အက်စတွန်ဗီလာဂိုးသမား မာတီနက်ဇ်ကို ဇန်နဝါရီမှာ ခေါ်ယူဖို့ အင်တာမီလန် စိတ်ဝင်စားနေ
အင်တာမီလန်အသင်းဟာ အက်စတွန်ဗီလာအသင်းက အာဂျင်တီးနားဂိုးသမား မာတီနက်ဇ်ကို လာမယ့် ဇန်နဝါရီအပြောင်းအရွှေ့စျေးကွက်မှာ ခေါ်ယူဖို့ စိတ်ဝင်စားနေကြောင်း သိရပါတယ်။
အက်စတွန်ဗီလာနည်းပြ အူနိုင်းအမ်မရီက မာတီနက်ဇ်ကို ရောင်းထုတ်ပြီး ရရှိတဲ့ငွေကြေးနဲ့ လူငယ်ကစားသမားတွေ အားဖြည့်ဖို့ စီစဉ်နေတာကြောင့် အင်တာမီလန်အသင်းက စောင့်ကြည့်နေကြောင်း သိရပါတယ်။
မာတီနက်ဇ်(၃၃ နှစ်)ဟာ ၂၀၂၀ မှာ အာဆင်နယ်ကနေ အက်စတွန်ဗီလာအသင်းကို ပြောင်းရွှေ့ခဲ့ပြီး အဲဒီအချိန်ကတည်းက လက်ရှိအချိန်အထိ အသင်းရဲ့ အမာခံကစားသမားအဖြစ် ရပ်တည်နေပေမဲ့ ပြီးခဲ့တဲ့နွေရာသီမှာ မန်ယူအသင်းဆီ ပြောင်းရွှေ့ဖို့ ကြိုးပမ်းခဲ့တာကြောင့် အူနိုင်းအမ်မရီက ရောင်းထုတ်ဖို့ လိုလားနေခြင်းဖြစ်ကြောင်းလည်း သိရပါတယ်။
ဒါ့အပြင် အူနိုင်းအမ်မရီက နိုဝင်ဘာလဆန်းမှာ သူ့ကို ဒုတိယအသင်းခေါင်းဆောင်အဖြစ်ကနေ ဖယ်ရှားခဲ့တာကြောင့် ဇန်နဝါရီမှာ ကမ်းလှမ်းမှုတွေကို လက်ခံစဉ်းစားတော့မယ်လို့ သတင်းထွက်လာတာပါ။
အက်စတွန်ဗီလာအသင်းဟာ မန်စီးတီးကနေ ထွက်ခွာဖို့ ဆန္ဒရှိနေတဲ့ အင်္ဂလန်ဂိုးသမား ဂျိမ်းစ်ထရက်ဖို့ဒ်ကို မာတီနက်ဇ်နေရာ အစားထိုးဖို့ ပစ်မှတ်ထားနေကြောင်းလည်း သိရပါတယ်။
