ဖိလစ်ပိုင်မြို့တော်ဝန်ဟောင်းတစ်ဦးကို ထောင်ဒ-ဏ်တစ်သက် ချမှတ်

မြို့တော်ဝန်ဟောင်းတစ်ဦးကို လူကုန်ကူးမှုဖြင့် အပြစ်ရှိကြောင်း ဖိလစ်ပိုင်တရားရုံးတစ်ခုက ဆုံးဖြတ်ခဲ့ပြီး နိုင်ငံခြားသားများကို နစ်နာစေခဲ့သည့် အွန်လိုင်းငွေလိမ်လုပ်ငန်းထူထောင်ခဲ့ရာတွင် ပါဝင်ပတ်သက်မှုဖြင့် ထောင်ဒ-ဏ်တစ်သက်ချမှတ်လိုက်ကြောင်း သိရသည်။
မြို့တော်ဝန်ဟောင်း အဲလစ်ဂေါ်ကို ဒေသန္တာရတရားရုံးတစ်ခုက ယင်းကဲ့သို့ စီရင်ချက်ချခဲ့ခြင်းဖြစ်သည်ဟု သမ္မတ၏ ရာဇဝတ်မှုတိုက်ဖျက်ရေးကော်မရှင်က ပြောကြားခဲ့သည်။ စီရင်ချက်နှင့် ပတ်သက်၍ ဂေါ်နှင့် သူ၏ ရှေ့နေများဘက်က လတ်တလောတွင် တုန့်ပြန်လာခြင်းမရှိသေးပေ။
ဂေါ်သည် ၂၀၂၂ ခုနှစ်က မြို့တော်မနီလာမြောက်ဘက်ရှိ ဘမ်ဘန်မြို့တော်ဝန်ရာထူးအတွက် မယှဉ်ပြိုင်ခင်က မြို့တွင် Baotu Land Development Inc က ပိုင်ဆိုင်သော ရှစ်ဟက်တာကျယ်ဝန်းသည့် လုပ်ငန်းအဆောက်အအုံကိုထူထောင်ရာတွင် ကူညီပေးခဲ့သည်။
ဂေါ်၏ တရုတ်နိုင်ငံဖွား လုပ်ဖော်ကိုင်ဖက်များဖြစ်သည့် Zhang Ruijin Lin Baoying တို့သည် စင်ကာပူတွင် အကြီးမားဆုံး ငွေကြေးခဝါချမှုဖြင့် ပြစ်ဒ-ဏ်ချမှတ်ခံခဲ့ရသည်။ ၎င်းတို့သည်လည်း နိုင်ငံခြားသား ရာပေါင်းများစွာကို အလုပ်ခန့်ထားကာ ပြည်ပရှိ လောင်းကစားသမားများကို ပစ်မှတ်ထားသည့် ဖိလစ်ပိုင်ကမ်းလွန်လောင်းကစားလုပ်ငန်းတစ်ခုကို လက်ခံဆောင်ရွက်နေသည့် Baofu ၏ အမှုဆောင်အရာရှိများထဲတွင် ပါဝင်သည်။
ဘမ်ဘန်မြို့ရှိ အဆိုပါငွေလိမ်လုပ်ငန်းတွင် ရင်းနှီးမြှုပ်နှံမှုနှင့် အတုအယောင်အချစ်ဇာတ်လမ်းများဖြင့် လိမ်လည်မှုများပြုလုပ်ရန် အတင်းအကျပ်ခိုင်းစေခံရပြီး သတ်မှတ်ပမာဏမပြည့်မီပါက ရို-က်နှက်ခံရခြင်း သို့မဟုတ် လျှပ်စစ်ကျင်စက်ဖြင့်တို့ခံရခြင်းတို့ခံကြရကြောင်း ဝန်ထမ်းများက ပြောကြားခဲ့သည်။
အရှေ့တောင်အာရှခေါင်းဆောင်များသည် နိုင်ငံတကာရာဇဝတ်ဂိုဏ်းများက ကျူးလွန်သော ဆိုက်ဘာရာဇဝတ်မှုများနှင့် အွန်လိုင်းလိမ်လည်မှုများ တိုးပွါးလာခြင်းကို အလေးဂရုပြုလာကြချိန်တွင် တရားရုံး၏ စီရင်ချက် ထွက်ပေါ်လာခြင်းဖြစ်သည်။
ရာဇဝတ်သားများကို လိုက်လံဖမ်းဆီးရာတွင် ပူးပေါင်းဆောင်ရွက်ရန်နှင့် ဒေသကို ၎င်းတို့အတွက် ခိုလှုံအခြေချရာနှင့် ရာဇဝတ်ဗဟိုချက်အဖြစ် အသုံးချလာခြင်းမှ တားဆီးရန် ပြီးခဲ့သည့်လတွင် အာဆီယံခေါင်းဆောင်များက ကတိပြုခဲ့ကြသည်။