ကျားဖြန့်တွေကို အပြီးတိုင် ဖယ်ရှားရှင်းလင်းမယ်လို့ BGF ပြောဆိုမှုအပြီး ရွှေကုက္ကိုလ်က ကျားဖြန့်လုပ်သားတွေ ရွှေ့ပြောင်း တိမ်းရှောင်နေကြ
ကရင်ပြည်နယ် ၊ထိုင်း - မြန်မာနယ်စပ် မြဝတီမြို့နယ် ၊ ရွှေကုက္ကိုလ်မြို့သစ် မှာရှိတဲ့ ကျားဖြန့် ငွေလိမ်လုပ်ငန်းမှာ လုပ်ကိုင်သူအများအပြား ရွှေ့ပြောင်း ထွက်ပြေးတိမ်းရှောင်မှုတွေ ပြုလုပ်နေကြတယ်လို့ သိရပါတယ်။
BGF ပြောရေးဆိုခွင့်ရှိသူ ဒုတိယဗိုလ်မှူးကြီး နိုင်မောင်ဇော်က ရွှေကုက္ကိုလ် အပါအဝင် ထိုင်း-မြန်မာ နယ်စပ်လျှောက်မှာ လုပ်ကိုင်နေတဲ့ အွန်လိုင်းငွေလိမ်လုပ်ငန်း ကျားဖြန့်လုပ်ငန်းတွေကို အထူးစစ်ဆင်ရေး တရပ်အဖြစ် နှိမ်နှင်းသွားမယ်ဆိုပြီး ပြောဆိုမှု အပြီးမှာ ကျားဖြန့်လုပ်သားတွေ အခုလို ရွှေ့ပြောင်း တိမ်းရှောင်ကုန်ကြတာ ဖြစ်တယ်လို့ သိရပါတယ်။
BGF ပြောရေးဆိုခွင့်ရှိသူ ဒုတိယဗိုလ်မှူးကြီး နိုင်မောင်ဇော်က " ကျွန်တော် တို့ ဒီ ကျားဖြန့်နှိမ်နှင်းရေး အထူးစစ်ဆင်ရေးပွဲကြီး ကို စပြီပေါ့။ စတင် အကောင်အထည်ဖော်တော့မယ် ။ ” လို့ ထိုင်းမီဒီယာတွေကို ပြောဆိုခဲ့တာဖြစ်ပါတယ်။
မနေ့က နိုဝင်ဘာ ၁၇ ရက်နေ့ မှာ ထိုင်းမီဒီယာနဲ့ တွေ့ဆုံစဥ် ပြောဆိုခဲ့တာဖြစ်ပြီး အဲဒီနေ့ ညပိုင်းမှာပဲ ကျားဖြန့်လုပ်ငန်းက အောက်ခြေအဆင့် ဝန်ထမ်းတွေဟာ အထုတ်ကိုယ်စီနဲ့ ထွက်ပြေးနေကြတာ ဖြစ်တယ်လို့ သိရပါတယ်။
ရွှေကုက္ကိုလ်မြို့သစ်ကနေ ထွက်ပြေး တိမ်းရှောင်ကြတဲ့ ကျားဖြန့်လုပ်ကိုင်သူတွေအနက် မြန်မာနိင်ငံသားတွေသာ မြဝတီမြို့ဘက်ကို ရောက်ရှိလာပြီး နိုင်ငံခြားသားတွေကတော့ မြဝတီကို ရောက်လာတာမျိုးသိပ်မတွေ့ရဘူးလို့ သိရပါတယ်။
