မတ္တရာမှာ စစ်ရေး ပိုတင်းမာလာပြီး ရွာလုံးကျွတ် စစ်ရှောင်မှုများလာကာ လက်နက် ကြီးကြောင့် သေဆုံးသူ နဲ့ ဒဏ်ရာရသူတွေရှိ
မန္တလေးတိုင်း၊ မတ္တရာမြို့နယ်ကို အပြည့်အဝထိန်းချုပ်နိုင်ဖို့အတွက် အစိုးရတပ်တွေက ထိုးစစ်ဆင် တိုက်ခိုက်နေတာကြောင့် စစ်ရေးအခြေအနေ ပိုပြင်းထန်လာနေတယ်လို့ သိရပါတယ် ။
လက်ရှိမှာ အစိုးရတပ်တွေက မတ္တရာမြို့နယ်အတွင်းရှိ နေရောဒေသ တော်တော်များများကို ပြန်လည်ရယူ ထိန်းချုပ်ထားနိုင်ပြီး ဒေသတခုလုံး အပြည့်အဝ ရရှိဖို့အတွက် လေကြောင်း ၊ မြေပြင်ထိုးစစ် ၊ ဒရုန်းတွေနဲ့ပါ ထိုးစစ်ဆင် တိုက်ခိုက်မှုရှိလာ နေတာ ဖြစ်တယ်လို့ သိရပါတယ် ။
မြေပြင် စစ်ရေးအခြေအနေ တင်းမာလာတဲ့ အခြေအနေတွေကြောင့် ကျေးရွာတော်တော်များများလည်း စစ်ဘေးရှောင်နေကြရပြီး ရွှေ့ပြောင်းစစ်ရှောင်ဖို့ ခက်ခဲတဲ့ အနာကြီးရောဂါဝေဒနါရှင်တွေနဲ့ သက်ကြီးရွယ်အိုတွေသာ ရွာမှာ ကျန်ရှိနေတယ် လို့သိရပါတယ်။
" အနီးအနားရွာတွေလည်း အကုန်ရှောင်ကုန်ကြပြီ။ နံ့သာမြိုင် ရွာလည်း တရွာလုံးနီးပါး ရှောင်ကုန်ပြီ မရှိကြတော့ဘူး ။ မရှောင်နိုင်တာဆိုရင် ရိပ်သာမှာရှိတဲ့ အနာကြီးရောဂါသည် နဲ့ သက်ကြီးရွယ်အိုတွေပဲ ကျန်တော့တယ် ။အခုဆိုရင် ရိပ်သာမှာ အနာကြီးရောဂါသည် နဲ့ သက်ကြီးဘိုးဘွား ၁၀၀ လောက်ရှိပါတယ် ။ရွာထဲကနေ ရောက်လာသူတွေရော ပါပါတယ်။ အားလုံးက မရွှေ့မပြောင်း မရှောင်နိုင်လို့ နံ့သာမြိုင်ရိပ်သာ မှာပဲ တရားအားထုတ်ရင်း ဆက်နေနေ ကြပါတယ်။ အဖိုး အဖွားတွေကလည်း နေရာ မပြောင်းချင်တော့ဘဲ တရားအားထုတ်ပြီး နေထိုင်ဖို့ပဲ ပြောကြပါတယ်။ " လို့ မတ္တရာမြို့နယ် ရေနံသာကျေးရွာ အုပ်စုမှ ဒေသခံက ပြောပါတယ် ။
လက်ရှိ မတ္တရာမြို့နယ် မြောက်ပိုင်းမှ စစ်ရှောင်နေကြရတဲ့ ကျေးရွာဒေသခံတွေဟာ စဥ့်ကူးကတဆင့် စစ်ကိုင်းတိုင်းဘက်ကို သွားရောက် စစ်ရှောင်တာရှိသလို စစ်ရှောင်စခန်းတွေမှာ နေကြတာလည်း ရှိကြောင်း သိရပါတယ်။
