နေကြတာကို သဘောကျတယ်။ မာကျောမှုနဲ့ ခံနိုင်ရည်ရှိမှုကို လိုချင်ရင် တစ်ယောက်ယောက်ကတော့ လုပ်ဆောင်ရပါမယ်။ အထုတ်ခံရလို့ စိတ်ပျက်ပါတယ်။ ဒါပေမယ့် ကျွန်တော်တို့က ဘောလုံးသမားတွေ ဖြစ်ကြတယ်။ ကစားဖော်ကို ဒေါသထွက်ကြရတယ်။ အထုတ်ခံရမှုအတွက် သူလည်း တောင်းပန်ခဲ့တယ်။ သူဟာ ကစားသမားတွေကို ချီးကျူးခဲ့တယ်။ နိုင်ပွဲအတွက် ကျေးဇူးလည်း တင်ခဲ့တယ်။ ဖြစ်ပျက်ခဲ့တာတွေအတွက် တောင်းပန်ခဲ့တယ်"လို့ ပြောကြားသွားပါတယ်။
ဝါရင့်ကွင်းလယ်ကစားသမားဂူယီဟာ ပွဲအပြီးတွင် ယင်းအဖြစ်အပျက်အတွက် လူသိရှင်ကြား တောင်းပန်မှု ပြုလုပ်ခဲ့ပါတယ်။
