တောင်ကိုရီးယားက နျူစွမ်းအင်သုံး ရေငုပ်သင်္ဘောတည်ဆောက်မှု နျူကလီးယား ဒိုမီနိုသက်ရောက်မှု ဖြစ်လာနိုင်ကြောင်း မြောက်ကိုရီးယား သတိပေး
မြောက်ကိုရီးယားဟာ တောင်ကိုရီးယားနဲ့ အမေရိကန်ပြည်ထောင်စုအကြား နျူကလီးယားစွမ်းအင်သုံး ရေငုပ်သင်္ဘောတွေ တည်ဆောက်မယ့် သဘောတူညီချက်ကို ရှုတ်ချခဲ့ပြီး ဒီကိစ္စကြောင့် နျူကလီးယားဒိုမီနို အကျိုးသက်ရောက်မှုကို ဖြစ်ပေါ်စေပြီး လက်နက်ပြိုင်ဆိုင်မှုတွေ ပြင်းထန်လာ လိမ့်မယ်လို့ သတိပေးလိုက်ပါတယ်။
တောင်ကိုရီးယားသမ္မတ လီဂျေမြောင်ဟာ အမေရိကန်ပြည်ထောင်စုနဲ့ ကြာမြင့်စွာ စောင့်မျှော်ခဲ့ရတဲ့ လုံခြုံရေးနဲ့ ကုန်သွယ်ရေးသဘောတူညီချက်ကို အပြီးသတ်ကြောင်း ပြီးခဲ့တဲ့ အပတ်က ကြေညာခဲ့ပြီး အဏုမြူစွမ်းအင်သုံး ရေယာဉ်တွေ တည်ဆောက်မယ့် အစီအစဉ်တွေလည်း ပါဝင်နေပါတယ်။
ဆိုးလ်က "ယူရေနီယမ် သန့်စင်မှုနဲ့ လောင်စာ ပြန်လည်ပြုပြင်ခြင်းဆိုင်ရာ မိမိတို့ရဲ့ လုပ်ပိုင်ခွင့်ကို တိုးချဲ့ဖို့ အမေရိကန်ရဲ့ ထောက်ခံခွင့်ပြုမှု ရရှိထားတယ်လို့ တောင်ကိုရီးယားက ပြောပါတယ်။ နျူကလီးယားစွမ်းအင်သုံး ရေငုပ်သင်္ဘောအစီအစဉ်ဟာ အန္တရာယ်ရှိတဲ့ ထိပ်တိုက်ရင်ဆိုင်ရေး ကြိုးပမ်းမှု ဖြစ်တယ်လို့ နျူကလီးယားပိုင်ဆိုင်တဲ့ မြောက်ကိုရီးယားက သတိပေးပါတယ်။
သဘောတူညီချက်ဟာ ကိုရီးယားကျွန်းဆွယ်ပြင်ပ အာရှ-ပစိဖိတ်ဒေသရှိ စစ်ရေးလုံခြုံရေးအခြေအနေကို မတည်မငြိမ်ဖြစ်စေပြီး ကမ္ဘာလုံးဆိုင်ရာနယ်ပယ်မှာ နျူကလီးယားထိန်းချုပ်မှု မဖြစ်နိုင်တော့ အခြေအနေကို ဖြစ်ပေါ်စေနိုင်တယ်လို့ မြောက်ကိုရီးယားနိုင်ငံပိုင် သတင်းဌာနက ပြောပါတယ်။
အမေရိကန်ပြည်ထောင်စုနဲ့ တောင်ကိုရီးယားတို့ရဲ့ ထိပ်တိုက်ရင်ဆိုင်ဖို့ ရည်ရွယ်ချက်ကြောင့် မြောက်ကိုရီးယားဟာ ပိုမိုတရားမျှတပြီး လက်တွေ့ကျတဲ့ တန်ပြန်အစီအမံတွေကို လုပ်ဆောင်မယ်လို့လည်း ဆိုပါတယ်။
နယ်စပ်ပဋိပက္ခတွေ မဖြစ်စေဖို့အတွက် မြောက်ကိုရီးယားနဲ့ စစ်ရေးဆွေးနွေးပွဲတွေ ကျင်းပဖို့ တောင်ကိုရီးယားက အဆိုပြုပြီး တရက်အကြာမှာ နျူကလီးယားစွမ်းအင်သုံး ရေငုပ်သင်္ဘောနဲ့ပတ်သက်ပြီး မြောက်ကိုရီးယားရဲ့ သတိပေးချက် ထွက်ပေါ်လာတာပါ။
တောင်ကိုရီးယားကတော့ မြောက်ကိုရီးယာားအပေါ် ရန်လိုတဲ့ ရည်ရွယ်ချက်မရှိဘူးလို့ တုံ့ပြန်ထားပါတယ်။ တောင်ကိုရီးယားနဲ့ အမေရိကန်အကြား သဘောတူညီချက်ဟာ နိုင်ငံကို ကာကွယ်ဖို့နဲ့ တောင်ကိုရီးယား- အမေရိကန်အကြား လုံခြုံရေး မဟာမိတ်ဖွဲ့မှုကို ခိုင်မာစေဖို့သာ ရည်ရွယ်ကြောင်း သမ္မတပြောရေးဆိုခွင့်ရှိသူ ကန်ယူဂျွန်က ဆိုပါတယ်။
