ဆီးဂိမ်းပြိုင်ပွဲတွင် အောင်မြင်မှုရသူများကို ထိုက်တန်စွာဂုဏ်ပြုချီးမြှင့်မည်ဟု ယာယီသမ္မတပြောကြား
--------------------------------------------
ထိုင်းနိုင်ငံမှာကျင်းပမဲ့ (၃၃)ကြိမ်မြောက်အရှေ့တောင်အာရှအားကစားပြိုင်ပွဲ(ဆီးဂိမ်း)မှာ အောင်မြင်မှုရသူတွေကို ထိုက်တန်စွာ ဂုဏ်ပြုချီးမြှင့်သွားမှာဖြစ်တယ်လို့ နိုင်ငံတော်ယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောပါတယ်။
နိုဝင်ဘာ၁၉ရက်က နေပြည်တော်ရှိ ဝဏ္ဏသိဒ္ဓိအားကစားရုံမှာကျင်းပတဲ့ ဆီးဂိမ်းပြိုင်ပွဲကို ဝင်ရောက်ယှဉ်ပြိုင်မဲ့ မြန်မာအားကစားအဖွဲ့ကို အောင်နိုင်ရေးအလံပေးအပ်တဲ့အခမ်းအနားမှာ ဗိုလ်ချုပ်မှူးကြီးမင်းအောင်လှိုင်က အခုလို ပြောကြားလိုက်တာပါ။
ဆီးဂိမ်းပြိုင်ပွဲဝင်မဲ့ လက်ရွေးစင်အားကစားသမားတွေအတွက် ဆေးပစ္စည်းတွေ၊ လေ့ကျင့်ရေးသုံးပစ္စည်းတွေနဲ့ စားစရိတ်တွေကိုလည်း နိုင်ငံတော်ဘဏ္ဍာထဲကနေ ကျခံသုံးစွဲပေးခဲ့ပြီး နိုင်ငံခြားသားနည်းပြငါးဦးကိုလည်း နိုင်ငံတော်စားရိတ်နဲ့ ငှားရမ်းလေ့ကျင့်စေခဲ့တယ်လို့ ဆိုပါတယ်။
ဆီးဂိမ်းပြိုင်ပွဲကနေတဆင့် အာရှနဲ့ ကမ္ဘာ့အိုလံပစ်အားကစားပြိုင်ပွဲတွေအထိ ဝင်ရောက်ယှဉ်ပြိုင်နိုင်ရေး မျှော်မှန်းကြိုးပမ်းကြစေလိုတယ်လို့လည်း ဗိုလ်ချုပ်မှူးကြီးမင်းအောင်လှိုင်က ပြောပါတယ်။
(၃၃)ကြိမ်မြောက်ဆီးဂိမ်းပြိုင်ပွဲကို ထိုင်းနိုင်ငံမှာ ဒီဇင်ဘာ၉ရက်ကနေ ၂၀ရက်အထိ ကျင်းပသွားမှာဖြစ်ပါတယ်။
ပြိုင်ပွဲမှာ အားကစားနည်း၅၄မျိုးထည့်သွင်းကျင်းပမှာဖြစ်ပြီး မြန်မာနိုင်ငံက အားကစားနည်း၃၈မျိုးမှာ ပါဝင်ယှဉ်ပြိုင်သွားမှာဖြစ်တယ်လို့ သိရပါတယ်။
