ကမ္ဘာ့ဖလားနေရာနှင့်ပတ်သက်ပြီး နေမာကို နောက်ဆုံးအကြိမ် သတိပေးလာတဲ့ အန်ဆယ်လော့တီ
======================
ကာလိုအန်ဆယ်လော့တီက နေမာအား ၂၀၂၆ ကမ္ဘာ့ဖလားပြိုင်ပွဲဝင် ဘရာဇီးအသင်းတွင် နေရာတစ်နေရာ ရရှိရေးအတွက် နောက်ဆုံးအကြိမ် သတိပေးမှု ပြုလုပ်လာပါတယ်။
အီတလီလူမျိုးနည်းပြအန်ဆယ်လော့တီဟာ ဘရာဇီးနည်းပြဖြစ်လာပြီးနောက် နေမာကို တစ်ကြိမ်မျှ ရွေးချယ်ခြင်း မရှိသေးပါဘး။ ဒါပေမယ့် ရီးရဲလ်မက်ဒရစ်နည်းပြဟောင်းဟာ ပီအက်စ်ဂျီနှင့် ဘာစီလိုနာစူပါစတားအတွက် တံခါးဖွင့်ပေးထားတုန်း ဖြစ်ပါတယ်.
နေမာဟာ ဘရာဇီးအတွက် ၁၂၈ ပွဲကစားထားရာမှာ ၇၉ ဂိုးသွင်းယူပြီး နိုင်ငံအတွက် ဂိုးအများဆုံးသွင်းယူထားသူအဖြစ် ရပ်တည်နေသူ ဖြစ်ပါတယ်။
ဒါပေမယ့် သူဟာ ၂၀၂၃ ခုနှစ် အောက်တိုဘာလတုန်းက ဥရုဂွေးနှင့် ကမ္ဘာ့ဖလားခြေစစ်ပွဲတွင် ဘရာဇီးအတွက် ကစားစဉ် ဒူးအရွတ်ဒဏ်ရာပြင်းထန်စွာ ရရှိပြီးနောက် ရွေးချယ်ခံလာရခြင်း မရှိပါဘူး။
သူဟာ ယင်းနောက်ပိုင်းတွင် ကြံ့ခိုင်မှု ပြဿနာများနှင့် ရင်ဆိုင်လာရပြီး ဆော်ဒီကလပ် Al Hilal နှင့် စာချုပ်ဖျက်သိမ်းခဲ့ကာ ကစားသမားဘဝစတင်ရာ ဆန်းတို့စ်သို့ ပြန်ရောက်လာခဲ့ပါတယ်။
အသက် ၃၃ နှစ်ှရိ နေမာဟာ ဆန်းတို့စ်သို့ ပြန်လည် ရောက်လာချိန်တွင်လည်း ကြံ့ခိုင်မှုပိုင်းပြဿနာနှင့် ဆက်လက် ရင်ဆိုင်နေရပါတယ်။
အန်ဆယ်လော့တီက "နေမာက ဘရာဇီးမှာ ပြောစရာတစ်ခု ဖြစ်ပါတယ်။ ဒါပေမယ့် ကျွန်တော်က ဒါကို ကမ္ဘာ့ပြဿနာလို့ မြင်တယ်။ ကံကောင်းစွာဘဲ သူ ဒဏ်ရာကနေ ပြန်ကောင်းလာပါပြီ။ အခု သူ့မှာ ခြောက်လပဲ ကစားဖို့ ကျန်တော့တယ်။ ဘရာဇီးချန်ပီယံရှစ်က ဒီဇင်ဘာလ ၇ ရက်ဆိုပြီးပြီ။ သူ အပန်းဖြေခရီးသွားနိုင်တယ်။ ပြီးရင် ဘရာဇီးချန်ပီယံရှစ် ပြန်စလာတဲ့အခါ သူ့အရည်အသွေးကို ပြသနိုင်တယ်။ အရေးအကြီးဆုံးကတော့ ကြံ့ခိုင်မှုပိုင်းပေါ့"လို့ ပြောကြားသွားပါတယ်။
ဒါ့အပြင် အန်ဆယ်လော့တီက ၂၀၂၆ ကမ္ဘာ့ဖလားပြိုင်ပွဲအတွက် ကစားသမားရွေးချယ်ရာတွင် အမှားအယွင်းတစုံတရာ ပြုလုပ်သွားမှာ မဟုတ်ကြောင်းလည်း ဆိုသွားပါတယ်။
ဆက်လက်ပြီး ၎င်းက "နေမာက ကမ္ဘာ့ဖလားမှာ ပါဝင်နိုင်တဲ့ လူစာရင်းထဲမှာ ပါဝင်ထားပြီးသားပါ။ အခု သူ့မှာ နောက်ဆုံးလူစာရင်း မထွက်ခင် ခြောက်လအချိန်ရသေးတယ်။ သူ့နဲ့ အခြားကစားသမားတွေကို စောင့်ကြည့်မယ်။ နောက်ဆုံးစာရင်းကို အမှားအယွင်းမရှိ လုပ်နိုင်ဖို့ ထုတ်နိုင်ဖို့ လိုတယ်"လို ပြောကြားသွားပါတယ်။
နေမာဟာ ဒဏ်ရာမှ ပြန်လည်ကောင်းမွန်လာပြီးနောက် ဆန်းတို့စ်အတွက် ၃ ပွဲဆက် ကစားထားနိုင်ပြီး ပါးမီးရပ်စ်ကို အနိုင်ရကာ တန်းဆင်းဇုန်မှ လွတ်မြောက်အောင် ကူညီပေးထားနိုင်ပါတယ်။
သူဟာ ယခုရာသီတွင် ပေါင်ကြွက်သားဒဏ်ရာပြဿနာကြုံနေရတာ ဖြစ်ပြီး ယခုရာသီတွင် ၂၄ ပွဲကစားထားရာမှာ ၆ ဂိုးသွင်းကာ ၃ ကြိမ် ဖန်တီးထားပါတယ်။
