မလေးရှားမှာ ၁၆ နှစ်အောက်အရွယ်တွေကို လူမှုကွန်ရက်အသုံးပြုမှု ပိတ်ပင်ဖို့ စီစဉ်
မလေးရှားနိုင်ငံဟာ လာမယ့်နှစ်မှစပြီး အသက် ၁၆ နှစ်အောက်အရွယ်တွေကို လူမှုကွန်ရက်အသုံးပြုခွင့် ပိတ်ပင်ရန် စီစဉ်ထားပြီး ကလေးသူငယ်တွေ ဘေးကင်းရေးဆိုင်ရာ စိုးရိမ်မှုတွေကြောင့် ဒစ်ဂျစ်တယ်ပလက်ဖောင်းတွေကို ဝင်ရောက်ခွင့် ကန့်သတ်တဲ့ နိုင်ငံတွေစာရင်းမှာ ပါဝင်လာတော့မှာဖြစ်ပါတယ်။
မလေးရှားအစိုးရအနေနဲ့ သြစတြေးလျနဲ့ အခြားနိုင်ငံတွေမှာ လူမှုကွန်ရက် အသုံးပြုမှုအတွက် အသက်အရွယ်ကန့်သတ်ချက်တွေ ချမှတ်တဲ့ ယန္တရားတွေကို ပြန်လည်သုံးသပ်နေပြီး လူငယ်တွေ ဆိုက်ဘာအနိုင်ကျင့်မှု၊ ငွေကြေးလိမ်လည်မှုတွေနဲ့ ကလေးသူငယ်လိင်ပိုင်းဆိုင်ရာ အလွဲသုံးစားပြုမှုလိုမျိုး အွန်လိုင်းအန္တရာယ်တွေကနေ ကာကွယ်ရန် လိုအပ်ကြောင်း ဆက်သွယ်ရေးဝန်ကြီး ဖာမီ ဖာဇီးလ်က ပြောပါတယ်။
"နောက်နှစ်မှာ လူမှုကွန်ရက် ပလက်ဖောင်းတွေအသုံးပြုခွင့်အတွက် အသက် ၁၆ နှစ်အောက် အရွယ်တွေကို အကောင့်ဖွင့်တာ တားမြစ်ဖို့ မလေးရှားအစိုးရက ဆုံးဖြတ်လိမ့်မယ်လို့ ဆိုပါတယ်။
ကလေးတွေရဲ့ ကျန်းမာရေးနဲ့ ဘေးကင်းရေးအပေါ် လူမှုကွန်ရက်တွေရဲ့ အကျိုးသက်ရောက်မှုဟာ ကမ္ဘာလုံးဆိုင်ရာ စိုးရိမ်မှုတခု ဖြစ်လာခဲ့ပြီး TikTok၊ Snapchat၊ Google ၊ Facebook၊ Instagram နဲ့ WhatsApp စတာတွေ အသုံးပြုပြီး စိတ်ပိုင်းဆိုင်ရာ ဆိုးကျိုး သက်ရောက်မှုတွေကြောင့် ဒီပလက်ဖောင်းတွေကို ပိုင်ဆိုင်တဲ့ ကုမ္ပဏီတွေဟာ အမေရိကန်ပြည်ထောင်စုမှာ တရားစွဲဆိုမှုတွေနဲ့ ရင်ဆိုင်နေရပါတယ်။
ဩစတြေးလျမှာတော့ ဆယ်ကျော်သက်တွေအတွက် ကျယ်ပြန့်တဲ့ ပိတ်ပင်မှုတခုအောက်မှာ လာမယ့်လကစပြီး အသက် ၁၆ နှစ်အောက်အသုံးပြုသူတွေအတွက် ဖွင့်ထားတဲ့အကောင့်များကို ပိတ်ပစ်တော့မှာ ဖြစ်ပါတယ်။ ပြင်သစ်၊ စပိန်၊ အီတလီ၊ ဒိန်းမတ်နဲ့ ဂရိတို့ဟာလည်း အသက်အတည်ပြု အက်ပ်အတွက် ပုံစံတခုကို ပူးတွဲစမ်းသပ်နေကြပါတယ်။
မလေးရှားရဲ့ အိမ်နီးချင်း အင်ဒိုနီးရှားနိုင်ငံဟာလည်း လူမှုမီဒီယာအသုံးပြုသူတွေအတွက် အနည်းဆုံးအသက်ကို သတ်မှတ်ရန် စီစဉ်ထားကြောင်း ဇန်နဝါရီလမှာ ပြောကြားခဲ့ပေမယ့် နောက်ပိုင်းမှာတော့ နည်းပညာကုမ္ပဏီတွေအနေနဲ့ အပျက်သဘောဆောင်တဲ့ အကြောင်းအရာတွေကို စစ်ထုတ်ပြီး ပိုမိုတင်းကြပ်တဲ့ အသက်အတည်ပြုခြင်းဆိုင်ရာ အစီအမံတွေ ချမှတ်ဖို့ စည်းမျဉ်းထုတ်ပြန်ခဲ့ပါတယ်။
မလေးရှားကတော့ အွန်လိုင်းလောင်းကစားနဲ့ လူမျိုးရေး၊ ဘာသာရေး၊ တော်ဝင်မျိုးနွယ်တွေနဲ့ သက်ဆိုင်တဲ့ ပို့စ်တွေအပါအဝင် အန္တရာယ်ရှိတဲ့ အကြောင်းအရာတွေ မြင့်တက်လာတယ်ဆိုကာ မကြာသေးမီနှစ်တွေအတွင်း လူမှုကွန်ရက် ကုမ္ပဏီတွေကို ပိုမိုစစ်ဆေး တင်းကြပ်ခဲ့ပါတယ်။
မလေးရှားမှာ အသုံးပြုသူ ရှစ်သန်းကျော်ရှိတဲ့ လူမှုကွန်ရက် ပလက်ဖောင်းတွေနဲ့ မက်ဆေ့ချ်ဝန်ဆောင်မှုတွေဟာ ဇန်နဝါရီလမှာ အသက်ဝင်ခဲ့တဲ့ စည်းမျဉ်းသစ်တခုအရ လိုင်စင်ရယူဖို့ လိုအပ်ပါတယ်။
