မက်တိုမီးနေးနှင့် ရော်နယ်ဒိုတို့ကဲ့သို့ Overhead Kick ကန်ချက်ဖြင့် ဂိုးသွင်းရန် ကြိုးပမ်းရာမှ အနီကတ်ပြသခြင်းခံခဲ့ရတဲ့ အန်တိုနီ
======================
ဘက်တစ်စတားအန်တိုနီဟာ ခရစ္စတီယာနိုရော်နယ်ဒို၊ စကော့မက်တိုမီးနေးတို့ကဲ့သို့ Overhead Kick ဖြင့် ဂိုးသွင်းယူရန် ကြိုးပမ်းရာမှာ ပြိုင်ဘက်ကို ကန်မိလို့ တိုက်ရိုက်အနီကတ်ပြထုတ်ပယ်ခြင်းခံခဲ့ရပါတယ်။
ဘရာဇီးတောင်ပံကစားသမားဟာ နွေရာသီတုန်းက ယူနိုက်တက်မှ ဘက်တစ်သို့ အပြီးသတ် ပြောင်းခဲ့သူလည်း ဖြစ်ပါတယ်။
အသက် ၂၅ နှစ်ရှိ အန်တိုနီဟာ အေဂျက်စ်မှ ပေါင် ၈၂ သန်းဖြင့် ပြောင်းလာပြီးနောက် ယူနိုက်တက်တွင် ၃ ရာသီ ကစားစဉ်အတွင်း ဆက်တိုက်ခြေစွမ်းပြနိုင်ရေး ရုန်းကန်ခဲ့ရသူလည်း ဖြစ်ပါတယ်။
ဒါပေမယ့် သူဟာ ဘက်တစ်သို့ အငှားဖြင့် သွားကစားစဉ် အကောင်းဆုံးပုံစံ ပြန်လည် ရရှိကာ အပြီးသတ်ပြောင်းခွင့်ရခဲ့ပါတယ်။
သူဟာ ယခုရာသီတွင်လည်း ၄ ဂိုးသွင်းကာ ခြေစွမ်းပြနေပါတယ်။
ဒါပေမယ့် သူဟာ ဂီရိုနာနှင့်ပွဲမှာတော့ Overhead Kick ဖြင့် ဂိုးသွင်းရေး ကြိုးပမ်းရာမှာ ပြိုင်ဘက်ကစားသမားဂျိုယေးရိုကာရဲ့ မျက်နှာကို ကန်မိခဲ့ပါတယ်။
ဒိုင်လူကြီးဟာ ကွင်းဘေးမော်နီတာတွင် စစ်ဆေးကြည့်ရှုပြီးချိန်မှာတော့ အန်တိုနီအား တိုက်ရိုက်အနီကတ်ပြသခဲ့ပါတယ်။
ဘရာဇီးအတွက် ၁၆ ပွဲကစားထားတဲ့ အန်တိုနီဟာ ဂီရိုနာနှင့်ပွဲမှ အနီကတ်အတွက် ပရိသတ်များကို တောင်းပန်သွားခဲ့ပါတယ်။
အဆိုပါပွဲစဉ်မှာ ၁ ဂိုးစီသရေဖြင့် ပြီးဆုံးသွားပြီး ဘက်တစ်မှာ အဆင့် ၅ နေရာတွင် ရပ်တည်နေပါတယ်။
