ထိုင်းနိုင်ငံသို့ တရားမဝင် ဝင်ရောက်လာသူ နိုင်ငံခြားသား ၃၉ ဦးကို ထိုင်း အထူးတပ်ဖွဲ့ ဖမ်းဆီးရမိ
ထိုင်း အထူးတပ်ဖွဲ့ ရာဇမနူ သည် တာ့ခ်ခရိုင်၊ မဲဆောက်မြို့နယ်၊ တာ့ဆိုင်းလွတ်ခရိုင်ခွဲ၊ ဘန်မဲတောရွာရှိ လယ်ကွင်း ၇၀ နေရာ၌ ကင်းလှည့်နေစဉ် ထိုင်းနိုင်ငံဘက်ခြမ်းသို့ တရားမဝင် ဖြတ်ကျော်ဝင်ရောက်လာသူ နိုင်ငံခြားသား ၃၉ ဦးကို ဖမ်းဆီးရမိခဲ့သည်။ ၎င်းတို့တွင် အမျိုးသား ၃၄ ဦးနှင့် အမျိုးသမီး ၅ ဦး ပါဝင်ပြီး နိုင်ငံပေါင်း ၁၂ နိုင်ငံမှဖြစ်ကာ ၎င်းတို့မှာ ပါကစ္စတန်မှ (၁၂ ဦး)၊ အိန္ဒိယမှ (၂ ဦး)၊ နီပေါမှ (၂ ဦး)၊ ယူဂန်ဒါမှ (၃ ဦး)၊ တောင်ဆူဒန်မှ (၁ ဦး)၊ ကင်ညာမှ (၁၂ ဦး)၊ အီဂျစ်မှ (၁ ဦး)၊ ဗီယက်နမ်မှ (၃ ဦး)၊ ကာဇက်စတန်မှ (၁ ဦး)၊ ဘူရွန်ဒီမှ (၁ ဦး) နှင့် ရဝမ်ဒါမှ (၁ ဦး) တို့ဖြစ်ကြသည်။
နိုင်ငံခြားသားများက ၎င်းတို့သည် ထိုင်းနိုင်ငံဘက်သို့ ခိုးဝင်လာကြောင်း ဝန်ခံခဲ့သည်။ ကေကေပါ့ခ် (KK Park) တွင် နှိမ်နင်းမှုများ ပြုလုပ်ပြီးနောက် နိုင်ငံခြားသားအုပ်စုကို မြဝတီမြို့ဘက်သို့ ရွှေ့ပြောင်းထားသော်လည်း မည်သည့်အချိန်တွင် နေရပ် သို့မဟုတ် မိခင်နိုင်ငံသို့ ပြန်ရမည်ကို မသိသောကြောင့် ထွက်ပြေးရန် ဆုံးဖြတ်ခဲ့ခြင်းဖြစ်သည်။ ၎င်းတို့သည် မိခင်နိုင်ငံသို့ ပြန်ရန် နည်းလမ်းရှာရန်အတွက် တောလမ်းကို အသုံးပြု၍ ထိုင်းနိုင်ငံဘက်သို့ ဖြတ်ကျော်လာခဲ့ခြင်းဖြစ်သည်။ ဥပမာ- ပါကစ္စတန်နိုင်ငံသားများမှာ သံရုံးနှင့် ဆက်သွယ်ထားပြီးဖြစ်သည်။ အချို့မှာမူ ပြီးခဲ့သည့် သြဂုတ်လကမှ ကေကေပါ့ခ်၌ စကမ်မာ (Scammer) အဖြစ် လုပ်ကိုင်ရန် ရောက်ရှိလာသူများဖြစ်ကြသည်။
ဤနိုင်ငံခြားသားအုပ်စုမှ အများစုသည် အင်္ဂလိပ်စကားပြောနိုင်သောကြောင့် Call Center သို့မဟုတ် Customer Service အဖြစ် အလုပ်လုပ်ကိုင်ရန် ထိုင်းနိုင်ငံသို့ လာရောက်ရန် အကြံပြုသည့် ကြော်ငြာများ သို့မဟုတ် ကမ်းလှမ်းမှုများကို မြင်တွေ့ခဲ့ရကြောင်း ပြောကြားခဲ့သည်။ သို့သော် ဘန်ကောက်သို့ ရောက်ရှိလာသောအခါ မဲဆောက်မြို့သို့ ခေါ်ဆောင်ခြင်းခံရပြီး တောလမ်းမှတစ်ဆင့် မြန်မာနိုင်ငံဘက်သို့ ဖြတ်ကျော်ပို့ဆောင်ခံရခြင်းဖြစ်ကြောင်းပြောပြသည်။ ထို့နောက် သူတို့၏ နိုင်ငံကူးလက်မှတ်များကို သိမ်းယူခံရပြီး အတင်းအကျပ် အလုပ်လုပ်ခိုင်းခဲ့သည်။ အစောပိုင်းကာလများတွင် မည်သူနှင့်မျှ အဆက်အသွယ်မရရှိခဲ့ဘဲ မိမိတို့ မည်သည့်နေရာတွင် ရှိနေသည်ကိုလည်း မသိရှိခဲ့ကြောင်း ဖွင့်ဟခဲ့သည်။
လက်ရှိတွင် ထိုင်း အရာရှိများက နိုင်ငံကူးလက်မှတ်များကို စစ်ဆေးပြီး တရားမဝင် ဝင်ရောက်လာသည့် နိုင်ငံခြားသား အဖြစ် စွဲချက်တင်ခဲ့ကာ အချို့မှာ ဗီဇာသက်တမ်းလွန်နေမှု(Overstay) ဖြင့် စွဲချက်တင်ခံရသည်။ အရာရှိများက ဖမ်းဆီးရမိသူအားလုံးကို ဥပဒေအရ ဆက်လက်ဆောင်ရွက်ရန်အတွက် တာ့ခ်ခရိုင်၊ မဲဆောက်မြို့နယ်ရှိ လူဝင်မှုကြီးကြပ်ရေး ရဲတပ်ဖွဲ့ထံ လွှဲပြောင်းပေးအပ်ခဲ့သည်။