" ရွှေကုက္ကိုလ်နဲ့ မြဝတီကဝေးတယ် ။အဲဒီဘက်ကို ကားတိုင်းလည်း သွားမရဘူး ။ ညတုန်းက ရွှေကုက္ကိုလ်ဘက်မှာ ရုတ်ရုတ်သဲသဲ ဖြစ်သွားတယ် ။ ဘာလဲဆို ကျားဖြန့်သမားတွေကို နှင်ထုတ်တယ် ။ အခုပြေးကြတာ ဝန်ထမ်းတွေလေ ။ အောက်ခြေဝန်ထမ်းက ဂရုမစိုက်ဘူးလေ ။ ဖြစ်ချင်ရာ ဖြစ်ပေါ့ ။ သူတို့က ဒီနေရာက ထွက်ရင် တခြားနေရာပြောင်းလုပ်ကြမှာ ။ အဲဒီနေရာတွေမှာ BGF ကပဲလုံခြုံရေးယူပေးထားတာလေ ။အကြီးပိုင်း အရာရှိတွေဆို သူတို့ခေါ်ထုတ်ပြီးပြီ ။ " လို့ ဒေသခံကပြောပါတယ်။
လက်ရှိမှာ ရွှေကုက္ကိုလ်ကနေ မြဝတီကို ကားငှားခ ၈၀၀၀၀ ကျပ်လောက်ရှိကြောင်း သိရပါတယ် ။
ဒုတိယ ဗိုလ်မှူးကြီး နိုင်မောင်ဇော်ကတော့ ရွှေကုက္ကိုလ်မြို့က ကျားဖြန့်လုပ်ငန်းတွေကို ဒီတကြိမ်တော့ အပြီးတိုင် ဖယ်ရှားရှင်းလင်း သွားမှာဖြစ်ကြောင်း ၊ သိမ်းဆည်းရမိတဲ့ အဆောက်အအုံတွေကိုတော့ ဖျက်ဆီးတာမျိုး မလုပ်ဘဲ အိုးအိမ်မဲ့ပြည်သူတွေ နေထိုင်ဖို့ နဲ့ ဒေသဖွံ့ဖြိုးရေး လုပ်ငန်းအတွက် စနစ်တကျ စီမံခန့်ခွဲ သွားမယ်လို့ ပြောဆိုထားပါတယ်။
ဒေသခံကတော့ " ကျားဖြန့်သမားတွေကို ရှင်းမယ်ပြောတာလည်း ခဏခဏပဲ ။ တကယ်မပျောက်တာ ခက်တယ် ။ Game ဆိုင်တွေလည်း အရေးယူဖို့ လိုတယ်။ အခုလည်း ကျားဖြန့် အပြတ်ရှင်းမယ်ပြောတာ တကယ် ဟုတ်မဟုတ် စောင့်ကြည့်သိရမှာပေါ့ ။ " လို့ မှတ်ချက်ပြု ပြောပါတယ်။
ပြီးခဲတဲ့ အောက်တိုဘာလ တုန်းကလည်း မြဝတီမြို့၊ မယ်ထော်သလေးကျေးရွာအနီးမှာရှိတဲ့ တရုတ်နိုင်ငံသားတွေဦးစီးလုပ်ကိုင်နေတဲ့ ကျားဖြန့် ( ငွေလိမ်ဂိုဏ်း) AA အလုပ်ဆိုက်ကနေ ကျားဖြန့်လုပ်ကိုင်တဲ့ဝန်ထမ်းတွေ အများအပြား မြဝတီမြို့ကို ထွက်ပြေးတိမ်းရှောင်မှုရှိခဲ့ပါတယ်။
တိမ်းရှောင်လာတဲ့ နိုင်ငံခြားသားတွေကိုတော့ အစိုးရတာဝန် ရှိသူတွေက ထိုင်းနိုင်ငံအစိုးရနဲ့ ချိတ်ဆက်ပြီး လွှဲပြောင်းမှုတွေ လုပ်နေတယ်လို့ သိရပါတယ်။
မြဝတီမြို့နယ်ရှိ ကျားဖြန့်လုပ်ငန်းတွေမှာ လာရောက်လုပ်ကိုင်နေတဲ့ အထဲက နိုင်ငံခြားသား ၉၀၀၀ ကျော်ကို မတ်လကစပြီး သက်ဆိုင်ရာ နိုင်ငံအသီးသီးကို ပြန်လည် လွှဲပြောင်းပေးထားတယ်လို့ သိရပါတယ်။
