ပေါ်ဆန်းဆန် ဈေးတည်ငြိမ်ရေး သက်သာစျေးနှုန်းဖြင့် ရောင်းမည်
-------------------
ရန်ကုန်တိုင်းဒေသကြီးအတွင်း ပေါ်ဆန်းဆန် ဈေးနှုန်းတွေ တည်ငြိမ်မှန်ကန်စေဖို့ နိုဝင်ဘာ(၂၆) ရက်က စတင်ပြီး စျေးကွက်ထဲမှာ ဖြစ်ပေါ်နေတဲ့ ဈေးနှုန်းထက် ၁၀ ရာခိုင်နှုန်းကနေ ၁၅ ရာခိုင်နှုန်းထိ သက်သာတဲ့ ဈေးနှုန်းတွေနဲ့ တိုက်ရိုက်ရောင်းချပေးသွားမယ်လို့ မြန်မာနိုင်ငံဆန်စပါးအသင်းချုပ်ကနေ သိရပါတယ်။
စျေးကွက်ထဲမှာ ဖြစ်ပေါ်နေတဲ့ ဈေးနှုန်းထက် သက်သာတဲ့ ဈေးနဲ့ရောင်းပေးမှာဖြစ်ပြီး ဈေးနှုန်းတွေကိုတော့ ရောင်းချပေးမဲ့နေ့မှာ အတိအကျ ထုတ်ပြန်ပေးမှာ ဖြစ်တယ်လို့ မြန်မာနိုင်ငံဆန်စပါးအသင်းချုပ်ဥက္ကဋ္ဌ ဦးရဲမင်း အောင်က ပြောပါတယ်။ အခုလို ရောင်းချပေးတာကို မြန်မာနိုင်ငံဆန်စပါးအသင်းချုပ်နဲ့ မြန်မာနိုင်ငံ ဆန်စပါး ကုန်သည်များအသင်းတို့က ပူးပေါင်းဆောင်ရွက်သွားမှာပါ။
စားသုံးသူ အိမ်ထောင်စုတွေဆီ ၂၄ ပြည် အိတ်အကြီးကို အိမ်အရောက်ပို့စနစ်နဲ့ ရောင်းပေးမှာဖြစ်ပြီး အိတ်အသေး ကိုတော့ ရပ်ကွက်တွေ၊ ဈေးတွေမှာ သတ်မှတ်ရက်အလိုက် လှည့်လည်ရောင်းချပေးသွားမှာ ဖြစ်တယ်လို့ သိရပါ တယ်။ ဒါ့အပြင် ရန်ကုန်တိုင်းဒေသကြီးအတွင်း ပေါ်ဆန်းဆန် သိုလှောင်ဖြန့်ဖြူး ရောင်းချနေသူတွေနဲ့ လက်လီ ဆိုင်တွေက မြန်မာနိုင်ငံဆန်စပါးကုန်သည်များအသင်း၊ ဝါးတန်းကုန်စည်ဒိုင်တို့နဲ့ ဆက်သွယ်ပြီး ပူးပေါင်းပါဝင်ဖို့ လိုအပ်တယ်လို့လည်း အသိပေးထားပါတယ်။
