တန့်ဆည် ကံထူးမရွာ လေကြောင်းတိုက်ခိုက်မှု ခြောက်ယောက်သေပြီး လေးယောက်ဒဏ်ရာရ
စစ်ကိုင်းတိုင်း ၊တန့်ဆည်မြို့နယ်ထဲက PDF ထိန်းချုပ်ထားတဲ့ ကံထူးမရွာကို ဒီကနေ့နိုဝင်ဘာ ၂၄ ရက်နေ့ မနက်ပိုင်းမှာ လေကြောင်း တိုက်ခိုက်မှုဖြစ်ပွားခဲ့ပြီး ခြောက်ယောက်သေဆုံးကာ လေး ယောက် ထိခိုက်ဒဏ်ရာ ရရှိခဲ့တယ်လို့ သိရပါတယ်။
ဒီကနေ့ မနက်အစော ၁ နာရီ ကျော်လောက်မှာ ကံထူးမရွာရှိ ဆေးရုံနဲ့ အနီးတဝိုက်ကို လေကြောင်းကနေ ဗုံးကြဲချ ခံခဲ့ရတာဖြစ်ပြီး ဆေးရုံအဆောက်အဦ နဲ့ ဆိုင်အချို့လည်း ထိခိုက်ပျက်စီးမှု ရှိခဲ့တယ်လို့ ကနဦး သိရပါတယ်။
" ဆေးရုံ နဲ့ သူ့နောက်ကျောက ကားဝပ်ရှော့ကို အကြဲခံရတယ် သိရတယ်။သေဆုံးတာက ယောကျ်ားလေး ခြောက်ယောက်ပါ ။ ဒဏ်ရာရသူတွေလည်းရှိပေမယ့် အခြေအနေ သေချာမသိရသေးဘူး။ " လို့ စစ်ရှောင်အရေး ကူညီနေသူက ပြောပါတယ်။
လက်ရှိမှာ ထိခိုက်ဒဏ်ရာ ရရှိသူတွေကို ဆေးဝါးကုသမှုအပိုင်း ဆောင်ရွက်နေကြောင်း သိရပါတယ် ။
ယခုဗုံးကြဲခံရတဲ့ ဆေးရုံနဲ့ ကားဝပ်ရှော့က ဒေသတွင်းလက်နက်ကိုင်တွေရဲ့ ဆိုင်ကယ် ၊ကားတွေကို ပြုပြင်တဲ့နေရာဖြစ်သလို ဆေးဝါးကုသတဲ့ ဆေးရုံဖြစ်တာ ကြောင့် အစိုးရတပ်မှ လေကြောင်းကနေ တိုက်ခိုက်ခဲ့တာ ဖြစ်ကြောင်း စစ်တပ်ထောက်ခံသူတွေက ပြောဆိုနေတာ တွေ့ရပါတယ်။
မနေ့က နိုဝင်ဘာလ ၂၃ ရက်နေ့ကလည်းစစ်ကိုင်းတိုင်း၊ ပုလဲမြို့နယ်မှာ လေကြောင်းကနေ တိုက်ခိုက်ခံခဲ့ရပြီး လူသုံးယောက် သေဆုံးမှုရှိခဲ့တယ်လို့ သိရပါတယ်။
စက်တင်ဘာလ ၂၆ ရက်နေ့ကလည်း ကံထူးမရွာမှာ လေကြောင်းတိုက်ခိုက် ခံခဲ့ရပြီး ၁၁ ယောက်သေဆုံးကာ ကိုးယောက်ထိခိုက်ဒဏ်ရာရရှိခဲ့ တယ်လို့ သိရပါတယ်။
ကံထူးမရွာမှာ နယ်မြေရဲစခန်းရှိပြီး PDF တွေက ၂၀၂၄ ခုနှစ် မတ်လမှာ ကံထူးမရွာကို ထိန်းချုပ်ခဲ့တာ ဒီနေ့ထိဖြစ်တယ်လို့သိရပါတယ်။
ကံထူးမရွာကို ထိန်းချုပ်နိုင်ဖို့အတွက် PDF တွေက ၂၀၂၄ ခုနှစ် ဖေဖော်ဝါရီလမှာ နယ်မြေရဲစခန်းကို ဝင်ရောက်တိုက်ခိုက်ခဲ့ရာ တိုက်ပွဲပြင်းထန်ခဲ့ပြီး စခန်းကိုမီးရှို့ဖျက်ဆီးခဲ့ကြောင်း ၊ အဲဒီနောက် အစိုးရ တပ်ဘက်ကလည်း လေကြောင်းတိုက်ခိုက်မှုတွေ ပြုလုပ်ခဲ့တာကြောင့် သေဆုံးသူနဲ့ ဒဏ်ရာရရသူတွေရှိခဲ့တယ်လို့သိရပါတယ်။