စစ်ရေးအခြေအနေကြောင့် ကျေးရွာတွေအချို့မှာတော့ လက်နက်ကြီး ကျရောက်ပေါက်ကွဲမှုတွေဖြစ်ပွားမှုရှိနေပြီး လူသေဆုံးမှု နဲ့ အဆောက်အဦ ထိခိုက် ပျက်စီးမှုတွေ ရှိနေတယ်လို့ သိရပါတယ် ။
နိုဝင်ဘာ ၂၃ ရက်နေ့ နေ့လယ်ပိုင်းက မတ္တရာမြို့နယ် ၊ နတ်ကြီးစဥ် ကျေးရွာမှာ လက်နက်ကြီး ကျရောက်ပေါက်ကွဲပြီး လူလေးယောက် သေဆုံးကာ လေးယောက် ထိခိုက်ဒဏ်ရာ ရရှိခဲ့တယ်လို့ သိရပါတယ် ။
နိုဝင်ဘာ ၁၉ ရက်ကလည်း ရေနံသားကျေးရွာအုပ်စု ၊ နံ့သာမြိုင်ရွာထဲကို လက်နက်ကြီး ကျရောက်ပေါက်ကွဲမှု ရှိခဲ့ပြီး အဆောက်အဦ ထိခိုက်ပျက်စီးမှု ရှိခဲ့တယ်လို့ သိရပါတယ်။
" တချို့ရွာတွေမှာက အိမ်စောင့်ကျန်တဲ့ သူတို့ အ သက်ကြီးသူ တချို့ပဲ ရှိတယ် ။ သူတို့ကျ ဇက်ကူးရှောင်ဖို့လည်း မလွယ်ကြဘူးလေ ။ လက်နက်ကြီး ပေါက်ကွဲမှုတွေကတော့ ရှိတယ် ။ ရေနံ့သာ ၊တံငါဘက်ကလည်း အခြေအနေ သိပ်မကောင်းတာ ကြာပြီ။ သွားလာရေးကို မပြေတော့ဘူး ။ ဖုန်းလိုင်းလေး ရနေလို့ တော်သေးတယ် ။အခု စစ်တပ်က စကျင်ရွာဘက်အထိ ရောက်နေပြီသိရတယ်။ ရေနံ့သာဘက်မှာလည်း ရှိနေတယ် ။ စကျင်ပြီးရင် နတ်ကြီးစဥ်ရှိမယ် ။ အဒီကနေ ဆက်တတက်မယ်ဆိုရင် စဥ့်ကူးဘက်ကို ရောက်နိုင်တယ် ။ " လို့ ဒေသခံ နောက်တယောက်က ပြောပါတယ်။
လက်ရှိမှာ အစိုးရတပ်တွေက အင်အားအများအပြားနဲ့ မြေပြင် စစ်ကြောင်းထိုးပြီး ထိုးစစ်ဆင်တိုက်ခိုက်နေကြောင်း ၊ ဒေသတွင်းလက်နက်ကိုင် တပ်ဖွဲ့ကလည်း ကျန်ရှိဒေသကို လက်မလွှတ်ရရေး နဲ့ စဥ့်ကူးမြို့နယ်ဘက်ကို ထိုးဖောက် ဝင်ရောက်လာမှု မရှိစေရေးအတွက် ခုခံကာကွယ်တိုက်ခိုက် နေတဲ့အတွက် တိုက်ပွဲ ပြင်းထန်နေတာ ဖြစ်တယ်လို့ သိရပါတယ် ။
အစိုးရတပ်တွေက နိုဝင်ဘာ ၆ ရက်မှာ ဆည်တော်ကြီး ရေလှောင်တမံနဲ့ အင်ကြင်းမြိုင် လေကြောင်းရန်ကာကွယ်ရေး တပ်စခန်းတွေကို ပြန်လည်ရယူ ထိန်းချုပ်ခဲ့တယ်လို့ သိရပါတယ်။
